އަހާގެ 8 ވަނަ ފޯރަމް މިރޭ ބާއްވަނީ

މިނިސްޓަރުންނާ ސުވާލުކުރުމަށް ހާއްސަކޮށްގެން ސަރުކާރުން ކުރިއަށްގެންދާ އަހާ ފޯރަމްގެ 8 ވަނަ އެޕިސޯޑު މިރޭ ބޭއްވުމަށް ހަމަޖެހިއްޖެއެވެ.

ރައީސުލްޖުމްހޫރިއްޔާގެ އޮފީހާއި ޕީއެސްއެމް ގުޅިގެން ކުރިއަށްގެންދާ މި ފޯރަމްގެ މައިގަނޑު މަގްސަދަކީ ސަރުކާރުގެ އެކި ވުޒާރާތަކާއި އިދާރާތަކުން ކުރިއަށްގެންދާ މަސައްކަތްތަކުގެ މަޢުލޫމާތު ވީހާވެސް ތަފްޞީލުކޮށް ރައްޔިތުންނާ ހިއްސާކުރުމެވެ.

މިރޭގެ ފޯރަމްގައި ބައިވެރިވެވަޑައިގަންނަވާން ހަމަޖެހިފައިވާ ވަޒީރުންގެ ތެރޭގައި އިކޮނޮމިކް މިނިސްޓަރ މުހައްމަދު ސައީދު އާއި އެޓަރނީ ޖެނެރަލް އަހްމަދު އުޝާމްގެ އިތުރުން ޑިފެންސް މިނިސްޓަރ ހަސަން ރަޝީދު ހިމެނެއެވެ.

މި ފޯރަމްގައި ސީދާ ބައިވެރިވެގެން ސުވާލުކުރުމުގެ ފުރުސަތުގެ އިތުރުން، ފޯރަމް ކުރިއަށްދާ ވަގުތު ފޭސްބުކް، އެކްސް އަދި ޕީއެސްއެމްގެ އެއަރ އެޕް މެދުވެރިކޮށްވެސް ވަޒީރުންނަށް ސުވާލު ފޮނުވުމުގެ ފުރުސަތު ވަނީ ހުޅުވާލެވިފައެވެ.

އަހަރަކަށްވުރެ ގިނަ ދުވަހުގެ މެދުކެނޑުމަކަށްފަހު އަހާ ފޯރަމް އަލުން ފަށާފައިވަނީ މިދިޔަ މަހުގެ 27 ވަނަ ދުވަހުއެވެ.

އެންމެ ފަހުން ބޭއްވުނު އަހާ ފޯރަމްގައި ބައިވެރިވެވަޑައިގަތީ ޒުވާނުން ބާރުވެރިކުރުމާއި ބެހޭ ވަޒީރު އަލީ އިހްސާން އާއި ދާހިލީ ސަލާމަތާއި ފަންނިއްޔަތާއި ބެހޭ ވަޒީރު އަލީ އިހްސާންގެ އިތުރުން މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަހްމަދު ޝިޔާމް އެވެ.