އޭދަފުށީ މަގު ހެދުމުގެ ދެވަނަ ފިޔަވަހީގެ މަސައްކަތް ފަށަން އާރްޑީސީން ތައްޔާރުވެއްޖެ

ބ. އޭދަފުށީގެ މަގުތައް ޒަމާނީ ފެންވަރަށް ތަރައްޤީ ކުރުމުގެ ބޮޑު މަޝްރޫޢުގެ ދެވަނަ ފިޔަވަހީގެ އަމަލީ މަސައްކަތް ފެށުމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ފުރިހަމައަށް ތައްޔާރުވެއްޖެއެވެ.

ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) ގެ ދަށުން ކުރިއަށްގެންދާ މި މަޝްރޫޢާ ގުޅޭގޮތުން އާރްޑީސީން ބުނީ، މަސައްކަތް ފެށުމަށްޓަކައި ސައިޓު ތައްޔާރުކުރުމުގެ މަސައްކަތް މިހާރު ބާރުސްޕީޑެއްގައި ކުރިއަށްދާ ކަމަށެވެ. މި މަޝްރޫޢަކީ މިދިޔަ އަހަރުގެ މޭމަހުގެ ތެރޭގައި އެ ކުންފުންޏާ ހަވާލުކުރެވިފައިވާ މަސައްކަތެކެވެ.

މި ފިޔަވަހީގެ ދަށުން އޭދަފުށީގެ އިތުރު 5.3 ކިލޯމީޓަރުގެ މަގު ޒަމާނީ ފެންވަރަށް ތަރައްޤީކުރުމަށް ވަނީ ހަމަޖެހިފައެވެ. މި މަޝްރޫޢުގެ ދަށުން ކުރަން ނިންމާފައިވާ މައިގަނޑު މަސައްކަތްތަކުގެ ތެރޭގައި މަގުތަކުގައި ތާރު އެޅުމާއި، ހިނގާ މީހުންނަށް ޚާއްޞަ ދުވާރުތައް ހެދުމާއި، ފެންބޮޑުވުމުގެ މައްސަލައަށް ހައްލެއް ހޯދުމަށް ފެން ހިންދާ ނިޒާމް ޤާއިމްކުރުން ހިމެނެއެވެ. މީގެ އިތުރުން، ރޯޑް މާރކިން ޖެހުމާއި ޓްރެފިކް ސައިން ބޯޑްތައް ހަރުކުރުމުގެ މަސައްކަތްވެސް މި މަޝްރޫޢުގެ ތެރެއިން ކުރިއަށްދާނެއެވެ.

ޖުމްލަ 75.6 މިލިޔަން ރުފިޔާ ޚަރަދުކޮށްގެން ހިންގާ މި މަޝްރޫޢަކީ އޭދަފުށީގެ 3,500 އަށްވުރެ ބޮޑު އާބާދީއަށް ދަތުރުފަތުރުގެ ލުއިފަސޭހަކަން ހޯދައިދިނުމަށް ސަރުކާރުން އިސްކަންދެއްވައިގެން ކުރިއަށްގެންދަވާ މުހިންމު މަސައްކަތެކެވެ.

މި މަޝްރޫޢު ނިމުމުން، ރަށުގެ ރައްޔިތުންނަށް ދިމާވެފައިވާ މަގުތަކުގެ ދަތިކަމަށް ދާއިމީ އަދި ޒަމާނީ ހައްލެއް ލިބިގެންދާނެއެވެ.