އައްޑޫ ސިޓީ ތަރައްގީ ނުކުރާ ވާހަކަ ދައްކަން މޭޔަރު ނިޒާރު ލަދުވެތިވާންޖެހޭ: އައިބީ

މި ސަރުކާރަށް އައްޑޫ ސިޓީ ތަރައްގީ ނުކުރެވޭ ވާހަކަ ދައްކަން އެ ސިޓީގެ މޭޔަރު އަލީ ނިޒާރު ލަދު ގަންނަން ޖެހޭ ކަމަށް ރައްޔިތުންގެ މަޖިލީހުގެ ފޭދޫ ދެކުނު ދާއިރާގެ މެމްބަރު އިބްރާހީމް ދީދީ އައިބީ ވިދާޅުވެއްޖެއެވެ.

ލޯކަލް ކައުންސިލް އިންތިހާބުގެ އައްޑޫ ސިޓީގެ ގްރޭޓަރ މާލެ ޖަގަހަ ހުޅުވުމުގެ ރަސްމިއްޔާތުގައި ވާހަކަ ދައްކަވަމުން އައިބީ ވިދާޅުވީ 400 އެތައް މުވައްޒަފުން މޭޔަރު ނިޒާރަށް އައްޑޫ ސިޓީ ތަރައްގީކުރަން ދީފައިވާ ކަމަށެވެ.

އައިބީ ވިދާޅުވީ މާލެ ފިޔަވައި، އެންމެ ފުރަތަމަ ސިޓީއެއްގެ ދަރަޖަ ލިބިގެންދިޔަ އަތޮޅަކީ އައްޑޫ ކަމަށެވެ. އެހެންނަމަވެސް، އައްޑޫ ސިޓީއަށް ވުރެ ފަހުން ސިޓީއެއްގެ ދަރަޖަ ލިބުނު އެހެން ރަށްތައް ތަރައްގީ ވެގެން ދިޔަ މަންޒަރު ފެނިގެންދިޔަ ކަމަށާއި، އެއީ އެ ސިޓީގެ ކައުންސިލުގެ މެމްބަރުންނާއި މޭޔަރުގެ ނާގާބިލުކަމުގެ ނަތީޖާ ކަމަށް ވެސް އޭނާ ވިދާޅުވިއެެވެ.

އިދިކޮޅު އެމްޑީޕީގެ ކައުންސިލެއް އޮވެގެން އައްޑޫއަށް ކުރިއެރުމެއް ލިބިފައި ނުވާ ކަމަށް ވެސް އައިބީ ވިދާޅުވިއެވެ.

އައިބީ ވިދާޅުވީ އެމްޑީޕީގެ ސަރުކާރެއްގައި މޭޔަރުގެ ގޮތުގައި ހުންނެވި ނިޒާރު، އައްޑޫގެ ތަރައްގީއަށް މި ސަރުކާރުން މަސައްކަތް ނުކުރާ ކަމަށް ވިދާޅުވާން ލަދު ގަންނަން ޖެހޭ ކަމަށެވެ.

އައްޑޫގެ މޭޔަރު ކަމަށް ވާދަ ކުރައްވަވާ ޕީއެންސީ ކެންޑިޑޭޓް މުޝްރިފްގެ ތަސައްވުރެއް އެބައޮތް ކަމަށާއި، އެއީ ”ގްރޭޓަރ އައްޑޫ ކަން ފާހަގަކުރައްވައި އައިބީ ވިދާޅުވީ ތަރައްގީ ގެނައުމަށްޓަކައި، ޕީއެންސީއަށް އައްޑޫގެ މެޖޯރިޓީން ދޭން ޖެހޭ ކަަމަށެވެ.

އައިބީ މިފަދައިން ވިދާޅުވެފައިވާއިރު އައްޑޫ އަށް ނިސްބަތްވާ ޕީއެންސީގެ އެހެން މަޖިލިސް މެމްބަރުންވެސް ދަނީ އައްޑޫ ސިޓީގެ ތަރައްގީގެ މަޝްރޫއުތައް ކުރިއަށް ގެންދިއުމަށް ޕީއެންސީ އަށް ލޯކަލް ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެޖޯރިޓީ ދިނުމަށް ގޮވާލަމުންނެވެ.