އިޓަލީގެ ބިންގަނޑު ކަނޑައިގެންދިޔަ ހާދިސާ: 2500 މީހުން ރައްކާތެރި ސަރަހައްދުތަކަށް ގެންގޮސްފި

ބޯކޮށް ވާރޭވެހުމުގެ ސަބަބުން ބިންގަނޑު ކަނޑައިގެން ގޮސް، އިޓަލީވިލާތުގެ ސިސިލީގެ އަވަށެއް ކަމަށްވާ ނިޝްޝޭމީގައި ފަރުބަދަ މަތީގައި ހުންނަ ބައެއް ގޭގެ ވެއްޓެން ފެށުމުން 2500 އެއްހާ މީޙުން ރައްކާތެރި ހިސާބުތަކަށް ބަދަލުކޮށްފި އެވެ.

ނިޝްޝޭމީ އަކީ އުސް ޕްލެޓޫއެއްގެ މަތީގައި އޮންނަ އަވަށެކެވެ. އެ އަވަށުގައި ގާތްގަނޑަކަށް 25،000 މީހުންގެ އާބާދީއެއް އޮވެ އެވެ.

ބިންގަނޑު ކަނޑައިގެން ދިޔުމުގެ ސަބަބުން އެ ޕްލެޓޫގެ ބައިބައި މަޑުމަޑުން ދަނީ ވެއްޓެމުންނެވެ. ބީބީސީން ރިޕޯޓުކޮށްފައިވަނީ މިހާތަނަށް 2500 އެއްހައި މީހުން ރައްކާތެރި ސަރަހައްދުތަކަށް ގެންގޮސްފައިވާ ކަމަށެވެ.

ބިންގަނޑު ކަނޑައިގެން ގޮސް މި ހާދިސާ ހިނގަން ފަށާފައިވަނީ މީގެ ދެދުވަސް ކުރިންނެވެ. ޕްލެޓޫގެ ބޮޑެތި ތަންތަންގަނޑު ނެއްޓެމުންދާއިރު އެ ސަރަޙައްދާ އިންވެގެންވާ އިމާރާތްތަކުގެ އެއްބައި މިހާރު ވެސް އޮތީ ބޭރަށް އެލިފައެވެ. ބައެއް އިމާރާތްތަކުން ބައިބައި ވެއްޓެމުން އަންނަ މަންޒަރު އާންމުކޮށްފައިވާ ބައެއް ވީޑިއޯތަކުން ފެންނަން ހުރެ އެވެ.

މަދަނީ ރައްކާތެރިކަމާބެހޭ އިސްވެރިޔާ ފޭބިއޯ ސިސިލިއާނޯ ވިދާޅުވި ބިންގަނޑު ކަނޑައިގެން ދިޔުމުގެ އަސަރުކޮށްފައިވާ ސަރަޙައްދުތަކުގައި ދިރިއުޅޭ މީހުން ދާއިމީ ގޮތަކަށް އެހެން ސަރަޙައްދުތަކަށް ބަދަލުކުރާނެ ކަމަށެވެ.

ސަރަޙައްދުގައި ހުރި ގެ ތަކަކީ މީހުން ދިރިއުޅެން އެކަށީގެންވާ ތަންތަން ނޫން ކަމަށް އޭނާ ވިދާޅުވިއެވެ. އަދި ބިންގަނޑު ކަނޑައިގެން ދިޔުން މަޑުޖެހުމުން ޙާލަތު އިތުރަށް ވަޒަން ކުރާނެ ކަމަށް އޭނާ ވިދާޅުވިއެވެ.

އިޓަލީވިލާތުގެ ސަރުކާރުން ވަނީ ފަހުގެ ތޫފާނުގައި އެންމެ ބޮޑެތި ގެއްލުން ލިބުނު ސަރަޙައްދުތަކަށް އެހީތެރިވުމަށް 100 މިލިޔަން ޔޫރޯ ހަމަޖައްސަައިފައެވެ. ނަމަވެސް ލިބިފައިވާ ގެއްލުމުގެ އަގު އެއް ބިލިޔަން ޔޫރޯއަށް އަރާނެ ކަމަށް އިދާރާތަކުން ވަނީ ލަފާކޮށްފައެވެ.