އަފްގާނިސްތާނުގައި ކާބޯތަކެތި ހުސްވެ ބަނޑަށް ޖެހިއްޖެ

އަވައްޓެރި އަފުގާނިސްތާނުގައި ކާބޯތަކެތި ހުސްވެ ބަނޑުހައި ހޫނުކަމެއް ކުރިމަތިވެފައިވާ ކަމަށް އދ.އިން ބުނެފި އެވެ.

އދ. އިން ވަނީ އަފްގާނިސްތާނުގައި ކާބޯތަކެތި ރައްކާތެރި ކުރުމަށް މަޝްރޫއުއެއް ފަށަން ނިންމާފައިވާ ކަމަށްވެސް ބުނެފަ އެވެ. މި މަޝްރޫއަށް 100 މިލިއަން އެމެރިކާ ޑޮލަރު ޙަރަދު ކުރުމަށްވެސް ވަނީ ހަމަޖައްސާފަ އެވެ.

އަވަށްޓެރި ގައުމުތަކުން އަފްޣާނިސްތާނުގެ ރައްޔިތުން ގިނަ އަދަދަކަށް ފޮނުވާލުމާއި ބޭރުގެ އެހީތައް ކުޑަކުރުމާއި އިގްތިސާދީ ދަތިކަމުގެ ސަބަބުން ބަނޑުހައިހޫނުކަމުގެ މައްސަލަ ވަނީ އިންތިހާއަށް ގޯސްވެފައެވެ.

އަފްޣާނިސްތާނުގެ އިންސާނީ ހާލަތު ވަރަށް ބޮޑަށް ގޯސްވަމުންދާއިރު، ރެމިޓެންސް ގެއްލުމާއި، ވަޒީފާގެ ފުރުސަތުތައް މަދުވުމާއި، ބައިނަލްއަގްވާމީ އެހީތެރިކަން ވަރަށް ބޮޑަށް މަދުވުމުން އެތައް މިލިއަން ބަޔަކު ބަނޑުހައިހޫނުކަމުގެ ތެރެއަށް ވަނީ ވެއްޓިފައިވެއެވެ.

އދ. ގެ ފުޑް އެންޑް އެގްރިކަލްޗާ އޯގަނައިޒޭޝަންގެ ޑިރެކްޓަރު ކު ޑޮންގްޔޫ ވިދާޅުވީ މި މަޝްރޫއުގެ ސަބަބުން ކާބޯތަކެތީގެ ރައްކާތެރިކަމުގެ އަވަސް ބޭނުންތަކަށް ހައްލެއް ލިބިގެންދާނެ ކަމަށެވެ.

އދ. ގެ ފުޑް އެންޑް އެގްރިކަލްޗާ އޯގަނައިޒޭޝަންގެ ރިޕޯޓް ބުނާގޮތުން މި އަހަރު 17.4 މިލިއަން މީހުންނަށް ކާބޯތަކެތީގެ ނުރައްކާތެރިކަން ކުރިމަތިވާނެ ކަމަށް ލަފާކޮށްފައެވެ.

ފާއިތުވީ ހައެއްކަ އަހަރުވެސް އަފްގާނިސްތާނަކީ ކޮންމެ 3 މީހަކުން އެކަކު ބަނޑުހައި ހޫނު ކަން ތަހައްމަލް ކުރަމުންދާ ފަރާތެއްކަމަށް ބައިނަލް އަގުވާމީ ރިޕޯޓްތައް ބުނެ އެވެ.