ގުޅިގެން މަސައްކަތްކޮށްފިނަމަ މާލެއަކީ ވިލުންތެރި ސިޓީއަކަށް ހެދިދާނެ: މޭޔަރު އާޒިމް

އެންމެން ގުޅިގެން މަސައްކަތްކޮށްފިނަމަ، މާލެއަކީ ރައްކާތެރި ގެދޮރުތަކެއް ހިމެނޭ، ބަދަހި މުޖުތަމަޢެއް އޮތް އަދި ކާރިސާތަކަށް ވިލުންތެރި ސިޓީއަކަށް ހެދިދާނެ ކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.

މޭޔަރު މިހެން ވިދާޅުވީ މިއަހަރުގެ ބައިނަލްއަޤްވާމީ ކާރިސާތަކުގެ ނުރައްކާ ކުޑަކުރުމުގެ ދުވަހާ ގުޅިގެން މާލެ ސިޓީ ކައުންސިލުން ދެއްވި މެސެޖުގައެވެ. މިއަހަރުގެ މި ދުވަހުގެ ޝިޢާރެއްގެ ގޮތުގައި ކަނޑައަޅާފައިވަނީ "ވިލުންވެރިކަން ފެށެނީ އަމިއްލަ ގޭބިސީން" މިއެވެ.

މޭޔަރު ވިދާޅުވީ ވިލުންވެރިކަން އިތުރުކުރުމަކީ ކޮންމެ މީހެއްގެވެސް ފަރުދީ އަދި އިޖުތިމާޢީ ޒިންމާއެއް ކަމަށެވެ. އަދި ރައްކާތެރި، ވިލުންވެރި ސިޓީއެއް ބިނާކުރުމުގެ އެންމެ ފުރަތަމަ ބިންގަލަކީ ރައްކާތެރި ގެދޮރާއި ކާރިސާތަކަށް ފުރިހަމައަށް ތައްޔާރުވެފައިވާ މުޖުތަމަޢުތައް ކަމުގައި މޭޔަރު ފާހަގަކުރެއްވިއެވެ.

މީގެއިތުރުން، ބައިނަލްއަޤްވާމީ ކާރިސާތަކުގެ ނުރައްކާ ކުޑަކުރުމުގެ ދުވަހުގެ މުނާސަބަތުގައި، ކާރިސާތަކުން ލިބޭ ގެއްލުންތަކަށް ކެތްކުރެވޭ ފަދަ ވަރުގަދަ ބިނާވެށިތަކެއް ބިނާކުރުމަށް ބާރުއަޅައި، ކާރިސާތަކަށް ތައްޔާރުވުމުގެ ރޫޙު އާލާކުރުމަށް މޭޔަރު ވަނީ ގޮވާލައްވާފައެވެ. އަދި ކޮންމެ ގެދޮރަކީވެސް ކާރިސާތަކުގެ އިންޒާރު ވަގުތުން ލިބޭނެ އިންތިޒާމު ހަމަޖެހިފައިވާ، އަދި ރައްކާތެރިކަން ކަށަވަރުކުރުމަށް ބޭނުންވާ މަޢުލޫމާތާއި ހޭލުންތެރިކަން ލިބިފައިވާ ތަނަކަށް ހެދުމަށް އެންމެން އެކުގައި މަސައްކަތް ކުރުމަށްވެސް އެދިވަޑައިގެންނެވިއެވެ.

ދިވެހިރާއްޖޭގެ ވެރިރަށް މާލެއަކީ ދުނިޔޭގެ ނިސްބަތުންވެސް އެންމެ ބޮޑަށް ތޮއްޖެހިފައިވާ އެއް ސިޓީއަށް ވުމާއެކު، ތަފާތު އެކި ކާރިސާތަކުގެ ނުރައްކާ މި ސިޓީއަށް އޮތް މިންވަރު ބޮޑެވެ. ޚާއްޞަކޮށް މޫސުމަށް އަންނަ ބަދަލުތަކުގެ ސަބަބުން ވިއްސާރަ މޫސުމުގައި މާލޭގެ މަގުތަކުގައި ފެންބޮޑުވުމާއި، ތޮއްޖެހިފައިވާ ޢިމާރާތްތަކުގެ ސަބަބުން ހިނގާ ނުރައްކާތެރި އަލިފާނުގެ ހާދިސާތަކަކީ ފަހަކަށް އައިސް މާލެއަށް ކުރިމަތިވަމުންދާ އެންމެ ބޮޑެތި ގޮންޖެހުންތަކެވެ.

މިފަދަ ހާދިސާތަކުން ލިބޭ ގެއްލުންތައް ކުޑަކުރުމަށްޓަކައި ސަރުކާރާއި މާލެ ސިޓީ ކައުންސިލް ގުޅިގެން ފެންހިންދާ ނިޒާމުތައް ހަރުދަނާކުރުމާއި، އަލިފާނުގެ ހާދިސާތަކުން ރައްކާތެރިވުމަށް ޢިމާރާތްތަކުގެ ފެންވަރު ބެލުމާއި، ޢާންމުން ހޭލުންތެރިކުރުމުގެ ގިނަ ޕްރޮގްރާމްތަކެއް ދަނީ ހިންގަމުންނެވެ. އެހެންނަމަވެސް، މިފަދަ ކަންކަމުގައި ކާމިޔާބީ ޙާޞިލުކުރެވޭނީ ސަރުކާރުގެ އިދާރާތަކުގެ އިތުރުން ވަކިވަކި ފަރުދުންނާއި ޢާއިލާތަކުންވެސް އެކަމަށް ދޭ އަހައްމިއްޔަތުކަން އިތުރުވެގެން ކަމަށް ކަމާބެހޭ މާހިރުން އަބަދުވެސް ފާހަގަކުރެއެވެ.