ރައީސް ޔާމީން މިއަދު އައްޑޫ ސިޓީއަށް ވަޑައިގެންފި

ޕީޕަލްސް ނެޝަނަލް ފްރަންޓް (ޕީއެންއެފް) ގެ މުއައްސިސް އަދި ކުރީގެ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް، މިއަދު އައްޑޫ ސިޓީއަށް ވަޑައިގެންފިއެވެ.

މިއަދުން ފެށިގެން މި މަހުގެ 9 ވަނަ ދުވަހުގެ ނިޔަލަށް ރައީސް ޔާމީން އައްޑޫ ސިޓީއަށް ކުރައްވާ މި ދަތުރުފުޅަކީ، ޕީއެންއެފްގެ ސިޔާސީ ހަރަކާތްތައް އަތޮޅުތެރޭގައި ފުޅާކޮށް، ޕާޓީގެ މެންބަރޝިޕް އިތުރުކުރުމުގެ މަޤްޞަދުގައި ކުރައްވާ ދަތުރުފުޅެކެވެ.

މި ދަތުރުފުޅުގައި އައްޑޫ ސިޓީގެ ގުޅިފައިވާ އަވަށްތަކުގެ އިތުރުން ވަކިން އޮންނަ ހުޅުމީދޫ ހިމެނޭހެން، އައްޑޫގެ ހުރިހާ ރަށަކަށް އެމަނިކުފާނު ޒިޔާރަތްކުރެއްވުމަށް ވަނީ ހަމަޖެހިފައެވެ. އަދި މި ދަތުރުފުޅުގެ ތެރެއިން ޕީއެންއެފްގެ ޚާއްޞަ ޖަލްސާއެއް އައްޑޫގައި ބޭއްވުމަށް ވެސް ވަނީ ތާވަލުކޮށްފައެވެ.

ރައީސް ޔާމީން އައްޑޫ ސިޓީއަށް ވަޑައިގަންނަވާތީ، އެ ސިޓީގައި ތިބި ޕީއެންއެފްގެ ސަޕޯޓަރުންނާއި މެންބަރުން ދަނީ އެމަނިކުފާނަށް ހޫނު މަރުޙަބާއެއް ދެންނެވުމަށް ވަރަށް ފުރިހަމައަށް ތައްޔާރުވަމުންނެވެ. އަދި އެމަނިކުފާނުގެ އިސްތިޤްބާލުގައި ވީހާވެސް ގިނަ ރައްޔިތުން ބައިވެރިވުމަކީ ޕީއެންއެފްގެ ވަރަށް ބޮޑު އެދުމެކެވެ.

ރައީސް ޔާމީންގެ ވެރިކަމުގައި އައްޑޫ ސިޓީއަކީ ތަރައްޤީގެ ގިނަ މަޝްރޫޢުތަކެއް ހިންގި، އެ މަޝްރޫޢުތަކުގެ ފޮނިމީރުކަން ލިބިގެންދިޔަ ސިޓީއެކެވެ. އެގޮތުން، އެ ސިޓީގެ މަގުތައް ހެދުމާއި، ބޯހިޔާވަހިކަމުގެ މަޝްރޫޢުތަކުގެ އިތުރުން ފަތުރުވެރިކަމާއި އިޤްތިޞާދީ ގޮތުން ގިނަ ކުރިއެރުންތަކެއް އެމަނިކުފާނުގެ ޒަޢާމަތުގައި ވަނީ ހޯއްދަވައިދެއްވާފައެވެ.

މިއީ ޕީއެންއެފް އުފެއްދެވި ފަހުން ރައީސް ޔާމީން އަތޮޅުތެރެއަށް ކުރައްވާ މިފަދަ ފުރަތަމަ ސިޔާސީ ދަތުރުފުޅަށް ވުމާއެކު، މި ދަތުރުފުޅުގައި އެ ސިޓީގެ ގިނަ ރައްޔިތުންނާ ބައްދަލުކުރައްވައި ޕާޓީގެ ސިޔާސަތުތައް ހާމަކުރައްވާނެ ކަމަށް ބެލެވެއެވެ.