ފަހު ދިހައެއްގައި ބީއެމްއެލް ގެ ބްރާންޗްތަކުން އިން ޚިދުމަތް ލިބޭނީ މި މަހުގެ 11 އަދި 18ގައި

ރަމަޟާން މަހުގެ ފަހު ދިހައެއްގެ ދުވަސްތަކަކީ ސަރުކާރު ބަންދު ދުވަސްތަކެއްގެ ގޮތުގައި ކަނޑައަޅާފައިވީ ނަމަވެސް، ބޭންކް އޮފް މޯލްޑިވްސް (ބީއެމްއެލް) ގެ ބްރާންޗްތަކުން މި މަހުގެ 11 އަދި 18 ވާ ހޯމަ ދުވަހު ޚިދުމަތް ދިނުމަށް އެ ބޭންކުން ނިންމައިފިއެވެ.

ބްރާންޗްތައް ވަކި ދުވަސްތަކެއްގައި ހުޅުވުމަށް ހަމަޖެހިފައިވީ ނަމަވެސް، ފަހު ދިހައެއްގެ ހުރިހާ ދުވަހެއްގައިވެސް ބޭންކުގެ އޮންލައިން ޚިދުމަތްތައް މެދުކެނޑުމެއްނެތި ލިބޭނެއެވެ. މީގެ ތެރޭގައި އިންޓަރނެޓް ބޭންކިންގ އަދި މޮބައިލް އެޕް މެދުވެރިކޮށް ދެވޭ ޚިދުމަތްތައް ހިމެނެއެވެ.

މީގެ އިތުރުން، ފިތުރު އީދަށްފަހު ޝައްވާލް މަހުގެ ފުރަތަމަ 7 ދުވަހު އެ ބޭންކުގެ ބްރާންޗްތައް ކޮންމެ ދުވަހެއްގެ ހެނދުނު 9:30 އިން މެންދުރު 12:30 އަށް ހުޅުވާނެ ކަމަށްވެސް ބީއެމްއެލްއިން ވަނީ ބުނެފައެވެ.

ބީއެމްއެލްއިން ވަނީ ބްރާންޗްތައް ބަންދު ނަމަވެސް އޮންލައިންކޮށް ހުރިހާ ޚިދުމަތެއް ލިބޭނެކަން ކަސްޓަމަރުންގެ ސަމާލުކަމަށް ގެނެސްފައެވެ. މި ބަދަލުތަކަކީ ރަމަޟާން މަހުގެ ފަހު ދިހައަކީ ސަރުކާރު ބަންދު ދުވަސްތަކެއްގެ ގޮތުގައި ހަމަޖެއްސުމާ ގުޅިގެން ކަސްޓަމަރުންނަށް ލުއިފަސޭހަ ކޮށްދިނުމަށް ގެނެވުނު ބަދަލުތަކެކެވެ.