ޗައިނާއަށް އަނެއްކާވެސް ބާރުގަދަ ތޫފާނެއް އަރައިފި

ޗައިނާއަށް އަނެއްކާވެސް ބާރުގަދަ ތޫފާނެއް އަރައިފިއެވެ. މިއީ ހަފްތާއެއްހާ ދުވަހުގެ ތެރޭގައި ޗައިނާއަށް އެރި ދެވަނަ ތޫފާނެވެ.

މީގެ ސަބަބުން ގިނަ އަދަދެއްގެ ބަޔަކު ރައްކާތެރި ހިސާބުތަކަށް ބަދަލުކުރަން ޖެހިފައިވާއިރު، އެކި ސަރަހައްދުތަކުގެ ދަތުރުފަތުރުގެ ނިޒާމަށް ވަނީ ބޮޑެތި ބުރޫތަކެއް އަރާފައެވެ.

"ބާވީ" ގެ ނަމުން ނަންދެވިފައިވާ މި ތޫފާން މިއަދު ޗައިނާގެ އިރުމަތީ އައްސޭރިފަށަށް އަރާފައިވަނީ ބާރުގަދަ ވަޔާއި، ބޯކޮށް ވާރޭވެހުމުގެ އިތުރުން ނުރައްކާތެރި ރާޅުތަކާއެކުގައެވެ. ތޫފާން އެރުމުގެ ކުރިން، އައްސޭރިފަށުގެ ނުރައްކާ އޮތް ސަރަހައްދުތަކުން ގާތްގަނޑަކަށް ދެ މިލިއަން މީހުން ރައްކާތެރި ހިސާބުތަކަށް ބަދަލުކޮށްފައިވެއެވެ. އަދި މަސްވެރިކަން ކުރާ އެތައް ހާސް އުޅަނދެއް ބަނދަރަށް ވަނުމަށް ކަމާބެހޭ ފަރާތްތަކުން ވަނީ އިރުޝާދު ދީފައެވެ.

އާންމުންގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި ގިނަ ސިޓީތަކެއްގެ ވައިގެ ދަތުރުފަތުރާއި، ހައި-ސްޕީޑް ރޭލު އަދި ފެރީގެ ހިދުމަތްތައް ވަނީ މެދުކަނޑާލާފައެވެ. މީގެ އިތުރުން، ތޫފާނުގެ އަސަރު އެންމެ ބޮޑަށް ކުރި ސަރަހައްދުތަކުގެ ސްކޫލްތަކާއި ވިޔަފާރިތައް ވެސް ވަނީ ބަންދުކޮށްފައެވެ.

ޗައިނާގެ ދެކުނުގެ ސަރަހައްދުތަކަށް ބާރުގަދަ ތޫފާނެއް އެރުމުގެ ސަބަބުން ކުރިމަތިވި ފެންބޮޑުވުމާއި އުމްރާނީ ވަސީލަތްތަކަށް ލިބުނު ގެއްލުންތަކުން އަރައިގަތުމަށް މަސައްކަތް ކުރަމުންދަނިކޮށް، އަނެއްކާވެސް އިތުރު ތޫފާނެއް އެ ގައުމަށް އަރައިފައިވާއިރު، ކައިރިކައިރީގައި ދެ ތޫފާން ކުރިމަތިވުމުގެ ސަބަބުން، ހާލުގައި ޖެހިފައިވާ ފަރާތްތަކަށް އެހީތެރިކަން ފޯރުކޮށްދިނުމުގައި ހަރަކާތްތެރިވާ ޓީމުތަކަށް ވެސް ވަނީ ބޮޑެތި ގޮންޖެހުންތަކަކާ ކުރިމަތިލާން ޖެހިފައެވެ.

މޫސުމާ ބެހޭ މާހިރުން އިންޒާރު ދޭ ގޮތުގައި، މި ތޫފާން އެއްގަމަށް އަރަމުންދާއިރު ފެންބޮޑުވުންތަކާއި ބިންގަނޑު ކަނޑައިގެން ދިއުމުގެ ހާދިސާތައް ހިނގުން އެކަށީގެންވެއެވެ. ވަކިން ހާއްސަކޮށް، ފަހަކަށް އައިސް ވެހުނު ވާރޭގެ ސަބަބުން ބިންގަނޑު ފޯވެފައިވާއިރު، ފަރުބަދަމަތީ ސަރަހައްދުތަކުގައި މިފަދަ ހާދިސާތައް ހިނގުމުގެ ފުރުސަތު ބޮޑެވެ. ކަމާބެހޭ އިދާރާތަކުން ދަނީ ބޭރަށް ނުނިކުމެ ގޭގައި މަޑުކުރުމަށާއި، ކޮންމެހެން ކުރަންޖެހޭ ދަތުރުތައް ފިޔަވައި އެހެން ދަތުރުތައް ނުކުރުމަށާއި، މޫސުމާ ބެހޭ ރަސްމީ އިރުޝާދުތަކަށް ފަރުވާތެރިވުމަށް އިލްތިމާސް ކުރަމުންނެވެ.

ކޮންމެ އަހަރެއްގެވެސް ހޫނު މޫސުމުގައި ޗައިނާއަށް ބާރުގަދަ ތޫފާންތައް ކުރިމަތިވި ނަމަވެސް، އެއް ހަފުތާއެއްގެ ތެރޭގައި ދެ ބޮޑު ތޫފާން އެރުމުގެ ސަބަބުން، މޫސުމީ ބަދަލުތަކުގެ ސަބަބުން ރަށްތަކަށާއި އުމްރާނީ ވަސީލަތްތަކަށް ކުރާ ނޭދެވޭ އަސަރުތަކާމެދު ވަނީ ކަންބޮޑުވުން އިތުރުވެފައެވެ.

ތޫފާން އެއްގަމަށް އަރައިފައިވާއިރު، ކަމާބެހޭ ފަރާތްތަކުން ދަނީ ހާލަތު މޮނިޓަރު ކުރަމުންނެވެ. އަދި ތޫފާނުގެ އަސަރުކުރި ޕްރޮވިންސްތަކަށް ލިބުނު ގެއްލުންތައް ވަޒަންކުރުމުގެ މަސައްކަތް މިހާރު ވަނީ ފަށާފައެވެ.