އައްޑޫ ސިޓީގެ ތަރައްޤީއަށް މުހިންމު 8 މަޝްރޫޢެއް އިންވެސްޓްމަންޓް ފޯރަމްގައި ހުށަހަޅައިފި

އައްޑޫ ސިޓީގެ ތަރައްޤީއަށާއި އިޤްތިޞާދީ ކުރިއެރުމަށް މުހިންމު 8 މަޝްރޫޢެއް، އެމްޑީޕީން ބޭއްވި "އެމްޑީޕީ ކޮންގްރެސް 2026" ގެ އިންވެސްޓްމަންޓް ފޯރަމްގައި އައްޑޫ ސިޓީ ކައުންސިލުން ހުށަހަޅައިފިއެވެ.

މި ފޯރަމްގައި މަޝްރޫޢުތައް ތަޢާރަފުކޮށްދެއްވަމުން އައްޑޫ ސިޓީގެ މޭޔަރު ޢަލީ ނިޒާރު ވިދާޅުވީ، ވޭތުވެދިޔަ ފަސް އަހަރުގެ ތެރޭގައި ސިޓީއަށް އިންވެސްޓަރުން ހޯދުމަށް ގިނަގުނަ މަސައްކަތްތަކެއް ކުރެވުނު ކަމަށެވެ. އަދި އަތޮޅުތަކުގެ ތަރައްޤީއަށް އިސްކަންދެނީ އެމްޑީޕީން ކަމަށް ފާހަގަކުރައްވައި، ކުރީގެ ރައީސް އިބްރާހީމް މުޙައްމަދު ޞާލިޙަށާއި ޕާޓީގެ ލީޑަރޝިޕަށް އޭނާ ޝުކުރު އަދާކުރެއްވިއެވެ. މީގެއިތުރުން، އައްޑޫގެ ބިން ހިއްކުމުގެ މަޝްރޫޢު ނިންމައި ލޭންޑް ޔޫސް ޕްލޭން ހަދާފައިވަނިކޮށް، މިހާރުގެ ސަރުކާރުން އެ ބިންތައް ސަރުކާރުގެ ދަށަށް ގެންދިއުމުގެ ސަބަބުން ކައުންސިލަށް މަސައްކަތްތައް ކުރިއަށްގެންދަން ހުރަސްއެޅިފައިވާ ކަމަށްވެސް މޭޔަރު ވިދާޅުވިއެވެ.

ފޯރަމްގައި ހުށަހެޅުނު ޖުމްލަ 120 އާއި 150 މިލިއަން ރުފިޔާއާ ދެމެދުގެ އަގުހުރި މުހިންމު މަޝްރޫޢުތަކުގެ ތެރޭގައި ހިމެނެނީ:

• ކޮންވެންޝަން ސެންޓަރު ތަރައްޤީކުރުން: 2،000 މީހުންގެ ޖާގައިގެ ސެންޓަރަކަށް ބަދަލުކުރުމަށް 15-20 މިލިއަން ރުފިޔާގެ މަޝްރޫޢެއް. އިންވެސްޓަރަށް 50-100 ކޮޓަރީގެ ހޮޓަލެއް އެޅުމަށް ހިލޭ ބިން ދޫކުރުމަށް ވަނީ ހަމަޖެހިފައެވެ.
• އައްޑޫ ނޭޗަރ ޕާކު ތަރައްޤީކުރުން: 400 ހެކްޓަރުގެ މި ސަރަޙައްދުގައި އީކޯ ޓޫރިޒަމާއި އެކޮމޮޑޭޝަން ހިމެނޭހެން 5 މިލިއަން ރުފިޔާގެ މަޝްރޫޢެއް ކުރިއަށް ގެންދިއުން.
• ދިގިރަށް ޕްރައިވެޓް ބީޗް ކްލަބް: ޓޫރިސްޓުންނަށް ޚާއްޞަކޮށްގެން ފޭދޫ ކައިރީގައި 2.5 އިން 3 މިލިއަން ރުފިޔާގެ ޚަރަދަކާއެކު ބީޗް ކްލަބެއް ތަރައްޤީކުރުން.
• މިއުޒިއަމް އެންޑް ކަލްޗަރަލް ހެރިޓޭޖް ސެންޓަރު: އައްޑޫގެ ތާރީޚާއި ސަޤާފަތް ދައްކުވައިދޭ މަރުކަޒެއް 3 މިލިއަން ރުފިޔާގެ ބަޖެޓަކުން ޤާއިމުކުރުން.
• ހޯމް ސޯލާ އަދި ހައިބްރިޑް އެނާޖީ ސިސްޓަމް: އައްޑޫގެ 6،000 އެއްހާ ގޭބިސީއަށް އަމާޒުކޮށް، ބޭންކުތައް މެދުވެރިކޮށް ބެޓެރި ސްޓޯރޭޖާއެކު ސޯލާ ހަރުކުރުމުގެ 80 މިލިއަން ރުފިޔާގެ މަޝްރޫޢެއް.
• ވާރޭފެން ރައްކާކުރާ ނިޒާމު (Rainwater Harvesting): ހިތަދޫ ފުޓްބޯޅަ ދަނޑުގެ އަޑީގައި ސްޓޯރޭޖް ހަދައި، ދަނޑުވެރިކަމަށާއި ފެންފަށަލަ ހިމާޔަތްކުރުމަށް 45-50 މިލިއަން ރުފިޔާގެ ޚަރަދަކާއެކު ހިންގާ މަޝްރޫޢެއް.
• ކްލައިމެޓް ޗޭންޖް އެންޑް މެރިން ރިސާޗް ފެސިލިޓީ: ޔުނެސްކޯ ބަޔޮސްފިއަރ ރިޒާވެއްގެ ގޮތުގައި އޮތް އައްޑޫގައި ތިމާވެށީގެ ދިރާސާތަކަށް ޚާއްޞަ މަރުކަޒެއް ހެދުމަށް ހިލޭ ބިން ދިނުން.
• ގްރީން ވޭސްޓް ކޮމްޕޯސްޓިންގ ފެސިލިޓީ: ދުވާލަކު އުފެދޭ 2-3 ޓަނުގެ ގަސްގަހާގެހީގެ ކުނިން ގަސްކާނާ އުފެއްދުމަށް 18،000 އަކަފޫޓުގެ ބިމެއް ހިލޭ ދީގެން ހިންގާ މަޝްރޫޢެއް.

މޭޔަރު ނިޒާރު ވިދާޅުވީ، މި މަޝްރޫޢުތަކަކީ އައްޑޫގެ ތިމާވެއްޓާއި އިޤްތިޞާދަށް ބޮޑު ނަފާއެއް ލިބޭނެ ކަންކަން ކަމަށާއި، މިކަންކަމަށް އިންވެސްޓްކުރަން ބޭނުންވާ ފަރާތްތަކަށް ކައުންސިލުން ފުރިހަމަ އެއްބާރުލުމާއި ހިލޭ ބިން ދޫކުރުމުގެ ފުރުޞަތު ހުޅުވިފައިވާ ކަމަށެވެ.