ަލޮނުފެނުން މަސް ފިނިކުރާ ނިޒާމު މަސް ދޯނިތަކުގައި ހަރުކުރުމަށް ހުޅުވާލި ލޯން ސްކީމުގެ ދަށުން 13 ފަރާތަކަށް ލޯނު ދޫކުރާކަމުގެ ލިޔުން ހަވާލުކޮށްފިއެވެ.
އެ ފަރާތްތަކަށް ލޯނު ލިބުނުކަމުގެ ލިއުން ހަވާލުކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުއެވެ.
މަސްވެރިކަމާއި ކަނޑުގެ މަސްވެރިކަމާއި ކަނޑުގެ ވަސީލަތްތަކާބެހޭ ވުޒާރާއާއި، އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަން (އެސްޑީއެފްސީ) ގުޅިގެން ހުޅުވާލާފައިވާ މިލޯނަށް އެދުމަށް ހުޅުވާލީ ނިމިދިޔަ ސެޕްޓެމްބަރު މަހުގެ 22 ވަނަ ދުވަހުއެވެ.
މިލިޔުންތައް ހަވާލުކޮށްދެއްވީ އާރް.އެސް.ޑަބްލިއު ފައިނޭންސިންގ ފެސިލިޓީ ސްޓޭކްހޯލްޑަރުންނާއި ބައްދަލުކުރުމާއި ގއ. ކޫއްޑޫ ކޯލްޑް ސްޓޯރޭޖް އެކްސްޕެންޝަން ޕްރޮޖެކްޓްގައި ސޮއިކުރުމަށް މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ރަސްމިއްޔާތެއްގައެވެ.
މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް އަޙުމަދު ޝިޔާމް ވިދާޅުވީ މީގެކުރިންވެސް ލޮނުފެނުން މަސް ފިނިކުރާ ނިޒާމު ދޯނިތަކުގައި ޤާއިމް ކުރުމަށް މަސްވެރިންނަށް ހުޅުވާލާފައިވާ ކަމަށެވެ، ނަމަވެސް މި ސަރުކާރުން މި ލޯނަށް އަލުން ހުޅުވާލީ މީގެ ކުރިން ނެތް ގިނަ ލުއިތަކާއެކުގައި ކަމަށެވެ.
މިނިސްޓަރ ވިދާޅުވީ، ލޯނަށް ކުރިމަތިލާ އޮޑިވެރިންނަށް ސަރުކާރުން ލޯނުގެ ޖުމްލަ އަގުގެ 35 އިންސައްތަ ދައްކައިދޭނެ ކަމަށެވެ.
"މީގެ ކުރިންވެސް މި ފެސިލިޓީގެ ފުރުސަތު އޮޑިވެރިންނަށް އޮތް. ނަމަވެސް އަތް ނުލެވޭ. ނަމަވެސް ވަރަށް ލުއިކޮށް މި ފެސިލިޓީ ދެނީ. އޭގެ މާނައަކީ 1 މިލިޔަން ލޯނުގެ ގޮތުގައި ދެންޏާ، 350،000 ރުފިޔާ ސަރުކާރުން ދޭނެ"
މި މަޝްރޫޢަށް ޖުމްލަ 148 މިލިޔަން ރުފިޔާ ކަނޑައަޅާފައިވާ ކަމަށް ފިޝަރީޒް އެންޑް އޯޝަން ރިސޯސަސް މިނިސްޓްރީން ބުނެއެވެ. އަދި އެސްޑީއެފްސީ މެދުވެރިކޮށް ދޫކުރާ މި ފެސިލިޓީގެ ދަށުން، ރަހުނަކާއި ނުލާ 100،000 ރުފިޔާއިން ފެށިގެން 2،000،000 ރުފިޔާއަށް ހަމައަށް އެހީ ދޭނެ ކަމަށްވެސް ވަނީ ބުނެފައެވެ.
މީގެ ކުރިން ހުޅުވާލި ފުރުސަތުތަކާއި ހިލާފަށް އަލުން ހުޅުވާލި ފެސިލިޓީގެ ދަށުން، ދޯނިތަކުގައި އަވިން ހަކަތަ އުފެއްދޭ ސޯލާ ނިޒާމާއި ޖެނެރޭޓަރު ގަތުމަށް ފުރުސަތު ދޭނެއެވެ. މިއާއެކު ލޯނު އަނބުރާ ދެއްކުމަށް 6 މަސް ދުވަހުގެ ގްރޭސް ޕީރިއޭޑަކާއެކު، 10 އަހަރު މި ސްކީމުގެ ދަށުން ލިބޭނެއެވެ.
މި ސްކީމަކީ މަޤުބޫލު ސްކީމަކަށްވާއިރު މިހާތަނަށް 31 އެޕްލިކޭޝަނެއް ލިބި 21 އެޕްލިކޭޝަނެއް ޕްރޮސެސް ކުރަމުން އެބަދެއެވެ.
