ހުރްމޫޒް ކަނޑުއޮޅި ބަންދުކޮށްފިކަން އީރާނުން އިޢުލާންކޮށްފި

މެދުއިރުމަތީގެ މަސްރަޙު ނުތަނަވަސްވެފައިވާ ދަނޑިވަޅެއްގައި، ދުނިޔޭގެ އިގްތިސާދީ އަދި އަސްކަރީ ގޮތުން އެންމެ މުހިންމު އެއް ކަނޑުގެ މަގު ކަމަށްވާ ހުރްމޫޒް ކަނޑުއޮޅި ބަންދުކޮށްފިކަން އީރާނުން އިޢުލާންކޮށްފިއެވެ.

އީރާނުގެ ދައުލަތުގެ މީޑިއާތަކުން ރިޕޯޓްކޮށްފައިވާ ގޮތުގައި، އެ ޤައުމުގެ ރިވޮލިއުޝަނަރީ ގާޑުން ވަނީ ވަކި ގޮތެއް އަންގަންދެން އެ ކަނޑުއޮޅި ބަންދުކޮށްފައިވާ ކަމަށް ބުނެފައެވެ. އީރާނުން މިފަދަ ނިންމުމެއް ނިންމީ އެމެރިކާގެ އަސްކަރީ ހަރަކާތްތަކާ ގުޅިގެންނާއި ސަރަޙައްދީ ހަމަޖެހުން ގެއްލެމުންދާތީ ކަމަށް އެ ޤައުމުން ބުނެއެވެ. މި އިޢުލާން ނެރެފައިވަނީ ޚަލީޖު ސަރަޙައްދުގައި މިސައިލާއި ޑްރޯން ހަމަލާތައް އިތުރުވެ، އަސްކަރީ ކުރިމަތިލުންތަކެއް ހިނގަމުންދާ ދަނޑިވަޅެއްގައެވެ.

މިފަހަރު ހަމަލާތައް ފެށުނީ ސައިޕްރަސްގައި ރަޖިސްޓްރީކޮށްފައިވާ، ކޮންޓެއިނަރު އުފުލާ ބޯޓެއް ހޮރްމުޒް ކަނޑުއޮޅިން "ހުއްދަނޫން މަގަކުން" ދަތުރުކުރި ކަމަށް ބުނެ އީރާނުގެ ރިވޮލިއުޝަނަރީ ގާޑުން އެ ބޯޓަށް ހަމަލާ ދިނުމުންނެވެ.

ޕާޝިއަން ގަލްފާއި އޮމާން ކަނޑު ގުޅުވައިދޭ ހުރްމޫޒް ކަނޑުއޮޅިއަކީ ދުނިޔޭގައި ބޭނުންކުރާ ތެލުގެ ފަސްބައިކުޅަ އެއްބަޔާއި، ގުދުރަތީ ގޭހުގެ ބޮޑު ބައެއް ކޮންމެ ދުވަހަކު އުފުލާ މައިގަނޑު މަގެވެ.

އީރާނުގެ ނިންމުމަށް އެމެރިކާއިން ވަނީ ވަރަށް ބޮޑަށް ފާޑުކިޔައިފައެވެ. ގިނަ ގައުމުތަކަކުން މި ހާލަތު ވަރަށް ގާތުން ބަލަމުންދާއިރު، ބައިނަލްއަގުވާމީ މުދާ އުފުލާ ކުންފުނިތަކުން ދަނީ ގަލްފު ސަރަހައްދުން ދަތުރުފަތުރު ކުރުމުގައި ހުރި ސަލާމަތީ ނުރައްކާތައް ވަޒަންކުރަމުންނެވެ.

މި ހަބަރާއެކު ދުނިޔޭގެ ބާޒާރުތަކަށް ވަނީ ވަގުތުން އޭގެ އަސަރުކޮށްފައެވެ. ވަކިން ހާއްސަކޮށް، މި ހަމަނުޖެހުން ދިގުލައިގެން ގޮސް ހަކަތަ ބޭރުކުރުމަށް ހުރަސް އެޅިދާނެ ކަމުގެ ބިރު އޮތުމުން، ދުނިޔޭގެ ބާޒާރުގައި ތެލުގެ އަގު ވަނީ އުފުލެން ފަށާފައެވެ. މީގެ ސަބަބުން މުޅި ދުނިޔޭގައި މުދާ އުފުލުމުގެ ހަރަދު ބޮޑުވެގެންދާނެ ކަމުގެ ކަންބޮޑުވުން ވަނީ އިތުރުވެފައެވެ.

މަސްރަހު އިތުރަށް ގޯސްވިޔަ ނުދިނުމަށްޓަކައި، ދުނިޔޭގެ އިސްވެރިން ދަނީ ހުރިހާ ފަރާތްތަކަކުން ވެސް ކެތްތެރިކަން އިސްކޮށް، ހާރިޖީ ގޮތުން ސުލްހަވެރި ހައްލެއް ހޯދުމަށް ގޮވާލަމުންނެވެ. މާހިރުން އިންޒާރު ދޭ ގޮތުގައި، ހާލަތު އިތުރަށް ގޯސްވެއްޖެ ނަމަ، އޭގެ އިގްތިސާދީ ނޭދެވޭ އަސަރުތައް މެދުއިރުމައްޗަށްވުރެ ބޭރަށް ފޯރައި، ތެލުގެ އަގާއި، އިންފްލޭޝަންގެ އިތުރުން މުޅި ދުނިޔޭގެ ސަޕްލައި ޗެއިނަށް ބޮޑެތި ގޮންޖެހުންތަކެއް ކުރިމަތިވާނެއެވެ.

މަސްރަހު އަދިވެސް އޮތީ ވަރަށް ނާޒުކު ހާލަތެއްގައެވެ. ނުތަނަވަސްކަން ކުޑަކުރުމަށްޓަކައި ބައިނަލްއަގުވާމީ ފެންވަރުގައި މަސައްކަތްތަކެއް ކުރެވެމުންދާއިރު، ދުނިޔޭގެ ގައުމުތަކުން ދަނީ މިކަން ވަރަށް ފަރުވާތެރިކަމާއެކު ބަލަމުންނެވެ.