ކުޅުދުއްފުށީ ސިޓީ ކައުންސިލުން "ގޭދޮށު އިންޖީނުގެ" މަޝްރޫޢު އިންވެސްޓަރުންނަށް ހުށަހަޅައިފި

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ތިން ދުވަހުގެ މުއްދަތަކަށް ބާއްވަމުން ގެންދަވާ "އެމްޑީޕީ ކޮންގްރެސް 2026 - ރަށްވެހި ތަރައްޤީ އިންވެސްޓްމެންޓް ފޯރަމް" ގައި ކުޅުދުއްފުށި ސިޓީ ކައުންސިލްގެ މި ދައުރުގެ މެނިފެސްޓޯގައި ހިމެނޭ "ގޭދޮށު އިންޖީނުގެ" (ނެއިބަރހުޑް ޕަވަރ ހައުސް) މަޝްރޫޢު ރަސްމީކޮށް އިންވެސްޓަރުންނަށް ހުށަހަޅައިފިއެވެ.

މި މަޝްރޫޢު ފޯރަމަށް ހުށަހަޅުއްވައި ވާހަކަދައްކަވަމުން ކުޅުދުއްފުށި ސިޓީގެ މޭޔަރ މުޙައްމަދު ޢާޠިފް ވިދާޅުވީ، ޑެޕިއުޓީ މޭޔަރ އަޙްމަދާއި ކައުންސިލަރުންނާ އެކު މިފަދަ މަޝްރޫޢެއް އެކުލަވާލަން ޖެހުނީ ރައްޔިތުންނަށް ބަރޯސާވެވޭ ހަކަތައެއް ނުލިބި، ކަރަންޓަށް ކުރަންޖެހޭ ހޭދަ އިންތިހާއަށް ބޮޑުވަމުންދާތީ ކަމަށެވެ. އަދި ލާމަރުކަޒީ ޤާނޫނުން ކައުންސިލްތަކަށް ޔުޓިލިޓީ ޚިދުމަތް ދިނުން ލާޒިމްކޮށްފައިވީ ނަމަވެސް، ފެނަކައިން ކައުންސިލާ އެކު އެއްބަސްވުމަކަށް އައުމަށް އިންކާރުކޮށްފައިވާ ކަމަށާއި، މި މައްސަލައިގައި ސިވިލް ކޯޓަށް ދިއުމުން ވެސް މައްސަލަ ނިމުނީ ކައުންސިލާ ދެކޮޅަށް ކަމަށްވާތީ ރައްޔިތުންނަށް އިތުރު ހައްލެއް ހޯދައިދިނުމަކީ މަޖުބޫރު ކަމެއް ކަމަށް މޭޔަރ ފާހަގަކުރެއްވިއެވެ.

މި މަޝްރޫޢުގެ ދަށުން އަމިއްލަ ގޭގޭގެ ފުރާޅުތައް ސޯލާ އަދި ހައިބްރިޑް ބެޓްރީ ސިސްޓަމް ހަރުކޮށްގެން ކުދި އިންޖީނުގެތަކަކަށް ބަދަލުކުރެވިގެންދާނެއެވެ. މީގެ ސަބަބުން އެ ގެއަކަށް ނުވަތަ އެ ބްލޮކަކަށް ބޭނުންވާ ކަރަންޓު އުފައްދައި، އިތުރުވާ ކަރަންޓު ވިއްކޭނެ އިންތިޒާމު ހަމަޖެހިގެންދާނެ ކަމަށް މޭޔަރ ވިދާޅުވިއެވެ.

މޭޔަރ ޢާޠިފް އިތުރަށް ހާމަކުރެއްވި ގޮތުގައި:

1. މި ނިޒާމު މަސައްކަތް ފަށާ ފުރަތަމަ ދުވަހުން ފެށިގެން ރައްޔިތުންގެ ކަރަންޓު ބިލުން %50 ކުޑަކުރެވިގެންދާނެއެވެ.
2. ޕްރޮޖެކްޓް ފަށާތާ 5 އަހަރު ފަހުން، ކުޑަ މެއިންޓަނަންސް ފީއެއް ފިޔަވައި ރައްޔިތުންނަށް ހިލޭ ކަރަންޓު ފޯރުކޮށްދެވޭނެއެވެ.
3. ކުޅުދުއްފުށީގެ 3,000 އަށް ވުރެ ގިނަ ގޭބިސީގެ ތެރެއިން 2,500 އަށް ވުރެ ގިނަ ގޭގެ ފުރާޅާއި، 400 އަށް ވުރެ ގިނަ ވިޔަފާރި ފުރާޅު މި މަޝްރޫޢަށް ލިބޭނެ ކަމަށް ލަފާކުރެވެއެވެ.
4. އިންވެސްޓަރުންނަށް ހުރިހާ ފުރާޅުތަކުގެ ސާވޭ އާއި ގޭބިސީތަކުގެ ކަރަންޓު ބޭނުންކުރާ މިންވަރުގެ ތަފްޞީލީ މަޢުލޫމާތު ފޯރުކޮށްދޭނެއެވެ.
5. މި މޮޑެލްގެ ދަށުން އިންވެސްޓް ކުރާ ފަރާތްތަކަށް 5 އަހަރު ދުވަހުގެ ތެރޭގައި ރަނގަޅު ފައިދާއެއް (ރިޓާން އޮން އިންވެސްޓްމެންޓް) ލިބިގެންދާނެއެވެ. އަދި އޭގެ ފަހުން މެއިންޓަނަންސް ބަލަހައްޓާނީ ކައުންސިލްގެ ލޯކަލް އޮތޯރިޓީ ކުންފުނިންނެވެ.

މި ފޯރަމް އިންތިޒާމްކޮށްދެއްވި ކަމަށްޓަކައި ޕާޓީގެ ޗެއަރ، ރައީސް މުޙައްމަދު ނަޝީދަށް މޭޔަރ ވަނީ ޝުކުރު އަދާކުރައްވާފައެވެ. އަދި މި މަޝްރޫޢަކީ އދ. ގެ ދެމެހެއްޓެނިވި ތަރައްޤީގެ ލަނޑުދަނޑިތައް (SDGs) ކަމަށްވާ ސާފު ހަކަތަ، ދެމެހެއްޓެނިވި ރަށްވެހިކަން، މޫސުމީ ފިޔަވަޅުތައް އަދި އިޤްތިޞާދީ ކުރިއެރުން ފަދަ މުހިންމު ލަނޑުދަނޑިތައް ހާސިލުކުރުމަށް މަގުފަހިވާނެ މަޝްރޫޢެއް ކަމަށާއި، މިކަމުގެ ސަބަބުން ނެޓް މީޓަރިންގ އުސޫލުގައި އޮތް ބަންދުން ރައްޔިތުން މިންޖުވެގެންދާނެ ކަމަށް ވެސް ކުޅުދުއްފުށި ސިޓީ ކައުންސިލުން ފާހަގަކުރެއެވެ.