މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއި ބެހޭ ވަޒީރު، ޑރ. މަރްޔަމް މާރިޔާ "ދާލަން: ނެޝަނަލް ސްކިލްސް އެންޑް ކެރިޔަރ އެކްސްޕޯ 2024" އިފްތިފާޙްކުރުމުގެ ރަސްމިއްޔާތު ޝަރަފުވެރިކޮއްދެއްވައިފިއެވެ.
މި ރަސްމިއްޔާތުގައި، މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓްގެ ފަރާތުން މިނިސްޓަރ ޑރ.މަރްޔަމް މާރިޔާގެ އިތުރުން ދިވެހިބަހާއި ސަޤާފަތާއި ތަރިކައާއި ބެހޭ ވަޒީރު، އާދަމް ނަސީރު، ތިމާވެއްޓާއި ހަކަތާއި ބެހޭ ވުޒާރާގެ ވަޒީރު، ތާރިގު އިބްރާހިމް އަދި ދަނޑުވެރިކަމާއި ބެހޭ ވަޒީރު އައިޝަތު ރަމީލާ ވަނީ ބައިވެރިވެވަޑައިގަންނަވާފައެވެ.
ދާލަން އެކްސްޕޯއާ ބެހޭގޮތުން އަސްލު ޓީވީގެ "ކޮންތާކު ކޮންކަމެއް" ޕްރޮގްރާމްގައި ވާހަކަ ދައްކަވަމުން ހަޔަރ އެޑިއުކޭޝަންގެ ސްޓޭޓް މިނިސްޓަރު ފާތިމަތު މުހައްމަދު ވިދާޅުވީ މިފަދަ ހަރަކާތެއްގެ މައިގަނޑު މަގްސަދަކީ މަތީ ތައުލީމު އުނގެނުމަށް ހުރި ފުރުސަތުތަކާއި، އެކި ދާއިރާތަކުން ހުރި އެކިކަހަލަ ސްކިލްޑް ބޭސްޑް، ނުވަތަ ހުނަރާބެހޭ މައުލޫމާތު ކުދިންނަށް ފޯރުކޮށްދިނުން ކަމަށެވެ.
ވަޒީފާގެ ބާޒާރުގައި ކުދިންނަށް ހުރީ ކޮންކަހަލަ ފުރުސަތުތަކެއްތޯ ކިހިނެއްތޯ އެކުދިން ކެރިޔަރ ނޫނީ ފިއުޗަރ ގައި އެކުދިން ކުރިޔަށް ދާން ބޭނުންވަނީ މިއީ މައިގަނޑު މަގްސަދަކީ. ފާތިމަތު މުހައްމަދު ވިދާޅުވި.
މިއެކްސްޕޯ ކުރިޔަށް ގެންދިޔުމަށް ހަމަޖެހިފައިވަނީ މިމަހުގެ 15 އިން 16ގެ ނިޔަލަށް ހުޅުމާލޭ ސެންޓްރަލް ޕާކުގައެވެ. އެކްސްޕޯ ކުރިޔަށްދާނީ މި ދެދުވަހުގެ 16:00 އިން 18:00 އަށް އަދި ރޭނަގޑު 20:00 އިން 22:00 އަށެވެ.
ދާލަން އެކްސްޕޯ އިފްތިފާޙްކުރުމުގެ އިތުރުން، މި ރަސްމިއްޔާތުގައި މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓްގެ ފަރާތުން ވަނީ "ހަފްތާ 52" ފޮތް ތަޢާރަފްކޮށްދެއްވާފައެވެ.
