ފ. ނިލަންދޫގައި ޓޫރިސްޓް ހޮޓަލެއް އަޅަނީ

ފ.ނިލަންދޫގައި ޓޫރިސްޓް ހޮޓަލެއް އަޅާއިދޭނޭ ފަރާތެއް ހޯދަން އިއުލާނުކޮށްފި އެވެ.

ނިލަންދޫގައި ޓޫރިސްޓް ހޮޓަލެއް ތަރައްގީކޮށް ހިންގާނެ ފަރާތެއް ހޯދުމަށް ބީލަމަށް ހުޅުވާލައިފަ އެވެ.

ޓޫރިޒަމް މިނިސްޓްރީން ވިދާޅުވީ، ނިލަންްދޫގައި ފަތުރުވެރިކަން ތަރައްގީ ކުރުމަށް ކަނޑައަޅާފައިވާ 13،300 އަކަފޫޓުގެ ބިމުގައި ޓޫރިސްޓް ހޮޓަލެއް ތަރައްގީކޮށް ހިންގާނެ ފަރާތެއް ހޯދުމަށް ބީލަމަށް ހުޅުވާލުމަށް ނިންމާފައިވާ ކަމަށެވެ.

މި ހޮޓަލުގައި މަދުވެގެން 50 އެނދު ހުންްނަންޖެހޭނެ ކަމަށް ފަތުރުވެރިކަމާ ބެހޭ ވުޒާރާއިން ބުނެފައިވެއެވެ. ބިން ދޫކުރުމަށް ހަމަޖެހިފައިވަނީ 50 އަހަރު ދުވަހުގެ މުއްދަތަކަށް ކަމަށާއި އެއްބަސްވުމުގައި ސޮއިކުރާ ދުވަހުން ފެށިގެން 24 މަސްދުވަސްތެރޭގައި އަމަލީ މަސައްކަތްތައް ފަށަންޖެހޭނެ ކަމަށް އެވުޒާރާއިން ބުނެއެވެ.

ފަތުރުވެރިކަމާއި ތިމާވެއްޓާބެހޭ ވުޒާރާއިން ބުނީ، ނިލަންދޫގައި ޓޫރިސްޓް ހޮޓަލެއް ތަރައްޤީކުރުމަށް ޝައުގުވެރިވާ ފަރާތްތަކުން އަންނަ މަހުގެ 24 ވަނަ ދުވަހު ވަރޗުއަލްކޮށް ބާއްވާ މަޢުލޫމާތު ސާފުކުރުމުގެ ބައްދަލުވުމުގައި ބައިވެރިވެ، 1 އެޕްރީލްގެ 12:00 ގައި ބީލަން ހުށަހަޅަންޖެހޭނެ ކަމަށެވެ.

މިނިސްޓްރީން ވިދާޅުވީ، މައުލޫމާތު ސާފު ކުރުމުގެ ބައްދަލުވުމުގައި ބައިވެރިވުމަށްޓަކައި އަންނަ މަހުގެ 23 ވާ ހޯމަ ދުވަހުގެ ކުރިން އެ މިނިސްޓްރީގެ އީމެއިލް އަށް މައުލޫމާތު ސާފުކުރުމުގެ ބައްދަލުވުމުގައި ބައިވެރިވުމަށް އެދި ނަމާއި، އީމެއިލް އެޑްރެސް އަދި ފޯން ނަންބަރު މެއިލް ކުރަން ޖެހޭނެ ކަމަށެވެ.

މިނިސްޓްރީން ވަނީ އެކަމާއި ގުޅޭ އިތުރު މައުލޫމާތު ބޭނުންވާ ފަރާތްތަކަށް މާރިޗް މަހުގެ 29 ވާ އާދިއްތަ ދުވަހުގެ 13:00 ގެ ކުރިން އެ މިނިސްޓްރީއަށް އީމެއިލް ކޮށްގެން މައުލޫމާތު ސާފު ކުރުމަށް އެދިފައެވެ.