ފެބްރުއަރީގެ ނިޔަލަށް ސްޓޫޑެންޓް ލޯނުގެ ގޮތުގައި 20 މިލިއަނަށްވުރެ ގިނަ ރުފިޔާ ދޫކޮށްފި

މިދިޔަ ފެބްރުއަރީގެ ނިޔަލަށް ސްޓޫޑެންޓް ލޯނުގެ ގޮތުގައި 20 މިލިއަނަށްވުރެ ގިނަ ފައިސާ ދަރިވަރުންނަށް ދޫކޮށްފައިވާ ކަމަށް ހަޔަރ އެޑިއުކޭޝަން މިނިސްޓަރު ޑރ. އަލީ ހައިދަރު އަހްމަދު ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އެ މިނިސްޓްރީގެ މަސައްކަތްތަކުގެ އަދާހަމަ ހާމަކުރައްވަމުން ވިދާޅުވީ ކުރި ޕޯޓަލް ބޭނުންކޮށްގެން ސްކޯލަރޝިޕް އަދި ފުރަތަމަ ޑިގްރީއަށް އެދި ހުށަހެޅުމަށް އެއް ޕްލެޓްފޯމެއް ތައާރަފްކުރެވި ޑިޖިޓަލްކޮށް ފައިސާ ދޫމުކުރުމުގެ މަސައްކަތް ކުރިއަށްދާ ކަމަށެވެ. އެގޮތުން މިއަހަރުގެ ފެބުރުއަރީ ގެ ނިޔަލަށް 46 ދަރިވަރުންނަށް 556،174 ރުފިޔާ އަދި 2001 ދަރިވަރުންނަށް ސްޓޫޑެންޓް ލޯނުގެ ގޮތުގައި 20 މިލިއަނަށްވުރެ ގިނަ ރުފިޔާ ދޫކުރެވިފައިވާ ކަމަށެވެ. އަދި ސްކޮލަރޝިފް 105 ދަރިވަރުން 33.9 މިލިއަން ރުފިޔާ ދޫކުރެވިފައިވާ ކަމަށެވެ.

މިނިސްޓަރުގެ ވާހަކަފުޅުގައި ޕްލޭނިންގް ޑިޕާޓްމަންޓުން ރިސާޗް ގްރާންޓު އެކުލާވައި ގައުމީ ޔުނިވާސިޓީ އާއި ވިލާ ކޮލެޖު އަދި އިސްލާމިކް ޔުނިވާސިޓީއާއެކު އެއްބަސްވުން ހަދައި، ދިރާސާ ކުރުމަށް ކޮންމެ މުވައްސަސާއަކަށް 1.5 މިލިއަން ރުފިޔާ ކަނޑައެޅިފައިވާ ކަމަށެވެ. އަދި ބޭރު ބަސް ދަސްކޮށްދިނުމަށް ފަތުރުވެރިކަމުގެ ދާއިރާއަށް އަމާޒުކޮށް 1،000 ފުރުސަތުދީފައިވާއިރު، އޭގެތެރޭގައި އަރަބި، ފްރެންޗް، އަދި ޖަރުމަން ބަހާއި ކޮރެއަން ބަސްވެސް ދަނީ ދަސްކޮށްދެމުން ކަމަށް ވިދާޅުވިއެވެ.

އަދި ކުރިއަށް އޮތް ފަސް އަހަރު ދުވަހުތެރޭގައި ހަމަ އެކަނި ދިވެހިންނަށް ހާއްސަ 22 ދާއިރާއެއް ކަނޑައަޅައި ތަމްރީން ފަރުމާކުރުމުގެ މަސައްކަތް ކުރިއަށްދާކަން ފާހަގަ ކުރެއްވިއެވެ.

ލޯން ސެކްޝަނަށް ބަލާލާއިރު، ޖެނުއަރީ އަދި ފެބްރުއަރީގައި 759 ފަރާތަކަށް ފައިސާ ދޫކުރެވި 232 ދަރިވަރުން ކިޔަވާކަމުގެ ލިޔުން ލިބުމުން މިމަހު ފައިސާ ދޫކުރެވޭނެ ކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ، 2026 ގެ ލޯނު ސްކީމަށް އެދުމުގެ ފުރުޞަތު ހުޅުވާލުމަށްޓަކައި ޕޯޓަލް ތައްޔާރުކުރުމާއި އުސޫލު އެކުލަވާލުމުގެ މަސައްކަތް ކުރަމުންދާކަމަށެވެ. އަދި ސްކީމުގެ ކަންކަން ހަރުދަނާކުރުމަށްޓަކާ ކުރާ މަސައްކަތުގެ ތެރެއިން އެޕްލިކޭޝަން ޑެޑްލައިނެއް ނުބާއްވައި ލޯނަށް އެދުމުގެ ފުރުޞަތު މުޅި އަހަރަށް ހުޅުވާލާގޮތަށް ހަމަޖައްސާފައިވާކަމަށެވެ. އަދި މިކަމުގެ ސަބަބުން ލޯނަށް އެދޭ ދަރިވަރުންނަށް ފަސޭހަތަކެއް ލިބިގެންދާނެކަން ފާހަގަކުރެއްވިއެވެ. މިނިސްޓަރު ވިދާޅުވީ މި ބަދަލާއެކު، ދަރިވަރުން ލޯނު ހޯދަން އެދޭއިރު ހުށަހަޅަންވާ ލިޔުންތައްވެސް ތަފާތުވާނެކަމަށެވެ.

މީގެ އިތުރުން މިނިސްޓަރު ވިދާޅުވީ މިސަރުކާރުން އަލަށް ގާއިމުކުރި ކޯލް ސެންޓަރަށް މަހެއްގެ މައްޗަށް އެވްރެޖްކޮށް 1035 ކޯލަށް ޖަވާބު ދެވޭ ކަމަށެވެ. އަދި ވަޓްސްއެޕް ގެ ހިދުމަތް 25 އަށް ވުރެ ގިނަ ދަރިވަރުން ކިޔަވާ ގައުމުތަކަށް ހަމަޖައްސާ، މަހަކު އެވްރެޖްކޮށް 482 މެސެޖަށް ޖަވާބު ދެމުންދާ ކަމަށެވެ.