ވޭމަންޑޫ ބިން ހިއްކުމުގެ އަމަލީ މަސައްކަތް ފަށައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަވަޑައިގެންނެވި ވަޢުދާ އެއްގޮތަށް، ތ. ވޭމަންޑޫ ބިން ހިއްކުމުގެ ޢަމަލީ މަސައްކަތް ރަސްމީކޮށް ފަށައިފިއެވެ.

2025 ވަނަ އަހަރުގެ ސެޕްޓެމްބަރު މަހުގެ 24 ވަނަ ދުވަހު ރައީސުލްޖުމްހޫރިއްޔާ ވޭމަންޑޫއަށް ކުރެއްވި ދަތުރުފުޅުގައި، އެ ރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި، ވޭމަންޑޫ ބިން ހިއްކުމުގެ މަޝްރޫޢު ކުރިއަށް ގެންދެވާނެ ކަމުގެ ޔަޤީންކަން ދެއްވިއެވެ. އަދި، ހަމަ އެ ދަތުރުފުޅުގައި ބޭއްވެވި ރަސްމިއްޔާތެއްގައި، ބިން ހިއްކުމާއި ބަނދަރު ތަރައްގީ ކުރުމުގެ މަސައްކަތް ރަސްމީކޮށް ޙަވާލުކުރެވުނީ އެމްޓީސީސީއާ ކަމުގައިވެއެވެ.

މި މަޝްރޫޢުގެ މަސައްކަތް ކުރިއަށްދާ ކަން ރައީސުލްޖުމްހޫރިއްޔާ ހާމަކުރެއްވީ، އެކްސް ގައި ހިއްސާކުރެއްވި ފޮޓޯ އެއް މެދުވެރިކޮށެވެ.

1،270 މީހުންގެ އާބާދީއެއް ދިރިއުޅޭ ވޭމަންޑޫގެ ބިން ހިއްކުމުގެ މަސައްކަތް ނިމިގެންދިއުމާ އެކު، ރައްޔިތުންނަށް ދޫކުރެވޭ ގޯތީގެ ޖާގަ ތަނަވަސްވެ، ބޯހިޔާވަހިކަމުގެ ދަތިކަމަށް ލުޔެއް ލިބިގެންދާނެ ކަމަށް ލަފާ ކުރެވެއެވެ.

މީގެ އިތުރުން، ރަށުގެ އިޤްތިޞާދީ ހަރަކާތްތައް ފުޅާވެ، ތަރައްޤީގެ އިތުރު ދޮރުތައް ހުޅުވިގެންދާނެ ކަމަށް ވެސް ބެލެވެއެވެ.