ސިޔާސީ ވެރިންނަށް ރައީސް ޔާމީންގެ ސުވާލެއް: "ތި ތިއްބެވީ ރައްޔިތުންގެ ފަޅީގައިތޯ؟"

ޤައުމުގެ ކަންކަން ދުވަހެއް ދުވަހަކަށް ދަށަށް ގޮސް، ރައްޔިތުންނަށް ދަތިވާ އެތައް ކަމެއް ސަރުކާރުން ކުރަމުންދާއިރު ވެސް، ޤައުމުގައި ތިއްބެވި ސިޔާސީ ލީޑަރުން ހަނު ތިއްބަވާތީ ކުރީގެ ރައީސް އަދި ޕީޕަލްސް ނެޝަނަލް ފްރަންޓް (ޕީއެންއެފް) ގެ މުއައްސިސް ރައީސް ޢަބްދުﷲ ޔާމީން ޢަބްދުލްޤައްޔޫމް ސިޔާސީ ވެރިންނަށް ވަރުގަދަ ފާޑުވިދާޅުވުމެއް އަމާޒުކުރައްވައިފިއެވެ.

ހޮނިހިރު ދުވަހުގެރޭ އައްޑޫ ސިޓީ ފޭދޫގައި ޕީއެންއެފުން ބޭއްވި ޚާއްޞަ ޖަލްސާގައި ވާހަކަފުޅު ދައްކަވަމުން ރައީސް ޔާމީން ވަނީ، މިއަދުގެ ސިޔާސީ ވެރިންނާ މެދު ސުވާލު އުފައްދަވާފައެވެ. އެމަނިކުފާނު ވިދާޅުވީ، މިއަދު ސިޔާސީ މައިދާނުގައި ތިއްބެވި ލީޑަރުންނާ ކުރައްވަން އޮތް އެންމެ ބޮޑު ސުވާލަކީ އެ ބޭފުޅުން މިއަދު ތިއްބެވީ ސީދާ ރައްޔިތުންގެ ފަޅީގައިތޯ ކުރެވޭ ސުވާލު ކަމަށެވެ. އަދި އެ ބޭފުޅުން ރައްޔިތުންގެ ފަޅީގައި ތިއްބެވި ކަމާމެދު ވަރަށް ބޮޑަށް ޝައްކު އުފެދޭ ކަމަށް ވެސް އެމަނިކުފާނު ވިދާޅުވިއެވެ.

ރައީސް ޔާމީން ތުހުމަތު ކުރެއްވި ގޮތުގައި، ޤައުމުގެ ހާލަތު އިންތިހާއަށް ގޯސްވެ، ރައްޔިތުންގެ މުދަލާއި ފައިސާއަށް ވެރިން އިހުމާލުވަމުންދާއިރު ވެސް، ސިޔާސީ ލީޑަރުން މިހާރު ތިއްބެވީ ސަރުކާރާއެކު "ބައިއަތު ހިފައިގެން" ނެވެ. އަދި ލީޑަރުން ރައްޔިތުންގެ ހައްޤުތައް އެއްކިބާކޮށް، އަމިއްލަ އެދުމާއި ޒާތީ މަންފާ އިސްކުރައްވާފައިވާ ކަމަށް ވިދާޅުވެ އެމަނިކުފާނު ވަނީ ވަރަށް ބޮޑަށް ކަންބޮޑުވުން ފާޅުކުރައްވާފައެވެ.

ޤައުމުގެ ޙާލަތު ދުވަހެއް ދުވަހަކަށް ދަށަށްދާ ކަމަށާއި، ރައްޔިތުންގެ ދިރިއުޅުމަށް ދަތިވާނޭހެން ސަރުކާރުން ކަންކަން ކުރަމުންދާ ކަމަށް ރައީސް ޔާމީން ވިދާޅުވެއްޖެއެވެ.

އެމަނިކުފާނު ވިދާޅުވީ، ދައުލަތުގެ މުދަލާއި ޚަޒާނާ ބެލެހެއްޓުމުގައި ވެރިން ވަރަށް ބޮޑަށް އިހުމާލުވަމުންދާ ކަމަށެވެ. އަދި މިފަދަ ނާޒުކު ދަނޑިވަޅެއްގައި ސިޔާސީ ލީޑަރުންގެ ޒިންމާއަކީ ރައްޔިތުންގެ ޙައްޤުތައް ޙިމާޔަތްކުރުމަށް ނުކުމެ ވެރިން ޒިންމާދާރު ކުރުވުން ކަމުގައި ވިޔަސް، މިއަދު އެ މަންޒަރު ފެންނަމުން ނުދާ ކަމަށް ވެސް ރައީސް ޔާމީން ފާހަގަކުރެއްވިއެވެ.

ޤައުމުގެ އިޤްތިޞާދީ އަދި އިޖުތިމާޢީ ހާލަތަށް އަލިއަޅުއްވާލައްވަމުން އެމަނިކުފާނު ފާހަގަކުރެއްވި ގޮތުގައި، ވެރިކަން ކުރާ ފަރާތްތަކުން ޤައުމުގެ މިސްރާބު ގޯސް މަގަކަށް ގެންދާއިރު އިދިކޮޅު ފަރާތްތަކާއި އެހެނިހެން ސިޔާސީ ޕާޓީތަކުގެ ލީޑަރުން ހަނު ތިއްބެވުމަކީ ޤައުމަށް ވެވޭ ބޮޑު ޚިޔާނާތެކެވެ. ރައްޔިތުންނަށް ދިމާވާ ދަތި އުނދަގޫތަކުގެ ވާހަކަ ދައްކައި، ސަރުކާރު ހަމަމަގަށް އެޅުވުމަކީ ސިޔާސީ ލީޑަރެއްގެ އެންމެ އިސް ވާޖިބު ކަމުގައި އެމަނިކުފާނު ވިދާޅުވިއެވެ.

ރައީސް ޔާމީން އިތުރަށް ވިދާޅުވީ، އެހެން ސިޔާސީ ލީޑަރުން ފަހަތަށް ޖެހިވަޑައިގެންނެވި ނަމަވެސް، ދިވެހި ރައްޔިތުންގެ ހައްޤުގައި އެމަނިކުފާނާއި ޕީއެންއެފުން ކުރަމުންދާ މަސައްކަތް އެއްވެސް މިންވަރަކަށް ހުއްޓަވައިނުލައްވާނެ ކަމަށެވެ. އަދި ރައްޔިތުންނަށް ދިމާވާ ކޮންމެ ނިކަމެތި ކަމެއްގައި އަޑުއުފުއްލަވައި، ވެރިން ޖަވާބުދާރީ ކުރުވުމުގައި ސާބިތުކަމާއެކު ދެމިހުންނަވާނެ ކަމުގެ ޔަޤީންކަން ވެސް އެމަނިކުފާނު ވަނީ ދެއްވާފައެވެ.

ރައީސް ޔާމީން މިފަދައިން ވިދާޅުވެފައިވާއިރު، މިހާރުގެ ސަރުކާރުގެ ބައެއް ސިޔާސަތުތަކާ ގުޅިގެން ޕީއެންއެފުން އަންނަނީ ސިލްސިލާކޮށް ޖަލްސާތައް ބާއްވައި، ސަރުކާރުގެ ވެރިންނަށް ވަރަށް ބޮޑަށް ފާޑުކިޔަމުންނެވެ. އަދި އެހެން ސިޔާސީ ޕާޓީތަކުން ސަރުކާރާ މެދު އެކަށީގެންވާ ވަރަށް އިދިކޮޅު ހަރަކާތްތައް ނުހިންގާ ކަމަށް ބުނެ ޢާންމުންގެ ތެރޭގައި ވެސް ޚިޔާލުތަފާތުވުންތައް ވަނީ އުފެދިފައެވެ.