އިންޓަރެކްޓިވް މިއުޒިއަމް މިއަހަރު ހުޅުވަން މަސައްކައްކުރަނީ

މާލޭގައި އަލަށް ތަރައްޤީކުރާ އިންޓަރެކްޓިވް މިއުޒިއަމްގެ މަސައްކަތް މިއަހަރުގެ ނިޔަލަށް ނިންމާލުމަށް އަމާޒު ހިފާފައިވާކަމަށް ވަޒީރު އާދަމް ނަޞީރު އިބްރާހީމް ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވުނު މީޑިއާ ބްރީފިންގްއެއްގައި، ދިވެހިބަހާއި ސަޤާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ވަނީ އެ މިނިސްޓްރީން މިއަހަރު ތެރޭގައި ކުރިއަށް ގެންދިއުމަށް ނިންމާފައިވާ މުހިންމު މަޝްރޫޢުތަކުގެ ތަފްސީލުތައް ހާމަކުރައްވަމުން ފާހަގަކުރެއްވި ގޮތުގައި، ރާއްޖޭގެ އިޤުތިސާދާއި ފަތުރުވެރިކަމުގެ ދާއިރާ ފުޅާކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ތަޞައްވުރުގެ ދަށުން، ތަރިކައިގެ މައްޗަށް ބިނާވެފައިވާ ފަތުރުވެރިކަން ތަޢާރަފްކޮށް ކުރިއެރުވުމަށް އެ ވުޒާރާއިން އަންނަނީ ގިނަގުނަ މަސައްކަތްތަކެއް ކުރަމުންނެވެ.

އެގޮތުން މާލޭގައި ތަރައްޤީކުރާ އިންޓަރެކްޓިވް މިއުޒިއަމްގެ ޢަމަލީ މަސައްކަތް މިހާރު ކުރިއަށްދާކަން ފާހަގަކުރައްވާ ވަޒީރު ވިދާޅުވީ، އުއްމީދުކުރައްވަނީ އެ މަޝްރޫޢުގެ މަސައްކަތް މިއަހަރުތެރޭ އެއްކޮށް ނިންމާލުމަށްކަމަށެވެ.

މިއީ ރާއްޖޭގެ ތާރީޚުގައިވެސް ބިނާކުރެވޭ ފުރަތަމަ އިންޓަރެކްޓިވް ދާރުލްއާސާރެވެ.

މި މިއުޒިއަމްގެ ތެރެއިން ޒަމާނީ ޓެކްނޮލޮޖީގެ އެހީގައި ދިވެހިން މި ކަނޑުގައި ވޭތުކުރި 4000 އެއްހާ އަހަރުގެ ތާރީޚާއި ތަޖުރިބާތައް ފެނިގެންދާނެއެވެ.

މި މަޝްރޫޢަކީ ރައީސުލްޖުމްހޫރިއްޔާގެ އިޤުތިސާދު ސިންތަފާތުކުރުމާއި ތަރިކައިގެ ފަތުރުވެރިކަން ކުރިއެރުވުމުގެ ސިޔާސަތުގެ ދަށުން ކުރިއަށްދާ މަސައްކަތެކެވެ.

މި މިއުޒިއަމް ތަރައްޤީކުރަނީ އުސްގެކޮޅާއި ކަޅުވަކަރު މިސްކިތް ހިމެނޭ ސަރަޙައްދުގައި، އީޖާދީ ވަސީލަތްތަކާއެކުގައެވެ.