ވައިގެމަގުން އެތެރެކުރި 6.7 ކިލޯގެ މަސްތުވާތަކެތި އަތުލައިގެންފި

ވައިގެ މަގުން ރާއްޖެއަށް އެތެރެކުރަން އުޅުނު ގިނަ އަދަދެއްގެ މަސްތުވާތަކެތި މޯލްޑިވްސް ކަސްޓަމްސް ސަރވިސް އިން އަތުލައިގެންފިއެވެ.

ކަސްޓަމްސް އިން ބުނި ގޮތުގައި މި ތަކެތި އަތުލައިގަތީ މި މަހުގެ 3 ވަނަ ދުވަހު ވެލާނާ އިންޓަރނޭޝަނަލް އެއަރޕޯޓުންނެވެ. އެއަރޕޯޓުން ބަލައިފާސްކުރި މީހެއްގެ އަތުން ފެނުނު މި ތަކެތި ޓެސްޓު ކުރިއިރު، އެއީ މަސްތުވާތަކެތީގެ ބާވަތެއް ކަމަށްވާ ހަޝިޝް އޮއިލް ކަމަށް ވަނީ ދައްކާފައެވެ. މި މައްސަލައިގައި އަތުލައިގަތް ތަކެތީގެ ބަރުދަނުގައި 6.7 ކިލޯ ހުރިއިރު، އޭގެ އަގު 5.4 މިލިއަން ރުފިޔާއަށް ވުރެ ބޮޑުވާނެ ކަމަށް ކަސްޓަމްސް އިން ލަފާކުރެއެވެ.

ވޭތުވެދިޔަ ދޮޅު މަސް ދުވަހުގެ ތެރޭގައި ފުލުހުންނާއި ކަސްޓަމްސް ގުޅިގެން ހިންގި ހަރަކާތްތަކުގައި ޖުމްލަ 83.45 ކިލޯގެ މަސްތުވާތަކެތި ވަނީ އަތުލައިގަނެފައެވެ. މި ތަކެތީގެ ބާޒާރު އަގު ގާތްގަނޑަކަށް 72.2 މިލިއަން ރުފިޔާއަށް އަރައެވެ. މީގެ ތެރެއިން 72 ކިލޯގެ މަސްތުވާތަކެއްޗަކީ ރާއްޖެއަށް އެތެރެކުރަން އުޅެނިކޮށް ސީދާ ކަސްޓަމްސް އިން އަތުލައިގަތް ތަކެއްޗެވެ.

ކަސްޓަމްސްގެ މަސައްކަތްތައް ވަރުގަދަކޮށް، ކަނޑާއި ވައިގެ މަގުން ރާއްޖެއަށް މަސްތުވާތަކެތި އެތެރެކުރުން ހުއްޓުވުމަށް ގިނަ މަސައްކަތްތަކެއް ދަނީ ކުރަމުންނެވެ. އަދި ރާއްޖެއިން ބޭރުގައި ތިބެގެން މިފަދަ ތަކެތި ފޮނުވާ ފަރާތްތައް ހޯދައި ހުއްޓުވުމުގެ މަސައްކަތްވެސް މެދުކެނޑުމެއް ނެތި ކުރިއަށްދާކަން އެ މުއައްސަސާއިން ފާހަގަކުރެއެވެ.