އަންނަ އަހަރުގެ އައިޓީބީ ފެއާ ރާއްޖޭގައި

ދުނިޔޭގެ އެންމެ ބޮޑު ފަތުރުވެރިކަމުގެ މައުރަޒު ކަމަށްވާ އައިޓީބީ ބާލިން އަންނަ އަހަރު ހޯސްޓުކުރާ ގައުމަކަށް ރާއްޖެ ހަމަޖައްސައި، އެކަމުގެ ރަސްމީ އެއްބަސްވުމުގައި ސޮއިކޮށްފިއެވެ.

މި އެއްބަސްވުމުގައި ސޮއިކޮށްފައިވަނީ އައިޓީ ބާލިންގެ ރާއްޖޭގެ ސްޓޭންޑުގައި ބޭއްވި ހާއްސަ ރަސްމިއްޔާތެއްގައެވެ. މި ރަސްމިއްޔާތުގައި މި އެއްބަސްވުމުގައި ވިޒިޓް މޯލްޑިވްސްގެ ފަރާތުން ސޮއިކުރެއްވީ ކުންފުނީގެ މެނޭޖިންގ ޑިރެކްޓަރ އިބްރާހީމްް ޝިއުރީއެވެ. އަދި މެސޭ ބާލިންގެ ފަރާތުން ސޮއިކުރެއްވީ ސީއީއޯ މާރިއޯ ޓާބިއަސްއެވެ.

ދައުލަތުގެ މީޑިއާއަށް ދެއްވި އިންޓަވިއުއެއްގައި ވިޒިޓް މޯލްޑިވްސް ކޯޕަރޭޝަން، ވީއެމްސީގެ މެނޭޖިންގ ޑިރެކްޓަރ އިބްރާހީމް ޝިއުރީ ވިދާޅުވީ، މުޅި ދުނިޔޭގައިވެސް ފަތުރުވެރިކަމުގެ ދާއިރާއިން ބޭއްވޭ އެންމެ ބޮޑު އެއް ފެއަރ ހޯސްޓުކުރާ ގައުމަކަށް ދިވެހިރާއްޖެ ހަމަޖެހިގެން މި ފެއަރގައި ބައިވެރިވާ އެހެން ގައުމުތަކާވެސް ވާދަކޮށްގެން ކަމަށެވެ. އެހެންކަމުން މިއީ ރާއްޖެއަށް ލިބުނު ވަރަށް ބޮޑު ފަހުރެއްގެ ގޮތުގައި ޝިއުރީ ސިފަކުރެއްވިއެވެ.

ޝީއުރީ ވިދާޅުވީ، މިއީ ރާއްޖޭގެ ގުދުރަތީ ރީތިކަމާއި، މެހެމާންދާރީގެ މުއްސަނދިކަން މުޅި ދުނިޔެއަށް ދައްކާލުމަށް ލިބޭ ރަން ފުރުސަތެއްގެ ކަމަށާއި، މިކަމުގެ ސަބަބުން ޖަރުމަނު މާކެޓުގެ އިތުރުން ޔޫރަޕްގެ އެހެން ގައުމުތަކުން ރާއްޖެއަށް އަންނަ ފަތުރުވެރިންގެ އަދަދު އިތުރުވެގެންދާނެ ކަމަށެވެ.

ހޯސްޓް ކަންޓްރީގެ ހައިސިއްޔަތުން، މައުރަޒު ހުޅުވުމުގެ ރަސްމިއްޔާތާއި، މައުރަޒުގެ ތެރޭގައި ބާއްވާ އެކި ހަރަކާތްތަކުގައި ރާއްޖެއަށް ހާއްސަ އިސްކަމެއް ދެއްވާނެ ކަމަށް ޝީއުރީ ވިދާޅުވިއެވެ. މީގެ އިތުރުން، އައިޓީބީ ބާލިންގައި ރާއްޖޭގެ ފަތުރުވެރިކަން އިޝްތިހާރު ކުރުމަށްޓަކައި ވަރަށް ފުޅާ ދާއިރާއެއްގައި ތައްޔާރީތައް ވާނެ ކަމަށެވެ. އަދި މިއީ ދިވެހިރާއްޖެއަކީ ދުނިޔޭގެ އެންމެ މަގުބޫލު ފަތުރުވެރި މަންޒިލްގެ ގޮތުގައި ދެމިއޮތުމަށް އެޅޭ ވަރަށް މުހިންމު ފިޔަވަޅެއް ކަމަށްވެސް ޝިއުރީ ވިދާޅުވިއެވެ.

މީގެ 10 އަހަރު ކުރިން 2016 ވަނަ އަހަރުވެސް ރާއްޖެއިން ވަނީ އައިޓީބީ ބާލިން ހޯސްޓުކޮށްފައެވެ. އަދި އެއަހަރު ބޭއްވި އައިޓީބީ ރަސްމީކޮށް ހުޅުވުމުގެ ރަސްމިއްޔާތަކީ މިހާތަނަށް ބޭއްވި އެންމެ ކުލަގަދަ ރަސްމިއްޔާތު ކަމަށް މެސޭ ބާލިންއާ ހަވާލާދީ ޝިއުރީ ވިދާޅުވިއެވެ.