ތިނަދޫ ސިޓީގެ ތަރައްޤީއަށް 6 އިންވެސްޓްމަންޓް ޕްރޮޖެކްޓެއް ހުށަހަޅައި، އިންވެސްޓަރުންނަށް ހިލޭ ބިން ދޭން ނިންމައިފި

ތިނަދޫ ސިޓީގެ އިޤްތިޞާދީ އަދި އިޖުތިމާޢީ ތަރައްޤީއަށް އަމާޒުކޮށް މުހިންމު 6 އިންވެސްޓްމަންޓް މަޝްރޫޢެއް ތިނަދޫ ސިޓީ ކައުންސިލުން އިޢުލާނުކޮށްފިއެވެ. މި މަޝްރޫޢުތައް އިޢުލާނުކުރެއްވީ އެމްޑީޕީން ބޭއްވި "އެމްޑީޕީ ކޮންގްރެސް 2026 - ރަށްވެހި ތަރައްޤީ އިންވެސްޓްމަންޓް ފޯރަމް" ގައި ތިނަދޫ ސިޓީގެ މޭޔަރ ސައުދު ޢަލީއެވެ.

މި ފޯރަމްގައި ވާހަކަދައްކަވަމުން މޭޔަރ ސައުދު ވިދާޅުވީ، ތިނަދޫގައި އިންވެސްޓްކުރަން ބޭނުންވާ ފަރާތްތަކަށް އެންމެ ދިގު މުއްދަތަކަށް ހިލޭ ބިން ދިނުމަށް ކައުންސިލުން ނިންމާފައިވާ ކަމަށެވެ. އަދި މިކަމަށްޓަކައި ޚާއްޞަ ޤަވާއިދެއް (ޕްރައިވެޓް ސެކްޓަރ އިނިޝިއޭޓިވް ޤަވާއިދު) މިހާރު އެކުލަވާލެވިފައިވާ ކަމަށާއި، ބޭނުންވަނީ ދެފުށް ފެންނަ ވާދަވެރި ނިޒާމެއްގެ ތެރެއިން އިންވެސްޓަރުންނަށް ފުރުޞަތު ފަހިކޮށްދިނުން ކަމަށް އޭނާ ވިދާޅުވިއެވެ.

މަސްވެރިކަމުގެ ސިނާޢަތާއި ކޯލްޑް ސްޓޯރޭޖް
ރާއްޖޭގައި ބާނާ މަހުގެ ގާތްގަނޑަކަށް 29 އިންސައްތަ ނުވަތަ 34،000 ޓަނުގެ މަސް ހިއްސާކުރަނީ ހުވަދުއަތޮޅުންކަން ފާހަގަކުރައްވައި މޭޔަރ ވިދާޅުވީ، މަހުގެ އަގު އެއްކޮށް (ވެލިއު އެޑް) ކުރުމަށްޓަކައި ކޯލްޑް ސްޓޯރޭޖަކާއި، ކޭނަރީއެއް އަދި ޕައުޗިންގ ފެކްޓްރީއެއް ތަރައްޤީކުރުމަށް ބޭނުންވާ ކަމަށެވެ. މީގެ ސަބަބުން ގާތްގަނޑަކަށް 400 އަށްވުރެ ގިނަ ވަޒީފާ އުފެދިގެންދާނެއެވެ.

އިންޓަރނޭޝަނަލް ޕޯޓްގެ މަސައްކަތް
ތިނަދޫ އިންޓަރނޭޝަނަލް ޕޯޓަކީ ސަރަޙައްދީ ވިޔަފާރިއަށް ނުހަނު މުހިންމު މަޝްރޫޢެއް ނަމަވެސް، މި ސަރުކާރުން އެ މަޝްރޫޢުގެ މަސައްކަތްތައް ކުރިއަށްގެންދަނީ ވަރަށް މަޑު ދުވެއްޔެއްގައި ކަމަށް މޭޔަރ ވިދާޅުވެ ކަންބޮޑުވުން ފާޅުކުރެއްވިއެވެ. މޭޔަރ ފާހަގަކުރެއްވި ގޮތުގައި ޕޯޓްގެ ޚިދުމަތާއެކު ރާއްޖެއިން ބޭރުން ސީދާ ތިނަދޫއަށް މުދާ އެތެރެކުރެވި، މުޅި ދެކުނުގެ ވިޔަފާރިތަކަށް ބޮޑު ލުޔެއް ލިބިގެންދާނެއެވެ.

ދެކުނަށް ޚާއްޞަ ބޯޓް ޔާޑެއް
ދެކުނުގެ 5 އަތޮޅުގެ އުޅަނދުފަހަރު މަރާމާތުކުރުމަށް މާލެ ސަރަޙައްދަށް ކުރަންޖެހޭ ބޮޑު ޚަރަދު ކުޑަކުރުމަށްޓަކައި، ތިނަދޫގައި ބޯޓް ޔާޑެއް ތަރައްޤީކުރުމަށް ވަނީ ހުށަހަޅާފައެވެ. މި މަޝްރޫޢަށް ކައުންސިލުން ގާތްގަނޑަކަށް 2 ލައްކަ އަކަފޫޓުގެ ބިން 20 އަހަރު ދުވަހުގެ މުއްދަތަކަށް، އެންމެ ލުއި ގޮތްތަކާއެކު ދިނުމަށް ވަނީ ހަމަޖެހިފައެވެ.

ފަތުރުވެރިކަމާއި ފަޅުތެރޭގައި ތިން ރިޒޯޓް
ހުވަދުއަތޮޅުގެ ގުދުރަތީ ރީތިކަމާއި ޑައިވިންގ ސްޕޮޓްތަކުގެ ފުރިހަމަކަން ފާހަގަކުރައްވައި މޭޔަރ ވިދާޅުވީ، އިންޓަގްރޭޓެޑް ޓޫރިޒަމްގެ ތެރެއިން ކަފެނާގެ އިތުރުން ތިނަދޫ ފަޅުތެރޭގައި 3 ރިޒޯޓު ހަދައި، ޖުމްލަ 500 އެއްހާ އެނދު ތަރައްޤީކުރުމުގެ ކޮންސެޕްޓެއް އެކުލަވާލާފައިވާ ކަމަށެވެ. މިއީ ރަށުން ބޭރުގައި ވަޒީފާ އަދާކުރާ ޒުވާނުންނަށް ރަށުގައި ތިބެގެން މަސައްކަތް ކުރުމަށް ލިބޭނެ ބޮޑު ފުރުޞަތެކެވެ.

ސޯޝަލް ހައުސިންގ މަޝްރޫޢު
ތިނަދޫގެ އިތުރުން އެ ރަށަށް ހިޖުރަކުރަން ބޭނުންވާ ފަރާތްތަކަށް އަމާޒުކޮށް، އަގުހެޔޮ ބޯހިޔާވަހިކަން ފޯރުކޮށްދިނުމަށް ސޯޝަލް ހައުސިންގ ޔުނިޓްތައް އެޅުމަށްވެސް ވަނީ ހުޅުވާލާފައެވެ. މި މަޝްރޫޢަށްވެސް ކައުންސިލުން ހިލޭ ބިން ދޫކުރާނެ ކަމުގެ ޔަޤީންކަން މޭޔަރ ދެއްވިއެވެ.

މީގެ އިތުރުން، ކާޑެއްދޫ އެއާޕޯޓް އިންޓަނޭޝަނަލް ފެންވަރަށް ތަރައްޤީކުރުމުގެ މަޝްރޫޢާއި، ދެކުނުގެ ފަތުރުވެރިކަން ފުޅާކުރުމަށްޓަކައި ޤާއިމުކުރެވޭ "ސަދަން ސީޕްލޭން ހަބް" (Southern Seaplane Hub) ގެ މަޝްރޫޢު ފާހަގަކޮށްލެވެއެވެ. މީގެއިތުރުން ސިޓީގެ ވިޔަފާރިއާއި އިޖުތިމާޢީ ދުޅަހެޔޮކަން އިތުރުކުރުމަށް މަގުފަހިވާނެ ގިނަ އިންވެސްޓްމަންޓްތަކެއް ކަމަށެވެ.

މޭޔަރ ސައުދު އަލީގެ ވާހަކަ ނިންމަވާލައްވަމުން ވިދާޅުވީ، މި ހުރިހާ މަޝްރޫޢުތަކަކީ ވެސް އެއް މަޝްރޫޢު އަނެއް މަޝްރޫޢާ ގުޅިފައިވާ، ކުރިއަށް އޮތް 5 އަހަރު ދުވަހުގެ ތެރޭގައި އޭގެ ނަފާ ރައްޔިތުންނަށް ލިބޭނެ ފަދަ ގޮތަކަށް ފަރުމާކޮށްފައިވާ މަޝްރޫޢުތަކެއް ކަމަށެވެ. އަދި އަމާޒަކީ މި ފޯރަމް ނިންމާލުމަށްފަހު އެނބުރި ތިނަދޫއަށް ދާއިރު އިންވެސްޓަރުންނާއެކު ދަތުރުކުރުން ކަމަށްވެސް އޭނާ ވިދާޅުވިއެވެ.