މީޑިއާތަކުން މައުލޫމާތު އާއްމުކުރާއިރު ކުޑަކުދިންގެ ހައްގުތަކަށް ރައްކާތެރިވުމަށް ޗިލްޑްރަންސް އޮމްބަޑްސްޕާސަންގެ އޮފީހުން އެދިއްޖެއެވެ.
އެ އޮފީހުން ނެރުނު ނޫސް ބަޔާނެއްގައި ބުނީ، ކުޑަކުދިންގެ ހައްގުތައް ރައްކާތެރިކުރުމުގެ ގާނޫނާ ބަޔާންކޮށްފައިވާ މިންވަރާ ޚިލާފަށް، ދިވެހިރާއްޖޭގެ ރަޖިސްޓްރީކޮށްގެން ހިންގާ ބައެއް މީޑިއާތަކާއި އަދި އެނޫންވެސް އެހެން މީޑިއާގެ ވަސީލަތްތައް ނުވަތަ މަންސަތަކުގައި، ކުޑަކުދިންގެ ކަރާމަތަށް އަންނަފަދަ މައުލޫމާތު އާންމުކުރަމުންދާ ކަމަށެވެ.
ގާނޫނުއަސާސީގެ ދެވަނަ ބާބުގައި ކުޑަކުދިންނަކީ ހާއްސަ ރައްކާތެރިކަން ލިބެންޖެހޭ ބައެއްކަމަށް ކަނޑައަޅާފައިވާކަމް ފާހަގަކޮށް އެ އޮފީހުން ބުނީ ނަފްސާނީ ގޮތުން އަދި ޖިސްމާނީ ގޮތުން ގެއްލުމެއް ލިބިދާނެ ހުރިހާ ކަމަކުން ކުއްޖާ ރައްކާތެރިކޮށްދިނުމަކީ އެ މުއާހަދާގައި ބައިވެރިވެފައިވާ ފަރާތެއްގެ ހައިސިއްޔަތުން ދިވެހި ދައުލަތުގެ ޒިންމާއެއް ކަމަށެވެ.
މީގެއިތުރުން، އެ އޮފީހުން ބުނީ ބައެއް މީޑިއާ ވަސީލަތްތަކުގައި ކުޑަކުދިންގެ މައުލޫމާތު އާންމުކުރަމުންދާކަން ފާހަގަކުރެވޭ ކަމަށާއި މިގޮތަށް މައުލޫމާތު އާންމުކުރުމަކީ ކުދިންގެ މަސްލަހަތު ރައްކާތެރިނުކުރެވި، ކުއްޖާ އަނިޔާއަކަށް އަދި ނުރައްކަލަށް ނުވަތަ ގޯނާއަކަށް ހުށަހެޅިދާނެ ކަމެއްކަމުގައި ދެކޭ ކަމަށެވެ.
އެގޮތުން "ކުށުގެ ތުހުމަތުގައިވާ ކުދިންނާއި، ކުށުގެ ޝިކާރައަކަށް ވެފައިވާ ކުދިންނާއި އެ ނޫންވެސް ސަބަބަކަށްޓަކައި އަޅައިލުމާއި ރައްކައުތެރިކަން ބޭނުންވާ ކުދިންގެ މައުލޫމާތު އާންމުކުރުމަށް ޗިލްޑްރެންސް އޮމްބަޑްސްޕަރސަން ހުއްދަކުރާ މިންވަރު ބަޔާންކުރާ އުސޫލު" އާއި ޚިލާފަށް، ސީދާ ގޮތުން ނުވަތަ ނުސީދާ ގޮތުން ނަމަވެސް ކުޑަކުދިންގެ ޒާތީ މައުލޫމާތު އެއްވެސް މީޑިއާއަކުން އާންމުކޮށްފިނަމަ އެ އޮފީހުގެ ސަމާލުކަމަށް އަތުވެއްޖެނަމަ، އެ ފަރާތަކަށް އެ އުސޫލުގައި ބަޔާންކޮށްފައިވާ މިންގަނޑުތަކުގެ ދަށުން ފިޔަވަޅު އެޅޭނެ ވާހަކަ އެ އޮފީހުން ވަނީ އަންގާފައެވެ.
ކުޑަކުދިންގެ ހައްގުތަކާއި ގުޅިގެން އެކުލަވާލާފައިވާ އެންމެހާ މުއާހަދާތަކާއި، ގާނޫނުތަކުގެ މައިގަނޑު އަމާޒަކީ، ކުއްޖާގެ މަސްލަހަތަށް އެންމެ މަތީ ދަރަޖައިގެ އިސްކަން ދިނުމާއި އެކުދިންނަށް އަނިޔާއާއި ގޯނާއިން ރައްކާތެރިކަން ލިބިދިނުން ކަމަށް ވީ ހިނދު، ދިވެހިރާއްޖޭގައި މަސައްކަތްކުރާ މީޑިއާތަކުން އަދި އެނޫންވެސް ފަރާތްތަކުން އެކުދިންނަށް ލިބިދޭންޖެހޭ އެންމެހާ ހައްގުތަކާއި ރައްކާތެރިކަން ކަށަވަރުކޮށްދިނުމުގައި ދެމިތިބުމަށް އެ އޮފީހުން ވަނީ އިލްތިމާސް ކޮށްފައެވެ.
އަދި ކޮންމެ ހާލަތެއްގައިވެސް، މީޑިއާތަކާއި، މުއައްސަސާތަކާއި މުޅި މުޖްތަމައުއިން ކުދިންގެ ރައްކާތެރިކަން އިސްކޮށް، އެކުދިންގެ މަސްލަހަތު ހިމާޔަތްކޮށް، ހައްގުތައް ކަށަވަރުކޮށްދިނުމުގައި އެކުގައި މަސައްކަތް ކުރުމަށާއި، މިކަންކަން ހާސިލްކުރުމަށް އެއްބާރުލުން ދިނުމަށް ވެސް އޮފީހުން ވަނީ އިލްތިމާސް ކޮށްފައެވެ.
ކުޑަކުދިންނާއި ބެހޭ މައްސަލަތަކުގައި މީޑިއާތަކުން، އެކުދިންގެ ފޮޓޯތައް އާންމުނުކުރުމަށް ޕޮލިހުން ވެސް ވަނީ އިލްތިމާސްކޮށްފައެވެ.
