ޣައްޒާގައި ލޭއޮހޮރުވުންބޮޑު ދުވަހެއް، ހަމަލާނުދޭ އެއްވެސްތަނެއްނެތް، މިއަދުގެ މިހާތަނަށް 62 މީހުން ޝަހީދުކޮށްލައިފި

އިސްތިއުމާރީ އިސްރާއީލުގެ އުދުވާނީ ބާރުތަކުން މުޅި ޣައްޒާއަށް ދެމުންގެންދާ ޓެރަރިސްޓު ހަމަލާތަކުގައި މިއަދު އިރު އެރިފަހުން މިހާތަނަށް 62 މީހުން ޝަހީދުކޮށްލައިފިއެވެ.

މި ހަމަލާތަކުގައި އިތުރު އެތައް ބަޔަކު ޒަޚަމްވެފައިވާ ކަމަށް، ޣައްޒާ ހެލްތު މިނިސްޓްރީން ބުނެއެވެ.

މިއަދުގެ މިހާތަނަށް ޝަހީދުކޮށްލާފައިވާ މީހުންގެ ތެރެއިން 37 މީހުންނަކީ ގާޒާ ސިޓީއަށް ދިން ހަމަލާތަކުގައި ޝަހީދުވެފައިވާ މީހުންނެވެ.

ގާޒާ ސިޓީގެ އިރުމަތީ މަންސޫރާ އަވަށުގައި އާންމުންގެ ބޮލަށް ބޮންއަޅާފައި ވާއިރު، ޚާން ޔޫނިސްއަށް މިއަދުވެސް ގެންދަނީ ވަރުގަދައަށް ބޮންއަޅަމުންނެވެ. މި ހަމަލާތަކުގައި މިހާތަނަށް އެތައް ކުޑަކުދީންނާއި އާންމުން ޝަހީދުވެފައިވާ ކަމަށް، ފަލަސްތީނު މީޑިއާ ވަސީލަތްތަކުން ބުނެއެވެ.

ޑްރޯން ބޭނުންކޮށްގެން އާންމުން ތިބި ޓެންޓްތަކަށް އަލިފާން ބޮން ވައްޓައި، ޓެންޓުތަކުގައި ހުޅުޖަހަމުންވެސް އެބަ ގެންދެއެވެ.

ރަފަހް ސިޓީގެ އުތުރުން އައްނަސްރު އަވަށަށް ޑްރޯން ހަމަލާއެއްދީ އެކަކު ޝަހީދުކޮށް އެތައްބަޔަކު ޒަޚަމްކޮށްލާފައި ވާއިރު، ރަފަހްގެ އައްޒުހޫރު އަވަށުގައި ހުރި އިންސާނީ އެހީ ފޯރުކޮށްދޭ މަޒުކަޒަކަށްވެސް ޓެރަރިސްޓުންވަނީ ބޮންއަޅައި ގޮއްވާލާފައެވެ.

ޚާން ޔޫނިސްގެ އިރުމަތީ ފަޅީގައި ހުރި ޝުޢުރަބް އާއިލާގެ ގެއަށް މިސައިލް ހަމަލާއެއްދީ އެ ގެއިން 17 މީހުން ޝަހީދުކޮށްލާފައި ވާއިރު، މި ހަމަލާގައި އިތުރު އެތައްބަޔަކު ޒަޚަމްވިއެވެ.

ހަތަރު ފަންގިފިލާއަށް ހަދާފައި ހުރި އެ ގެއަށް ޓެރަރިސްޓުން މިސައިލް ހަމަލާއެއް ދިންއިރު، އެގޭގައި ގިނައިން ތިބީ ކުޑަކުދިން ކަމަށާއި، އެގޭގައި ތިބި ކުދީންނާއި މީހުންގެ ތެރެއިން 90 އިންސައްތަ މީހުންގެ ހަށިތައް ކުދިކުދި ވެގެން ގޮސްފައިވާ ކަމަށް އާންމުން ބުނެއެވެ.

އިމާރާތް އޮތީ ބިމާހަމަކޮށްލާފައެވެ.

ޣައްޒާގެ އުތުރުގައި އދގެ ރެފިއުޖީ އޭޖެންސީން ހިންގާ ކްލިނިކަކަށް އިއްޔެދިން ޓެރަރިސްޓު ހަމަލާގައި އެކަނިވެސް 22 މީހުން ޝަހީދުވެފައި ވެއެވެ. އިއްޔެ އެކަނިވެސް ޣައްޒާއިން 71 މީހުން ޝަހީދުކޮށްލާފައި ވެއެވެ.

ހަމަލާތައް ހުއްޓާލުމަށް ހަމާސްއާއެކު ވެފައިވާ އެއްބަސްވުން އުވާލައި، މާޗްމަހުގެ 18 ވަނަ ދުވަހުން ފެށިގެން އިސްތިއުމާރީ އިސްރާއީލުން ޣައްޒާގެ އާންމުންނަށް ދެމުންގެންދާ ހަމަލާތައް ވަރަށް ބޮޑަށް ފުޅާކޮށް އިތުރުކޮށްފައި ވެއެވެ.

އެގޮތުން، ޓެރަރިސްޓުންގެ މަތިންދާ ބޯޓުތަކުން ގެންދަނީ، ޣައްޒާގައި އާންމުން ދިރިއުޅޭ އިމާރާތްތަކަށާއި، އާންމުން ދިރިއުޅޭ ތަންތަނަށާއި، ގެދޮރު ހަލާކުވެ ހާލުގައި ޖެހިފައިވާ މީހުން ތިބި ތަންތަނަށާއި، އާންމުން ހިމާޔަތް ހޯދައިގެން ތިބި ތަންތަނަށާއި، ފޭލިގެ އަވަށްތަކަށްވެސް ބޮންއަޅަމުންނެވެ.

މި ހަމަލާތަކުގައި، މާޗް 18 ގެ ފަހުން މިހާތަނަށް ޣައްޒާއިން 1،160 މީހުން ޝަހީދު ކޮށްލާފައި ވާއިރު، އޭގެ ތެރޭގައި ގިނައީ ކުޑަކުދީންނާއި، އަންހެނުންނެވެ.