ސީޕްލޭންގެ ދަތުރުތައް ވެލިދޫއަށް ފަށައިފި

ނ. ވެލިދުއަށް ގައުމީ އެއާލައިން، މޯލްޑިވިއަންގެ ސީޕްލޭން ދަތުރުތައް މިއަދު ފަށައިފިއެވެ.

ވެލިދޫއަށް ސީ ޕްލޭންގެ ދަތުރުތައް ފެށުމަށް މިއަދު ބޭއްވި ޙައްސަ ރަސްމިއްޔާތުގައި އިކޮނޮމިކް މިނިސްޓަރު މުހައްމަދު ސައީދާއި، ޓްރާންސްޕޯޓް މިނިސްޓަރު މުހައްމަދު އަމީނާއި، ވެލިދޫ ކައުންސިލް މެންބަރުންގެ އިތުރުން ބައެއް އިސްވެރިން ވަނީ ބައިވެރިވެވަޑައިގެންފައި ވެއެވެ.

ވެލިދުއަށް ދަތުރުކުރާ ސީޕްލޭންގެ ފުރަތަމަ ދަތުރުތައް ފެށުމަށް ބޯޓު ނައްޓާލާފައި ވަނީ މިއަދު މެންދުރުފަހު 14:40 ގަ އެވެ.

ދިވެހިންނާއި، ފަތުރުވެރިންވެސް ހިމެނޭހެން މިއަދު ސީދާ ރަސްމީ ދަތުރުތަކެއް ވެލިދުއަށް ކުރުމަށް މޯލްޑިވިއަން އިން ނިންމާފައިވާއި ދިވެހިންނަށް ހާއްސަ ފެއާ ދަތުރުތަކެއްވެސް މޯލްޑިވިއަނުން ވަނީ ހަމަޖައްސާފަ އެވެ.

އާންމު ރޭޓުގެ ގޮތުގައިވެލިދު އަށް ދަތުރުތައް ކުރުމަށް ދިވެހިންގެ އަތުން ނެގުމަށް މިވަގުތު ހަމަޖައްސާފައިވަނީ 999 ރުފިޔާ އެވެ. އަދި ފަތުރުވެރިންނަށް އެއްކޮޅު ޓިކެޓުގެ އަގު އުޅެނީ 93 ޑޮލަރަށެވެ.

މިއީ ރައީސް ޑރ. މުހައްމަދު މުއިއްޒުގެ ވައުދުފުޅެކެވެ. އެގޮތުން މިދިޔަ ޖުލައި މަހުގެ 24 ވަނަ ދުވަހު ވެލިދުއަށް ވަޑައިގެން އެމަނިކުފާނު ވަނީ މިއަހަރުގެ ޖަނަވަރީ މަހު ވެލިދޫގައި ސީޕްލޭން ޕްލެޓްފޯމެއް ގާއިމުކުރައްވައި ސީޕްލޭންގެ ޚިދުމަތް ފައްޓަވައި ދެއްވާނެކަމަށް ވިދާޅުވެފައެވެ.

ރައީސުލް ޖުމްހޫރިއްޔާ ވަނީ ވެލިދޫގައި ސްޓޭޝަންކޮށްފައި އޮންނަ ގޮތަށް ސީ އެމްބިއުލާންސެއްގެ ޚިދުމަތް ވެސް، މި މަހު ފައްޓަވާނޭކަމަށް ވިދާޅުވެފަ އެވެ.