މޯލްޑިވްސް ކުއަލިފިކޭޝަންސް އޮތޯރިޓީ (އެމްކިޔުއޭ) އަށް މިހާތަނަށް 1333 ސަނަދެއް "ވެލިޑޭޓް" ކޮށްފިއެވެ.
މަތީ ތައުލީމާ މަސައްކަތްތެރިކަމާ ހުނަރުތައް ތަރައްގީކުރުމާ ބެހޭ ވުޒާރާއިން ބުނީ، މިއަހަހަރުގެ މިހާތަނަށް އެމްކިއުއޭއަށް ޖުމްލަ 1621 ސަނަދެއް 'ވެލިޑޭޓް' ކުރުމަށް ހުޅަހަޅާފައިވާ ކަމަށެވެ. މިނިސްޓްރީން ބުނީ ކޮލިފިކޭޝަން ރިކޮގްނިޝަންގެ ޚިދުމަތަކީ ދިވެހިރާއްޖޭގައި މަތީ ތަޢުލީމު ފޯރުކޮށްދޭ މަރުކަޒުތަކުންނާއި ބޭރު ޤައުމުތަކުގައި މަތީ ތަޢުލީމު ފޯރުކޮށްދޭ މަރުކަޒުތަކުން ދަރިވަރުން ހާޞިލްކޮށްފައިވާ ސަނަދުތަކަކީ އެމްކިޔުއޭ އިން ކަނޑައަޅާފައިވާ އެމްއެންއެފްކިޔު ލެވެލްއަށް ފެތޭ ސަނަދެއްކަން ކަށަވަރުކުރުމުގެ ގޮތުން ދެވޭ ޚިދުމަތެއް ކަމަށެވެ.
އެގޮތުން، ދަރިވަރުން 'ވެލިޑޭޓް' ކުރުމަށް ނުވަތަ ޕްރޮގްރާމެއްގެ ފެންވަރު ކަނޑައެޅުމުގެ ޚިދުމަތަށް އެދި އެމްކިޔުއޭއަށް ސަނަދެއް ހުށަހެޅުމުން އެ އިދާރާ އިން އެ ސަނަދެއްގެ ލެވެލް ބަލައި ޗެކްކުރުމަށްފަހު، އެ ސަނަދެއްގެ ލެވެލް އިނގޭ، އެމްކިޔުއޭގެ ތައްގަނޑު ހިމެނޭ ލިޔުމެއް ދަރިވަރާއި ހަވާލުކޮށްދޭ ކަން މިނިސްޓްރީން ފާހަގަކުރެއެވެ.
ދިވެހިރާއްޖޭގެ ތަޢުލީމީ ޤާނޫނުގައި ބަޔާންވެފައިވާ ފަދައިން ރާއްޖޭގެ މަތީ ތަޢުލީމުގެ ފެންވަރު ރަނގަޅުކޮށް، ރާއްޖޭގެ ޔުނިވާސިޓީތަކުގައި ބޭރުގެ ދަރިވަރުން ތަޢުލީމު ހާޞިލުކުރުމަށް ރާއްޖެ އަންނާނެ ފަދަ ހަރުދަނާ ތަޢުލީމީ ނިޒާމެއް ބިނާކުރުމަކީ ސަރުކާރުގެ އަމާޒެއްކަން ފާހަގަކޮށް ހަޔަރ އެޑިއުކޭޝަނުން ބުނީ މި އަމާޒަށް ވާސިލް ވުމަށް މަތީ ތަޢުލީމުދޭ މަރުކަޒުތަކުން ހިންގާ ކޯސްތަކުގެ ފެންވަރު ކަށަވަރުކޮށް، ރާއްޖޭގެ ޔުނިވާސިޓީ އަދި ކޮލެޖް އިންސްޓިޓިއުޓް ތަކުން ނިކުންނަ ދަރިވަރުންގެ ތައުލިމީ ފެންވަރު ހަރުދަނާކުރުމަށް މިނިސްޓްރީ އޮފް ހަޔަރ އެޑިޔުކޭޝަން، ސްކިލްސް ޑިވެލޮޕްމަންޓްގެ ދަށުން އެމްކިޔުއޭ އިން އަންނަނީ ގިނަ މަސައްކަތެއް ކުރަމުން ކަމަށެވެ.
