ޕާކިސްތާނުގެ ހުޅަނގުއުތުރުގައިވާ ޚައިބަރް ޕަޚްތުންޚްވާ ޕުރޮވިންސަށް ބޯކޮށް ވާރޭވެހި ފެންބޮޑުވުމާ ގުޅިގެން ހިނގި ހާދިސާތަކެއްގައި 25 މީހުން މަރުވެއްޖެއެވެ. ފެންބޮޑުވުމުގެ އަސަރު އެންމެ ބޮޑަށް ކޮށްފައި ވަނީ އެ ޕުރޮވިންސުގެ ބަންނޫ، ލައްކީ މަރްވަތް އަދި ކަރަކް ޑިސްޓްރިކްޓަށެވެ. ބޯ ވާރެޔާއެކު އެ ސަރަޙައްދަށް ހޭލް ނުވަތަ ގަނޑުފެން ވެސް ފައިބާފައިވާ ކަމުގައި އޮފިޝަލުން ވިދާޅުވެއެވެ.
ފެންބޮޑުވުމާ ގުޅިގެން ބައެއް ސަރަޙައްދުތަކުގައި ގިނަ ޢަދަދެއްގެ ގެދޮރު ވަނީ ވެއްޓިފައެވެ. މި ހާދިސާތަކުގައި 145 އަށްވުރެ ގިނަ މީހުން ޒަޚަމުވެފައިވާ ކަމުގައި އެ ޕުރޮވިންސުގެ އޮފިޝަލެއް ކަމުގައިވާ ޚަތީރް އަޙްމަދު ވިދާޅުވިއެވެ. އަދި، ވައިގަދަވުމުގެ ސަބަބުން ގަސްތައް ވެއްޓި ކަރަންޓުގެ ޚިދުމަތްދިނުމަށް ބޭނުންކުރާ ޓްރާންސްފޯމަރުތަކާއި ޓަވަރުތަކަށް ވަނީ ބޮޑެތި ގެއްލުންތަކެއް ލިބިފައެވެ.
މި ހާދިސާތަކުގައި ޒަޚަމުވި މީހުންނަށް އެހީތެރިކަން ފޯރުކޮށްދޭން މަސައްކަތް ކުރަމުންދާ ކަމުގައި އޮފިޝަލުން ވިދާޅުވެއެވެ. ހުސްވި މޭ މަހުގެ ތެރޭގައި ބޯކޮށް ސްނޯ ފޭބުމާ ގުޅިގެން ކުރިމަތިވި އައިސް ފޭބުމުގެ ހާދިސާއެއްގައި ވެސް އެ ސަރަޙައްދުން ގިނަ ޢަދަދެއްގެ މީހުން ވަނީ މަރުވެފައެވެ. އޭގެ ތެރޭގައި އަންހެނުންނާއި ކުޑަކުދިން ހިމެނެއެވެ.
ފެންބޮޑުވުމާ ގުޅިގެން ގިނަ ޢަދަދެއްގެ ބަޔަކު މަރުވުމުން ޕާކިސްތާނުގެ ބޮޑުވަޒީރު ޝެހެބާޒް ޝަރީފް ވަނީ ހިތާމަ ފާޅުކުރައްވާފައެވެ. އަދި، މަރުވި މީހުންގެ ޢާއިލާތަކަށް ތަޢުޒިޔާ ދަންނަވާފައެވެ. އޭނާ ވަނީ ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމުގެ މަސައްކަތްތައް އިތުރަށް ހަރުދަނާ ކުރުމަށް ވެސް ގޮވައިލައްވާފައެވެ.
ޕާކިސްތާނުގެ ހުޅަނގުއުތުރުގެ ސަރަޙައްދުތަކަށް މޫސުން ގޯސްވެފައި މި ވަނީ ޢަރަބި ކަނޑުގައި އުފެދިފައިވާ ބާރުގަދަ ތޫފާން ބިޕާރްޖޯއިގެ ސަބަބުންނެވެ. އެ ތޫފާނާ އެކު ގަޑިއަކު 150 ކިލޯމީޓަރަށް ވައިބާރުވެފައިވާ ކަމުގައި މޫސުމާ ބެހޭ އިދާރާތަކުން ބުނެއެވެ. ޕާކިސްތާނުގެ ދެކުނުގެ ސަރަޙައްދުތަކާ ދިމާލަށް ތޫފާން ބިޕާރްޖޯއި ދަތުރުކުރަމުންދާ ކަމުގައި އެ ޤައުމުގެ ކާރިސާތަކާ ބެހޭ އިދާރާއިން ބުނެއެވެ.
