އީރާނުގެ 5 ޓޭންކަރު ފައްތާލުމުން، ހުރުމުޒް ކަނޑުއޮޅިން ދަތުރުކުރި 10 އުޅަނދަކަށް އީރާނުން ހަމަލާދީފި

އެމެރިކާއިން އީރާނުގެ ފަސް ތެޔޮ ޓޭންކަރެއް ފައްތާލުމާ ގުޅިގެން، އޭގެ ބަދަލުހިފުމުގެ ގޮތުން ހުރުމުޒް ކަނޑުއޮޅިން ދަތުރުކުރި 10 އުޅަނދަކަށް ވަރުގަދަ ހަމަލާތަކެއް ދީފައިވާ ކަމަށް އީރާނުން ހާމަކޮށްފިއެވެ.

މިއީ ފާއިތުވި ހަމަސް ދުވަހުގެ ތެރޭގައި ވިޔަފާރި އުޅަނދުތަކަށް އަމާޒުކޮށް ދިން މިފަދަ އެންމެ ވަރުގަދަ ހަމަލާގެ ސިލްސިލާއެވެ. މި ހަމަލާތަކާ ގުޅިގެން ދުނިޔޭގެ ބާޒާރުގައި ތެލުގެ އަގު އިންތިހާއަށް އުފުލިފައިވާއިރު، ބްރެންޓް ސާފުނުކުރާ ތެޔޮ ފީފާއެއްގެ އަގު މިހާރު ވަނީ 100 އެމެރިކާ ޑޮލަރަށް ވުރެ މައްޗަށް އަރާފައެވެ.

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ) އިން ބުނި ގޮތުގައި، އެ ގައުމުން ހަމަލާދިން އުޅަނދުތަކުގެ ތެރޭގައި އެމެރިކާގެ ދެ އުޅަނދެއްގެ އިތުރުން ތެޔޮ އުފުލާ އަށް ޓޭންކަރު ހިމެނެއެވެ. މިގޮތުން ދުބާއީ ކައިރީ ބަނދަރުކޮށްފައި އޮތް 'ހާކިއުލިސް ސްޓާ' ނަމަކަށް ކިޔާ ޓޭންކަރަށް ދިން ހަމަލާގައި ފަޅުވެރިއަކު މަރުވެ، އިތުރު ފަޅުވެރިއަކު ވަނީ ގެއްލިފައެވެ.

މީގެއިތުރުން، އިރާގުގެ ކަނޑުގެ ސަރަހައްދުގައި ދެ މިލިއަން ފީފާގެ ތެލާއެކު ދަތުރުކުރަމުންދިޔަ 'ނިއު އެންޑްރޯސް' ޓޭންކަރަށް ޑްރޯން ހަމަލާއެއް އަރައި އަލިފާން ރޯވި ނަމަވެސް، އޭގައި ތިބި 22 ފަޅުވެރިން ސަލާމަތްވެފައިވާ ކަމަށް އިރާގުގެ ކަމާބެހޭ އިދާރާތަކުން ކަށަވަރުކޮށްދެއެވެ.

އިނގިރޭސިވިލާތުގެ މެރިޓައިމް ޓްރޭޑް އޮޕަރޭޝަންސް (ޔޫކޭއެމްޓީއޯ) އިން ވެސް ވަނީ އޮމާން ކަނޑުއޮޅީގެ އެކި ސަރަހައްދުތަކުން އުޅަނދުތަކަށް ހަމަލާތައް އަމާޒުވެފައިވާ ކަމުގެ މައުލޫމާތު ލިބިފައިވާ ކަމަށް ބުނެފައެވެ. އަދި ޔުނައިޓެޑް އަރަބް އެމިރޭޓްސް (ޔޫއޭއީ) ގެ ޚޯރް ފައްކާން ބަނދަރުގައި އޮތް ގުދުރަތީ ގޭސް އުފުލާ އުޅަނދަކަށް ވެސް މި ހަމަލާތަކުގައި ގެއްލުން ލިބިފައިވާ ކަމަށް ރިޕޯޓްތައް ބުނެއެވެ.

އެމެރިކާގެ އަސްކަރިއްޔާއިން ހާމަކުރި ގޮތުގައި، އީރާނުގެ ރިވޮލިއުޝަނަރީ ގާޑުން އެމެރިކާގެ މަނަވަރަކަށް ބެލިސްޓިކް މިސައިލް ބޭނުންކޮށްގެން ދެ ފަހަރެއްގެ މަތިން ހަމަލާދޭން މަސައްކަތް ކުރުމުން، ރައްދުގައި އީރާނުގެ ފަސް ތެޔޮ ޓޭންކަރެއް ވަނީ ރޭގަނޑުގެ ވަގުތެއްގައި ފައްތާލާފައެވެ. އެ އުޅަނދުތަކުގައި އަލިފާން ރޯވެ އަޑިއަށްދާ މަންޒަރު ފެންނަ ވީޑިއޯ ފުޓޭޖް ވެސް އެމެރިކާގެ ސެންޓްރަލް ކޮމާންޑުން މިހާރު ވަނީ އާންމުކޮށްފައެވެ.

ކޮލަމްބިއާއަށް ކުރެއްވި ދަތުރުފުޅެއްގައި ނޫސްވެރިންނާ ވާހަކަދައްކަވަމުން އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވީ، އެމެރިކާގެ މަނަވަރުތަކުގެ ސަލާމަތަށް ނުރައްކާވާ ފަދަ ކޮންމެ ހާލަތެއްގައި އީރާނުގެ ތެޔޮ ޓޭންކަރުތަކަށް ހަމަލާދީ ފައްތާލާނެ ކަމަށެވެ. އަދި ފާއިތުވި ހަފުތާއެއްހާ ދުވަހުގެ ތެރޭގައި އެފަދަ 10 ޓޭންކަރަކަށް ހަމަލާދީފައިވާނެ ކަމަށް ވެސް އޭނާ ވިދާޅުވިއެވެ.

މި ކުރިމަތިލުންތަކުގެ ތެރެއިން އުރުދުންގައި ގާއިމުކޮށްފައިވާ އެމެރިކާގެ އަސްކަރީ މަރުކަޒަކަށް ވެސް އީރާނުން ވަނީ ބެލިސްޓިކް މިސައިލް ހަމަލާތަކެއް ދީފައެވެ. ނަމަވެސް، ފޮނުވާލި މިސައިލްތަކުގެ ތެރެއިން 18 މިސައިލެއް ވައިގެ ތެރޭގައި ގޮއްވާލައި ނާކާމިޔާބު ކޮށްލާފައިވާ ކަމަށާއި، ބާކީ ދެ މިސައިލް ވެއްޓުނީ މީހުން ދިރިނޫޅޭ ފަޅު ސަރަހައްދަކަށް ކަމަށް އުރުދުންއިން ބުނެއެވެ.

މި ހަމަލާގައި އެމެރިކާ ސިފައިންގެ އެއްވެސް މީހަކަށް ގެއްލުމެއް ލިބިފައި ނުވާކަން އެމެރިކާގެ އޮފިޝަލުން ވަނީ ކަށަވަރުކޮށްދެއްވާފައެވެ.