އާންމު އިޖުތިމާއީ މިންގަނޑުތަކާ ޚިލާފަށް ހެދުން އަޅާ ބިދޭސީންނާ މެދު ފިޔަވަޅު އަޅަނީ

ދިވެހިރާއްޖޭގައި އާންމު އިޖުތިމާއީ މިންގަނޑުތަކާ ޚިލާފަށް ނިވާކަން ކުޑަކޮށް ހެދުން އަޅައިގެން އުޅޭ ބިދޭސީންނާއި ފަތުރުވެރިންނާ މެދު ޤާނޫނީ ފިޔަވަޅު އަޅާނެ ކަމަށް ދިވެހި ފުލުހުންގެ ޚިދުމަތުން މިއަދު ހާމަކޮށްފިއެވެ.

ފުލުހުން ނެރުނު ބަޔާނެއްގައި ބުނީ، ދިވެހި މުޖުތަމައުގެ އަޚުލާޤީ އަދި އާންމު އިޖުތިމާއީ މިންގަނޑުތައް ހިފެހެއްޓުމަކީ ރާއްޖޭގައި ދިރިއުޅޭ އެންމެހައި ފަރާތްތަކުން އަދާކުރަންޖެހޭ އާންމު މަސްއޫލިއްޔަތެއް ކަމަށެވެ. އެހެންކަމުން، ރާއްޖޭގައި ދިރިއުޅޭ ބިދޭސީން ދިވެހި މުޖުތަމައުގެ ސަގާފަތާއި އާދަކާދައަށް އިހުތިރާމްކޮށް، އާންމު ތަންތަނާއި މަގުމަތީގައި އުޅޭއުޅުމުގައި އިޖުތިމާއީ އަދި އަޚުލާޤީ މިންގަނޑުތައް ހިފެހެއްޓުމަށް ފުލުހުން ވަނީ ހަނދާންކޮށްދީފައެވެ.

މިހާރަކަށް އައިސް ރާއްޖޭގައި ދިރިއުޅޭ ބައެއް ބިދޭސީން، އާންމު އިޖުތިމާއީ މިންގަނޑުތަކާ ޚިލާފަށް ނިވާކަން ކުޑަކޮށް ހެދުން އަޅައިގެން މަގުމައްޗާއި އާންމު އެކި ތަންތަނުގައި އުޅޭކަން ފާހަގަކުރެވިފައިވާ ކަމަށް ފުލުހުން ބުންޏެވެ. އަދި މިއީ މުޖުތަމައުގެ އާންމު ސުލޫކީ އަދި އަޚުލާޤީ މިންގަނޑުތަކާ ޚިލާފު ކަމެއް ކަމަށާއި، މިފަދަ ކަންކަމުގެ ސަބަބުން މުޖުތަމައުގެ އަމާންކަމާއި ސުލްހަމަސަލަސްކަމަށް ނޭދެވޭ އަސަރުކޮށްފާނެ ކަމަށްވެސް ފުލުހުން ފާހަގަކުރެއެވެ.

އެހެންކަމުން، މިފަދަ ކަންކަން ހުއްޓުވުމަށްޓަކައި ޤާނޫނު ނަންބަރު 11/2010 (އާންމު އިޖުތިމާއީ މިންގަނޑުތަކާ ޚިލާފު އަމަލުތައް ހުއްޓުވުމުގެ ޤާނޫނު) ގެ ދަށުން އަޅަންޖެހޭ ފިޔަވަޅުތައް އަޅަމުން ގެންދާނެ ކަމަށް ފުލުހުން ވަނީ ވިދާޅުވެފައެވެ.

މީގެއިތުރުން، އެކިއެކި ފަރާތްތަކުގެ ބެލެހެއްޓުމުގެ ދަށުން ރާއްޖޭގައި ދިރިއުޅޭ ބިދޭސީންގެ ކިބައިން މިފަދަ އަމަލުތައް ނުފެންނާނެ ގޮތަކަށް އަމަލުތައް ބެހެއްޓުމަށް، އެފަރާތްތަކާ ހަވާލުވެތިބި ފަރާތްތަކުން ޚާއްސަ ސަމާލުކަމެއް ދިނުމަށް ފުލުހުން ވަނީ އިލްތިމާސްކޮށްފައެވެ.

ހަމައެއާއެކު، ރާއްޖެއަށް ޒިޔާރަތްކުރާ ފަތުރުވެރިންނަށް ޚާއްސަކޮށް ކަނޑައަޅާފައިވާ ސަރަހައްދުތައް ފިޔަވައި، އެހެނިހެން އާންމު ތަންތަނާއި މަގުތަކުގައި އުޅޭއުޅުމުގައި ދިވެހި މުޖުތަމައުގެ ސަގާފަތާއި އިޖުތިމާއީ މިންގަނޑުތަކާ އެއްގޮތަށް ހެދުން އެޅުމަށް ބާރުއެޅުމަށް ފަތުރުވެރިންނަށް ޚިދުމަތްދޭ ފަރާތްތަކަށްވެސް ފުލުހުން ވަނީ އިލްތިމާސްކޮށްފައެވެ. އަދި މި މިންގަނޑުތަކާ ޚިލާފުވާ ފަރާތްތަކާމެދުވެސް ޤާނޫނީ ފިޔަވަޅު އަޅާނެ ކަމުގެ އިންޒާރު ފުލުހުންގެ ޚިދުމަތުން ވަނީ ދީފައެވެ.