މާލޭގެ އެކި ސަރަޙައްދުތަކަށް ކުނި އެޅި ފަރާތްތައް ހޯދުމުގެ މަސައްކަތް ސިޓީ ކައުންސިލުން ފަށައިފި

މާލެ ސިޓީގެ އެކި ސަރަޙައްދުތަކުގެ މަގުމައްޗަށް ޤަވާޢިދާ ޚިލާފަށް ކުނި އަޅައި ބަހައްޓަމުންދާ މައްސަލަ ބޮޑުވެ، އެ އަމަލު ހިންގި ފަރާތްތައް ދެނެގަނެ ހޯދުމުގެ މަސައްކަތް މާލެ ސިޓީ ކައުންސިލުން ފަށައިފިއެވެ.

މިގޮތުން ވޭތުވެދިޔަ ވަގުތުތަކުގައި މާލޭގެ ތިން ސަރަޙައްދަކަށް ގިނަ އަދަދަކަށް ކުނި އަޅާފައިވާކަން ފާހަގަކުރެވިގެން އެކަން ކައުންސިލުން ވަނީ ސަމާލުކަމަށް ގެނެސްފައެވެ.

އެގޮތުން އަލަމާގޯޅި، މ. ނެއްލައިދޫ ކުރިމައްޗާއި، ހުވަފެނީ ގޯޅި، ގ. ޗާނދު ކައިރީގެ އިތުރުން މ. ގަޑިބުރު ކައިރީގައި ވެސް ޢާންމުންނަށް އުނދަގޫވާ ގޮތަށް ގިނަ އަދަދެއްގެ ކުނި ބަހައްޓާފައި ހުރި މަންޒަރު ފެންނަ ފޮޓޯތަކާއެކު މާލެ ސިޓީ ކައުންސިލުން މީސްމީޑިއާ މަންސަ "އެކްސް" ގައި ހިއްސާކުރި ޕޯސްޓުތަކެއްގައި ބުނެފައިވަނީ، މި ތަންތަނަށް ކުނި އެޅި ފަރާތްތައް ހޯދުމުގެ މަސައްކަތް މިހާރު ވަރަށް އިސްކަމެއް ދީގެން ކުރަމުންދާ ކަމަށެވެ.

އަދި ޤަވާޢިދާ ޚިލާފަށް މާލެ ސިޓީގެ މަގުތަކަށާއި ފަޅުތެރެއަށް ކުނި އަޅާ ފަރާތްތައް ފާހަގަކުރެވޭނަމަ، އެކަމުގެ ފޮޓޯ އަދި ވީޑިއޯ ސިޓީ ކައުންސިލްގެ ހޮޓްލައިން ނަންބަރު 9341144 އަށް ފޮނުވައި ދިނުމަށް ކައުންސިލުން ވަނީ ޢާންމު ރައްޔިތުންގެ ކިބައިން އެދިފައެވެ.

މީގެއިތުރުން މާލެ ސިޓީއަކީ ސާފުތާހިރު، ޗާލު އަދި ދިރިއުޅެން ހިތްފަސޭހަ ތަނަކަށް ހެދުމަށްޓަކައި މާލޭގެ ހުރިހާ ލޮބުވެތި ރައްޔިތުންގެ ފަރާތުން ފުރިހަމަ އެއްބާރުލުމާއި އެހީތެރިކަން ލިބުމަކީ ނުހަނު ބޭނުންތެރި ކަމެއް ކަމުގައިވެސް މާލެ ސިޓީ ކައުންސިލުން ވަނީ ފާހަގަކޮށްފައެވެ.