ޣައްޒާގެ އުތުރުގެ 5 ރަށަކުން އާންމުން ނުކުތުމަށް، އިސްތިއުމާރީ އިސްރާއީލުން ފަހުގެ އިންޒާރުދީފި

ޣައްޒާގެ އުތުރުގެ 5 ރަށަކުން އާންމުން ނުކުމެގެން ދިއުމަށް، އިސްތިއުމާރީ އިސްރާއީލުން އަމުރުކޮށްފިއެވެ.

އާންމުން ނުކުމެގެން ދިއުމަށް އަމުރުކޮށްފައިވަނީ، ޣައްޒާގެ އުތުރުގެ ބައިތު ހާނޫން، ބައިތު ލާހިޔާ، ޝައިޚް ޒައިދު، އަލް-މަންޝިއާ އަދި ތަލް އައްޒާތަރުންނެވެ.

މިއީ، އިސްތިއުމާރީ ޓެރަރިސްޓުން މިހާރުވެސް ވައިގެ ހަމަލާދީ އަދި އެއްގަމުމަގުން އަރައި ބޮޑެތި ގަތުލުއާންމުންތައް ހިންގަމުންގެންދާ ރަށްތަކެވެ.

އިސްރާއީލު އަސްކަރިއްޔާގެ އަރަބިބަހުގެ ތަރުޖަމާނު އަމުރުކޮށްފައިވަނީ، އެ ރަށްތަކުގެ އެންމެން ގާޒާ ސިޓީއަށް ދިއުމަށެވެ. އަދި ބުނެފައިވަނީ މިއީ "ފަހުގެ އިންޒާރު" ކަމަށެވެ.

އާންމުން ފައިބައިގެން ދިއުމަށް އެންގި ރަށްތަކުގައި ސިފައިން ރެއިޑްޖަހަން ތައްޔާރުވަމުންދާ ކަމަށްވެސް ތަރުޖަމާނު ބުނެފައި ވެއެވެ.

ޣައްޒާގެ ދެކުނުގެ ރަފަހް ސިޓީގައި ދިރިއުޅޭ ތިންލައްކައަށްވުރެ ގިނަމީހުން އެ ސިޓީން ފައިބައިގެން ދިއުމަށްވެސް އިހަށްދުވަހު އަމުރުކޮށް އަދި ގެދޮރުދޫކޮށް ނުކުމެގެން ދާން ފެށުމުންވެސް ބޮންއަޅައި އަދި ބޮޑުބަޑީގެ ހަމަލާތައްދީ އެތައް އާންމުން ޝަހީދުކޮށްލާފައި ވެއެވެ.

ރަފަހް ސިޓީގެ އާންމުން ދިއުމަށް އިސްތިއުމާރީ ބާރުން އަންގާފައިވަނީ އަލް މަވާސީ ސަރަހައްދަށެވެ.

މިއީ، ރަފަހް ސިޓީގެ އާންމުން އެއްތާކަށް ޖަމާކޮށް ބޮޑުވެގެންދާ ގަތުލުއާންމެއް ހިންގުމަށް ރާވާފައިވާ ރޭވުމެއްގެދަށުން ކުރާ ކަމެއް ކަމަށް އެތައްބަޔަކު ގެންދަނީ ބުނަމުންނެވެ.

ރަފަހް ސިޓީން އާންމުން ފައިބައިގެންދިޔަ ސަރަހައްދުތަކުގައި ހުރި ހުރިހާ އިމާރާތްތައް، ޓެރަރިސްޓުން މިހާރު ގޮއްވަމުން ގެންދާ ކަމަށް، ފަލަސްތީނުން ލިބޭ ރިޕޯޓްތައް ބުނެއެވެ.

ބިރުދައްކައި އިންޒާރުދީގެން އާންމުން ގެދޮރުން ބޭރުކޮށް ފައްސާލުމުގެ ޖަރީމާތައް، ޣައްޒާގެ އެކި ރަށްތަކުގައި އިސްތިއުމާރީ ޓެރަރިސްޓުން ގެންދަނީ ހިންގަމުންނެވެ.

މިއީ، ޣައްޒާ ހުސްކޮށްލުމަށް އެމެރިކާގެ ރައީސް ޑޮނަލްޑް ޓްރަމްޕް ހުށަހެޅި ޕްލޭން ތަންފީޒުކުރަން އިސްތިއުމާރީ އިސްރާއީލުން ފަށާފައިވާ މަސައްކަތުގެ ދަށުން ކުރާ ކަމެކެވެ. ނަތަންޔާހޫ ވަރަށް ފާޅުކަން ބޮޑު ގޮތެއްގައިވަނީ އެކަން ހާމަކޮށްފައެވެ.