އަތޮޅު ކައުންސިލްތައް އަލުން އަނބުރާ ގެންނަން ޖެހޭ: އަސްލަމް

ރާއްޖޭގެ ކުދި ރަށްރަށުގައި ތަރައްގީގެ މަޝްރޫއުތައް އެކަށީގެންވާ ގޮތެއްގައި ހިންގުމަށާއި، ބޭނުންވާ ފަންނީ އެހީތެރިކަން ފޯރުކޮށްދިނުމަށްޓަކައި ކުރިން އޮތް ގޮތަށް އަތޮޅު ކައުންސިލްތަކުގެ ނިޒާމު އަލުން އަނބުރާ ގެންނަން ޖެހޭ ކަމަށް ކުރީގެ ހައުސިން މިނިސްޓަރު މުހައްމަދު އަސްލަމް ވިދާޅުވެއްޖެއެވެ.

އަސްލަމް މިހެން ވިދާޅުވީ "ރަށްވެހި ތަރައްގީ" އިންވެސްޓްމަންޓް ފޯރަމްގެ ދެވަނަ ސެޝަންގައި ކުރިއަށްދިޔަ ޕެނަލް ޑިސްކަޝަންގައި ވާހަކަދައްކަވަމުންނެވެ.

ކާބަން ކްރެޑިޓާއި އިޔާދަކުރަނިވި ހަކަތައިގެ މަޝްރޫއުތަކާ ގުޅޭގޮތުން ވާހަކަދައްކަވަމުން އަސްލަމް ވިދާޅުވީ، ވަކިވަކި ރަށްރަށުން އެކަނި މިފަދަ ބޮޑެތި ކަންކަން ކުރަން އުޅުމުން ގިނަ ގޮންޖެހުންތަކާ ކުރިމަތިވާ ކަމަށެވެ. އެހެންކަމުން، ރަށްރަށަށް ބޭނުންވާ ޓެކްނިކަލް އެހީތެރިކަން ފޯރުކޮށްދޭނެ "ޓެކްނިކަލް ޓޫލް" އެއްގެ ގޮތުގައި މަސައްކަތްކުރާނެ ބަޔަކު ތިބެންޖެހޭ ކަމަށާއި، އެ ދައުރު އަދާކުރެވޭނީ އަތޮޅު ކައުންސިލްތައް ކުރީގެ ގޮތަށް އަލުން ބާރުވެރިކޮށްގެން ކަމަށް އޭނާ ފާހަގަކުރެއްވިއެވެ.

މީގެއިތުރުން، ޕަބްލިކް ޕްރައިވެޓް ޕާޓްނާޝިޕް (ޕީޕީޕީ) މޮޑެލްތަކަށް ރާއްޖެ އަހުލުވެރިވާން ޖެހިފައިވާކަން ފާހަގަކުރައްވައި އަސްލަމް ވިދާޅުވީ، ކުދި އާބާދީތަކަށް މަޝްރޫއުތައް އެކަށައަޅާއިރު "އިކޮނޮމީ އޮފް ސްކޭލް" ހޯދުމަށްޓަކައި ރަށްތައް އެއްކޮށްލައިގެން (ކްލަސްޓާ ކޮށްގެން) މަސައްކަތް ކުރުން މުހިންމު ކަމަށެވެ. މިސާލެއްގެ ގޮތުން ފުވައްމުލައް ފަދަ ބޮޑު ރަށަކަށް ވަކިން ޕްރޮޖެކްޓެއް ހިންގިދާނެ ނަމަވެސް، ތުރާކުނު ފަދަ ކުދި ރަށްތަކުން ކައިރި އެހެން ރަށްތަކާ ގުޅިގެން މަސައްކަތް ކުރުމަކީ އިންވެސްޓަރުންގެ ޝައުގުވެރިކަން އިތުރުވާނެ ކަމެއް ކަމަށް އޭނާ ވިދާޅުވިއެވެ.

ރަށްރަށުގެ ކައުންސިލްތަކުން ތައްޔާރުކުރާ ޕްރޮޕޯސަލްތަކާ ގުޅޭގޮތުން ވާހަކަދައްކަވަމުން އަސްލަމް ވިދާޅުވީ، ކައުންސިލްތަކުން ގެންނަ ގިނަ ޕްރޮޖެކްޓްތަކަކީ ބޭރުގެ ބޮޑެތި ފަންޑުތަކަށް އެޕްލައިކުރެވޭ ފަދަ "ބޭންކަބަލް" ނުވަތަ ފުރިހަމަ ޑޮކިއުމެންޓޭޝަނެއް އެކުލެވޭ މަޝްރޫއުތަކަކަށް އަދި ނުވާ ކަމަށެވެ. އަދި ޔޫއެންޑީޕީ ފަދަ ޖަމްއިއްޔާތަކުން ކުދި އެހީތައް ލިބުނު ނަމަވެސް، 10 މިލިއަން ޑޮލަރު ފަދަ ބޮޑެތި މަޝްރޫއުތަކަށް ފައިސާ ހޯދުމަކީ ފަސޭހަކަމެއް ނޫން ކަމަށްވެސް ވިދާޅުވިއެވެ.

ސަރުކާރުގެ ތެރޭގައި މިފަދަ ކަންކަމަށް ހާއްސަ ގައުމީ އެޖެންސީއެއް އަދި ގާއިމުވެފައި ނެތުމުން، އަތޮޅު ނުވަތަ ސަރަހައްދީ ފެންވަރުގައި މިފަދަ މަޝްރޫއުތައް ރާވައި، ޕްރޮޖެކްޓް ފޯމިއުލޭޓް ކުރުމުގެ ގާބިލުކަން ހުރި ދިވެހި ޒުވާނުންނާއި ފަންނީ މީހުން ގައުމުގައި ބިނާކުރުމަކީ ކޮންމެހެން ކުރަންޖެހޭ ކަމެއްގެ ގޮތުގައި އަސްލަމް ވަނީ ފާހަގަކުރައްވާފައެވެ.