ފުވައްމުލަކު ސިޓީގެ ތަރައްޤީއަށް މުހިންމު 9 މަޝްރޫޢެއް އިންވެސްޓްމަންޓް ފޯރަމްގައި ހުށަހަޅައިފި

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ބޭއްވި "އެމްޑީޕީ ކޮންގްރެސް 2026 - ރަށްވެހި ތަރައްޤީ އިންވެސްޓްމެންޓް ފޯރަމް" ގައި ފުވައްމުލައް ސިޓީގެ ތަރައްޤީއަށް އަމާޒުކޮށްގެން މުހިންމު 9 މަޝްރޫޢެއް އެ ސިޓީގެ މޭޔަރ އިސްމާޢިލް ރަފީޤު ހުށަހަޅުއްވައިފިއެވެ.

ކައުންސިލް މެންބަރުން ކަމަށްވާ ޝިރްހާން، ޢާއިޝާ، ޒާހިރު އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީ (ޑަބްލިއުޑީސީ) ގެ ރައީސާ ޝިވް އާއެކު މި ފޯރަމްގައި ބައިވެރިވެވަޑައިގެން ވާހަކަދައްކަވަމުން މޭޔަރ އިސްމާޢިލް ރަފީޤު ވިދާޅުވީ، ރަށުގެ ތަރައްޤީއަށް ގޮންޖެހުންތައް ހުރި މިފަދަ ދަނޑިވަޅެއްގައި މިފަދަ ފޯރަމެއް އިންތިޒާމުކޮށްދެއްވި ކަމަށްޓަކައި ޕާޓީގެ ލީޑަރޝިޕަށާއި ޗެއަރޕާސަނަށް ޝުކުރު އަދާކުރައްވާ ކަމަށެވެ. އަދި އިންވެސްޓަރުންނަށް ފުރުޞަތުތައް ހުޅުވާލުމަކީ ސިޓީގެ ތަރައްޤީއަށް ނުހަނު މުހިންމު ކަމެއް ކަމަށް ފާހަގަކުރެއްވިއެވެ.

މޭޔަރ ފާހަގަކުރެއްވި ގޮތުގައި ފުވައްމުލަކަކީ ވައިގެ މަގުންނާއި ކަނޑުމަގުން އަދި ޑިޖިޓަލްކޮށް އެންމެ ބޮޑަށް ގުޅާލެވިފައިވާ އެއް ސިޓީއެވެ. އެގޮތުން މިދިޔަ އަހަރު 8،000 ފަތުރުވެރިން އަދި މިއަހަރުގެ މިހާތަނަށް 5،600 ފަތުރުވެރިން އެ ސިޓީއަށް ޒިޔާރަތްކޮށްފައިވާއިރު، 27 ގެސްޓްހައުސްއާއެކު 408 އެނދުގެ ޖާގަ އެބައޮތް ކަމަށް ވިދާޅުވިއެވެ.

ފޯރަމްގައި ފުވައްމުލަކު ސިޓީ ކައުންސިލުން ހުށަހެޅި މައިގަނޑު މަޝްރޫޢުތަކުގެ ތެރޭގައި ހިމެނެނީ:

• އޮތެންޓިކް ފޯމިއުލާ (ލޯކަލް އުފެއްދުންތައް ޕެކެޖްކުރުން): ރަށުގައި އުފައްދާ ތަކެތި ޕްރޮސެސްކޮށް، ފެންވަރު ރަނގަޅުކޮށް ޕެކޭޖްކޮށްގެން ރާއްޖެއިން ބޭރަށާއި ޑިއުޓީ ފްރީއަށް ވިއްކުމުގެ ފުރުޞަތު.
• މިކްސްޑް-ޔޫސް ސްޕޯޓްސް އެންޑް ކޮމިއުނިޓީ ކޮމްޕްލެކްސް: ޤައުމީ ޓީމުތަކާއި ކްލަބްތަކަށް ކޭމްޕް ކުރެވޭނެ އިންތިޒާމާއި، އޮޑިޓޯރިއަމް، ކޮންފަރެންސް ފެސިލިޓީ އަދި ވިޔަފާރި ޖާގަ ހިމެނޭ ތަނެއް ތަރައްޤީކުރުން.
• ރެޒިޑެންޝަލް އެންޑް ކޮމާޝަލް އިމާރާތްތައް: ފުވައްމުލަކުން 'ސެކަންޑް ހޯމް' ބޭނުންވާ ފަރާތްތަކަށް އަމާޒުކޮށް މަދުވެގެން 100 އެޕާޓްމަންޓް ޔުނިޓް ތަރައްޤީކުރުން.
• މެރިން ރިސާޗް ސެންޓަރާއި މެރިން މިއުޒިއަމް: ފުވައްމުލަކަކީ ފާހަގަކޮށްލެވޭ މިޔަރުގެ މަންޒިލަކަށް ވާތީ، ދުނިޔޭގެ ޔުނިވަރސިޓީތަކަށް ދިރާސާ ކުރެވޭނެ ލެބޯޓްރީއަކާއި އެކޮމޮޑޭޝަން އަދި މިއުޒިއަމެއް އެޅުން.
• ވެޓްލޭންޑް އިކޯ-ޓޫރިޒަމް: ނޭޗަރ ޕާކު ސަރަޙައްދު އިތުރަށް ތަރައްޤީކޮށް ޒިޕްލައިން، ކެނޮޕީ ވޯކް އަދި ކޭމްޕިންގ ސައިޓްތައް ހެދުން.
• ބޮޓެނިކަލް ގާޑަން: ބަޓަރފްލައި އަދި ޑްރެގަންފްލައި ގާޑަން ހިމެނޭހެން ޤުދުރަތީ ވެށި ދައްކުވައިދޭ ބަގީޗާއެއް ހެދުން.
• ހޯމް ސޯލާ ޕްރޮގްރާމް: ގާތްގަނޑަކަށް 2،700 ގޭބިސީ ހިމެނޭ ރަށުގައި އިންސްޓޯލްމަންޓް އުޞޫލުން ގޭގޭގެ ފުރާޅުގައި ސޯލާ ހަރުކުރުމުގެ ފުރުޞަތު އިންވެސްޓަރުންނަށް ހުޅުވާލުން.
• ވޭސްޓް ވޯޓާ ޕްރޮސެސިންގ: ނަރުދަމާއިން ބޭރުވާ ފެން ސާފުކޮށް ދަނޑުވެރިކަމަށް ބޭނުންކުރުމާއި، ކައުންސިލްގެ އޯގަނިކް ވޭސްޓް މެޝިނާ ގުޅުވައިގެން ގަސްކާނާ އުފެއްދުން.
• ކާބަން ކްރެޑިޓް ޕްރޮޖެކްޓް: ރަށުގެ ފެހިކަމާއި ޗަކަބިންތަކުގެ ބޭނުން ހިފައި، ބެމްބޫ (އޮނު) އިންދައިގެން ކާބަން ސްޓޯރޭޖް ދިރާސާކޮށް، ކާބަން ކްރެޑިޓް ވިއްކުން.

މޭޔަރ އިސްމާޢިލް ރަފީޤު ވިދާޅުވީ، ކައުންސިލުން މި މަޝްރޫޢުތައް ކުރިއަށް ގެންދަން ބޭނުންވަނީ ޕަބްލިކް-ޕްރައިވެޓް ޕާޓްނަރޝިޕް (ޕީޕީޕީ) މޮޑެލްގެ ދަށުން ކަމަށެވެ. އެގޮތުން ކައުންސިލްގެ އިކުއިޓީއެއްގެ ގޮތުގައި ބިން ހަމަޖައްސައިދީ، ހުއްދަތައް ހޯދުމާއި ފީޒިބިލިޓީ މަސައްކަތްތަކުގައި ފުރިހަމަ އެއްބާރުލުން ދެއްވާނެ ކަމަށް ވިދާޅުވިއެވެ. އަދި މި މަޝްރޫޢުތަކަށް ޝައުޤުވެރިވާ ފަރާތްތަކަށް އެކްސްޕްރެޝަން އޮފް އިންޓްރެސްޓް (އީއޯއައި) ހުށަހެޅުމުގެ ފުރުޞަތު ކުރިއަށް އޮތްތަނުގައި ހުޅުވާލާނެ ކަމަށްވެސް މޭޔަރ ހާމަކުރެއްވިއެވެ.