ޕާކިސްތާނުގެ ކުރީގެ ބޮޑުވަޒީރު އިމްރާން ޚާން ހައްޔަރު ކޮށްފިއެވެ.
ޕާކިސްތާނުގެ މީޑިއާތަކާ ހަވާލާދީ ބޭރުމީޑިއާތަކުން ބުނެފައިވަނީ، އިމްރާން ޚާން ހައްޔަރު ކޮށްފައިވަނީ އިސްލާމްއާބާދުގައި ހުރި ކޯޓަކަށް ހާޒިރުވުމުންނެވެ.
އިމްރާން ޚާން ކޯޓަށް ހާޒިރުވެފައިވަނީ އުފުލާފައިވާ ކޮރަޕްޝަންގެ ދައުވާއަކާ ގުޅިގެންނެވެ. އެ ދައުވާއަކީ ސިޔާސީ ގޮތުން އުފުލާފައިވާ ދައުވާއެއްކަމަށް އިމްރާން ޚާން ނިސްބަތްވާ ޕާޓީން އަންނަނީ ބުނަމުންނެވެ.
اسلام آباد عدالتی پیشی کیلئے روانگی سے قبل چیئرمین تحریک انصاف کا خصوصی پیغام
— PTI (@PTIofficial) May 9, 2023
آئی ایس پی آر کی پریس ریلیز پر خصوصی ردعمل #BehindYouSkipper pic.twitter.com/NtrcUSrwwY
ރިޕޯޓްތައް ބުނާ ގޮތުން އިމްރާން ހިފަހައްޓާފައި ވަނީ ކޯޓު ކޮމްޕައުންޑަށް ވަނުމަށް ފަހު ހަތިޔާރު އަޅައިގެން ތިބި ފުލުހުންނެވެ.
އިމްރާން ހާންގެ މައްޗަށް ޕާކިސްތާން ސަރުކާރުން ކުރަނީ 50 ބިލިއަން ރުޕީސްގެ ކޮރަޕްޝަންގެ ތުހުމަތެކެވެ. އިމްރާން ހާން ވަނީ އޭނާގެ ވެރިކަމުގެ ދުވަސްވަރު ރިއަލްއެސްޓޭޓް ކުންފުންޏަކުން ގިނަ އަދަދެއްގެ ފައިސާ ނަގައި އެފައިސާ އިނގިރޭސިވިލާތުގެ ބޭންކްތަކެއްގައި ޖަމާކުރަން މަނީލޯންޑާ ކޮށްފައި ކަމަށް ޕާކިސްތާން ސަރުކާރުން ބުނެއެވެ.
އިމްރާން ހާން ހައްޔަރު ކުރުމުގެ ކުރިން ރެކޯޑް ކޮށްފައިވާ ވީޑިއޯ މެސެޖެއްގައި އޭނާ ވިދާޅުވީ ޖަލަށް ދާން އޭނާ ހުރީ ތައްޔާރަށް ކަމަށާއި، ފުލުހުންނާއި ސިފައިން ފޮނުވައިގެން އޭނާ ހައްޔަރު ނުކުރި ނަމަވެސް އަމިއްލައަށް ފުލުހުންނާއި ހަވާލުވާނެ ކަމަށެވެ.
އިމްރާން ޚާން ބޮޑުވަޒީރު ކަމުން ދުރުކުރީ މިދިޔަ އަހަރުގެ އޭޕްރިލް މަސް ތެރޭގައެވެ.
އިމްރާން ޚާން ބޮޑުވަޒީރުކަމުން ދުރުކުރީ އިތުބާރު ނެތް ކަމުގެ ވޯޓެއް ނެގުމަށްފަހު 2022 ވަނަ އަހަރުގެ އޭޕްރިލް ގައެވެ. އޭގެފަހުން މިދިޔަ އަހަރު ނޮވެމްބަރު މަހުގެ ތެރޭގައި އިމްރާން ހާންގެ ހަށިކޮޅަށް ބަޑީގެ ހަމާލާއެއް ދީފައިވެއެވެ.
