ބޭންކް އޮފް މޯލްޑިވްސް (ބީއެމްއެލް)ގެ ޗީފް އެގްޒެކެޓިވް އޮފިސަރގެ މަގާމަށް މުޙައްމަދު ޝަރީފް އައްޔަންކޮށްފިއެވެ.
މިއީ އެ ބޭންކުގެ ސީއީއޯގެ މަގާމަށް ދިވެހި ރައްޔިތަކު އައްޔަނުކުރި ފުރަތަމަ ފަހަރެވެ.
ބޭންކް އޮފް މޯލްޑިވްސްއިން ހާމަކުރި ގޮތުގައި ޝަރީފް މަގާމާ ހަވާލުވެވަޑައިގަންނަވާނީ މާދަމާއިން ފެށިގެންނެވެ. އަދި އެ މަގާމަށް ފުރަތަމަ ފަހަރަށް ދިވެއްސަކު އައްޔަން ކުރުމަކީ ރާއްޖޭގެ ބޭންކިން ދާއިރާގައި ހާސިލް ކުރެވުނު މުހިންމު ލަނޑުދަނޑިއެއް ކަމަށް ވެސް ބީއެމްއެލްއިން ވަނީ ބުނެފައެވެ.
1995 ގައި އެބޭންކާ ގުޅިވަޑައިގަތުމަށްފަހު ބީއެމްއެލްގައި 25 އަހަރަށް ވުރެ ގިނަ ދުވަހު ހިދުމަތް ކުރެއްވުމަށް ފަހު ޑެޕިއުޓީ ސީއީއޯގެ މަގާމުގައި ހުންނެވި ޝަރީފް އިސްތިއުފާ ދެއްވީ ފެބުރުއަރީ 2020ގައެވެ.
ބީއެމްއެލް އިން ވަކިވެވަޑައިގަތުމަށް ފަހު، އޭނާ ވަނީ އެގްޒެކްޓިވް މަގާމުތަކާއި ކޮންސަލްޓެންޓެއްގެ ގޮތުގައި ޕްރައިވެޓް ސެކްޓަރގައި މަސައްކަތްކުރައްވައިފައެވެ.
ބީއެމްއެލްގެ ސީއީއޯގެ މަގާމު ހުސްވީ، ކުރިން އެ މަގާމުގައި ހުންނެވި ކާލް ސްޓުމްކަ މިދިޔަ މަހުގެ 9 ވަނަ ދުވަހު މަގާމުން އިސްތިއުފާ ދެއްވުމުންނެވެ. އެއާ އެކު، ސީއީއޯގެ މަގާމަށް ބޭފުޅަކު ހޯދަން ބޭންކުން އިއުލާންކުރީ މިދިޔަ މަހުގެ 22 ވަނަ ދުވަހުގައެވެ.