ދިވެހި މަސްވެރިންގެ ހީވާގިކަމާއި ކެރުމާއި ހިތްވަރަށް އައްސަރިބަހާއި ސާބަސް - ފަސްޓް ލޭޑީ

ރައީސުލް ޖުމްހޫރިއްޔާގެ އަނބިކަނބަލުން މެޑަމް ސާޖިދާ މުހައްމަދު، ދިވެހި މަސްވެރިންގެ ހީވާގި ކަމާއި ހިތްވަރަށް ތައުރީފު ކުރައްވައިފިއެވެ.

މަސްވެރިންގެ ދުވަސް ފާހަގަ ކުރެއްވުމަށް އެކްސްގައި ކުރެއްވި ޕޯސްޓެއްގައި މެޑަމް ސާޖިދާ މުހައްމަދު ވަނީ ދިވެހި މަސްވެރިންގެ ހީވާގިކަމާއި ކެރުމާއި ހިތްވަރަށް އައްސަރިބަހާއި ސާބަސް ތަކުރާރު ކުރައްވާފައި އެވެ. އަދި މި ޕޯސްޓުގައި އެކަމަނާ ވަނީ މިއުފާވެރި ދުވަހުގެ ތަހުނިޔާ ހުރިހާ މަސްވެރިންނަށް އަރިސް ކުރައްވާފެއެވެ.

މީގެ އިތުރުން މަސްވެރިކަމުގެ ސިނާއަތަށް ތިޔާގިކަމާއި މަންފާ އިތުރު ކޮށްދެއްވުމަށް އެދި އެކަމަނާ ވަނީ ދުޢާ ކުރައްވާފަ އެވެ.

ކޮންމެ އަހަރެއްގެ ވެސް ޑިސެމްބަރު މަހުގެ 10 ވަނަ ދުވަސް ރާއްޖޭގައި ފާހަގަކުރަނީ މަސްވެރިންގެ ދުވަހުގެ ގޮތުގައެވެ. މި އަހަރު މަސްވެރިންގެ ދުވަސް ކުލަގަދަކޮށް ފާހަގަކުރުމަށް ނިންމާފައިވަނީ ރ. ދުވާފަރުގައެވެ.

މަސްވެރިންގެ ދުވަސް ފާހަގަ ކުރުމަށް އެކިކަހަލަ ހަރަކާތްތަށް ބޭއްވުމަށް ވަނީ ހަމަޖެހިފައެވެ. އެގޮތުން ބާއްވާ ހަރަކާތްތަށް މި މަހުގެ 10 އިން 13 އަށް ކުރިއަށް ގެންދިޔުމަށް ވަނީ ރާވާފައެވެ.

މަސްވެރިންގެ ދުވަސް ފާހަގަ ކުރުމަށް ބާއްވާ ރަސްމީ ޖަލްސާ ބޭއްވުމަށް ހަމަޖައްސާފައިވަނީ 13 ޑިސެންބަރު 2025 ވާ ހޮނިހިރު ދުވަހުގެރޭ 20:00 ގައި ރ. ދުވާފަރުގައެވެ. މިޖަލްސާގައި ރައީސުލް ޖުމްހޫރިއްޔާގެ އިތުރުން އަނބިކަނަބަލުން މެޑަމް ސާޖިދާ މުހައްމަދު ބައިވެރިވެ ވަޑައިގަންނަވާނެއެވެ.