ފެނަކަ އިން ކުންފުނިތަކަށް ދޭންޖެހޭ ފައިސާ ދެ އަހަރު ދުވަހުގެ ތެރޭގައި ދެއްކުމަށް މަސައްކަތް ކުރަމުންދާ ކަމަށް އެ ކުންފުނިން މިއަދު ބުނެފި އެވެ.
އެކިއެކި ކޮންޓްރެކްޓަރުންނަށް ދަރާފައިވާ އަދަދު 1.4 ބިލިއަން ރުފިޔާ އަށް އަރާފައިވާއިރު، މިއަދު ބޭއްވި ނޫސްވެރިންގެ ބައްދަލުވުމެއްގައި ފެނަކައިގެ ޗީފް ފައިނޭންޝަލް އޮފިސަރު އަލީ މުހައްމަދު ވިދާޅުވީ ކުންފުނީގެ ކޭޝްފްލޯ މެނޭޖް ކުރެވިއްޖެނަމަ ހަރަދު ކުޑަކުރުމުގެ އިތުރު ޕްލޭންތަކާ ނުލާ ދެ އަހަރު ދުވަހުގެ ތެރޭގައި ފެނަކަ އިން ކުންފުނިތަކަށް ދައްކަންޖެހޭ ފައިސާ ދެއްކޭނެ ކަމަށް ލަފާކުރެވޭ ކަމަށެވެ.
"އެއީ އަދި ހަރަދު ކުޑަކުރުމުގެ ޕްލޭންތައް ތަންފީޒުނުކޮށް. ހަރަދުތައް މެނޭޖް ކުރެވިއްޖެނަމަ އެއަށް ވުރެ ވެސް އަވަހަށް އަޅުގަނޑުމެންނަށް އެ ފައިސާ ދެއްކޭނެ ކަމަށް ބެލެވެނީ،" ފެނަކައިގެ ސީއެފްއޯ ވިދާޅުވި އެވެ.
ފެނަކައިގެ މެނޭޖިން ޑިރެކްޓަރު މުއާޒު މުހައްމަދު ރަޝީދު ވިދާޅުވީ ފެނަކައިން ގާތްގަނޑަކަށް 8 ކުންފުންޏަކަށް ފައިސާ ދޭން ޖެހިފައިވާ ކަމަށާއި ނަމަވެސް އޭގެތެރެއިން ގިނަ ކުންފުނިތަކަށް ދޭންޖެހޭ ފައިސާގެ އަދަދު މަދު ކަމަށެވެ. އަދި އަމާޒަކީ ފައިސާ ދައްކާއިރު ވީހާވެސް ގިނަ ފަރާތްތަކަކަށް ފައިސާ ދެވޭނެ އިންތިޒާމެއްގެ ތެރެއިން ކަންކަން ކުރުން ކަމަށާއި ފައިސާ ދައްކާއިރު އިސްކަން ދޭނީ ފެނަކަ އިން އާންމުކޮށް ހިދުމަތް ހޯދަންޖެހޭ ފަރާތްތަކަށް ކަމަށް މުއާޒު ވިދާޅުވި އެވެ.
ކުންފުނި މިހާ ދަށު ދަރަޖައަކަށް ދާން މެދުވެރިވާ ވަރަށް ގިނަ ސަބަބުތައް ހުރިކަން ފާހަގަކުރައްވަމުން އޭނާ ވިދާޅުވީ، ކުންފުނީގެ ދަރަނި ވަރަށް ބޮޑު ކަމަށެވެ.
އެ ކުންފުނީގެ ލޯނުގެ ގޮތުގައި 871 މިލިއަން ރުފިޔާ އައޮތެވެ. އެކި އެކި ފަރާތްތަކަށް ދޭންޖެހޭ ފައިސާ 3.2 ބިލިއަން ރުފިޔާއަށް އަރާއިރު، ކުންފުނީގެ ދަރަނި ޖުމްލަ 4.16 ބިލިއަން ރުފިޔާއަށް އަރައެެވެ.
އެގޮތުން އިންހައުސްކޮށް ގިނަ އަދަދެއްގެ ޕްރޮޖެކްޓްތައް ހިންގަމުން ގޮސްފައިވާއިރު، އޭގެ ނަތީޖާއެއްގެ ގޮތުުން ކުންފުންޏަށް ވަރަށް ބޮޑު ގެއްލުމެއް ކުރިމަތިވި ކަމަށް އޭނާ ވިދާޅުވިއެވެ. އެގޮތުން މިފަދަ މަޝްރޫއުތަކުގެ ތެރެއަށް ވަދެފައި ވަނީ ބޯޑުގެ ނިންމުމެއް ނެތި ކަމަށް އޭނާ ވިދާޅުވިއެވެ. އޭނާ ފާހަގަކުރެއްވި ގޮތުގައި މިވަގުތުވެސް އިންހައުސް ޕްރޮޖެކްޓްގެ ގޮތުގައި 60 ޕްރޮޖެކްޓް އޮތްއިރު، ގިނަ ޕްރޮޖެކްޓްތައް ހުރީ ހުއްޓިފައެވެ.
"އިން ހައުސް ޕްރޮޖެކްޓްތައް، މިސާލަކަށް ކުންފުނީގެ ފަރާތުން ކޮންސްޓްރަކްޝަން ޕްރޮޖެކްޓްގެ ތެރެއަށް ވަންއިރުގައި އެއްވެސް ގޮތަކަށް އަޅުގަނޑުމެންނަށް ފާހަގަކުރެވިފައެއް ނެތް ބޯޑުން އެއްވެސް ގޮތަކަށް ނިންމާފައި، އޮތް ނިންމުމެއް، އަޅުަގަނޑުމެންނަކަށް އަދި ފެންނާކަށެއް ނެތް، އެހެންވީމަ ބޯޑުގެ އެޕްރޫވަލް ނެތި، މިވަރުގެ ބޮޑު ނިންމުމެއް ކުންފުނީގެ މެނޭޖްމެންޓަށް ނިންމިދާނެކަމާއި މެދުވެސް އަޅުގަނޑުމެންނަށް ސުވާލު އުފެދޭ،".
މިގޮތުން އޭނާ ވިދާޅުވީ، މި ޕްރޮޖެކްޓްތަކުގެ މެޓީރިއަލް ކޯސްޓާއި، ލޮޖިސްޓިކްސް އަދި ސްޓާފް ކޯސްޓަށް އެކަނި 923 މިލިއަން ރުފިޔާ ހަރަދުކޮށްފައިވާ ކަމަށެވެ. އޭގެ ތެެރެއިން ގިނަ ޕްރޮޖެކްޓްތައް ނުނިމޭ ކަމަށް އޭނާ ވިދާުޅުވިއެވެ.
އަދި މާކެޓް އަގުގައި ބަޔަކާއި ހަވާލުކޮށްގެން 23 މިލިއަން ރުފިޔާއަށް ނިންމޭ ޕްރޮޖެކްޓްތައް ކުރިއަށް ގެންގޮސްފައިވާގޮތުން އެ ޕްރޮޖެކްޓްތައް ނިމޭއިރު 115 މިލިއަން ހަރަދުވާ ކަމަށް މުއާޒް ވިދާޅުވިއެވެ.
"19.8 މިލިއަން ރުފިޔާއަށް އެޅޭ ބިލްޑިންގއެއް، ނިމޭއިރުގައި ހަމައެކަނި އެސްޓިމޭޓަކީ 159 މިލިއަން ރުފިޔާ ދާތީ،". އޭނާ ވިދާޅުވިއެވެ.
