ޣައްޒާގެ އުތުރަށް ނިސްބަތްވާ އާންމުންނަށް އެމީހުންގެ ގެދޮރަށް އެނބުރި އައުމުގެ ފުރުސަތު ނުދޭނޭ ކަމަށް އިސްރާއީލު އަސްކަރިއްޔާއިން ބުނެފިއެވެ.
އިސްރާއީލު އަސްކަރިއްޔާއިން ބޭއްވި މީޑިއާ ބްރީފިންއަކާ ހަވާލާދީ އިސްރާއީލުގެ ބްރޯޑްކާސްޓިންގ އޮތޯރިޓީން ބުނެފައިވަނީ، ޣައްޒާގެ އުތުރުގައި އާންމުންގެ އެއްވެސް މީހަކު ނެތި އެއްކޮށް "ހުސްވުމުންނޫނީ" ޣައްޒާގެ ދެކުނު ފަޅިއަށް އިންސާނީ އެއްވެސް އެހީއެއް އެތެރެކުރަން ހުއްދަ ނުދޭނޭ ކަމަށެވެ.
މިއީ، އިސްރާއީލުން ބޭނުންވެގެން އުޅެނީ ޣައްޒާގެ އުތުރުފަޅި ހިފައި، ދާއިމީގޮތެއްގައި އިސްތިއުމާރު ކުރަންކަން ރަސްމީ ގޮތެއްގައި ހާމަކުރި ފުރަތަމަ ފަހަރެވެ.
އިސްރާއީލު އަސްކަރިއްޔާގެ ޕްލޭނަކީ، ޣައްޒާގެ ވެރިކަންކުރާ ގާޒާ ސިޓީގެ މެދުން ބޯޑަރެއް ހަދައި، ޣައްޒާގެ އުތުރުވަޅި އެއްކޮށް ވަކިކޮށް އިސްރާއީލުގެ ބިމުގެ ބަޔަކަށް ހެދުމަށެވެ.
އިސްތިއުމާރީ އިސްރާއީލުން ޣައްޒާގެ އުތުރު އެއްކޮށް ބަންދުކޮށްގެން އުޅޭތާ އެތައް ދުވަހެއް ވެއްޖެއެވެ.
ޣައްޒާގެ އުތުރުފަޅި ބަންދުކުރިއިރު ހަތަރު ލައްކައެއްހާ އާންމުން ތިބި ނަމަވެސް، މިހާރު ތިބީ 95،000 އެއްހާ އާންމުންނެވެ.
ޣައްޒާގެ އުތުރު ބަންދުކޮށް، އިންސާނީ އެއްވެސް އެހީއެއް އެތެރެކުރިޔަނުދީ ގެންދަނީ، އާންމުން ބަނޑަށް މަރަމުންނެވެ. ނުވިތާކަށް ރެއާއި ދުވާލު ޣައްޒާގެ އުތުރުގެ ހުރިހާ ހިސާބަކަށް ބޮންއަޅައި ކޮންމެ ދުވަހަކު އެތައްބަޔަކު ޝަހީދު ކުރަމުން ގެންދެއެވެ.
މިދިޔަ މަސްދުވަހުގެ ތެރޭގައި އެކަނިވެސް ޣައްޒާގެ އުތުރަށް ދިން ހަމަލާތަކުގައި 1،300 މީހުން ޝަހީދުވެފައިވާއިރު، އެތައްސަތޭކަ ބަޔަކު ޒަޚަމްކޮށްލާފައި ވެއެވެ. އެ މުއްދަތުގެ ތެރޭގައި އެތައްލައްކަމީހުން ގެދޮރުންނެރެ މަގުމަތިކޮށްލާފައި ވެއެވެ.
އެންމެ ވަރުގަދައަށް ބޮންއަޅައި، އެއްގަމުން ސިފައިން އަރައި ބޮޑެތި ލާއިންސާނީ ޖަރީމާތައް ހިންގަމުންގެންދަނީ ޣައްޒާގެ އުތުރުގެ ސިޓީތައް ކަމަށްވާ ބައިތު ލާހިޔާ، ޖަބަލިއާފަދަ ރަށްތަކުގައެވެ.
އދގެ އިންސާނީ ހައްގުތަކާބެހޭ ވެރިޔާ ޖޮއިސޭ އެމްސޫޔާ ވިދާޅުވީ، މުޅި ދުނިޔޭގެ އެންމެން ބަލަންތިއްބާ އިސްރާއީލުން ޣައްޒާ ބަނޑަށްޖައްސަމުންދާ ކަމަށެވެ. އަދި އިސްރާއީލުން ޣައްޒާގެ އުތުރު، އާންމުންނާއެކު ވަށާލައި ބަންދުކޮށްފައި އޮތް އޮތުމަކީ ވަރަށް އަނިޔާވެރި ކަމެއް ކަމަށްވެސް ވިދާޅުވިއެވެ.
ފަލަސްތީނު ރެފިއުޖީންނަށް އެހީތެރިވާން އުފައްދާފައިވާ އދގެ އޭޖެންސީގެ ސްޓާފެއް ކަމަށްވާ ލުއިޒް ވޯޓަރރިޖް ވިދާޅުވީ، ޣައްޒާގެ ކޮންމެ ދިމާއަކުން ބަލާލިޔަސް ފެންނަނީ، ގެދޮރާއި، ހޮސްޕިޓަލްތަކާއި، ސްކޫލްތަކާއި، ސިއްހީ ޚިދުމަތްދޭ ކްލިނިކްތަކާއި، މިސްކިތްތަކާއި، އެޕާޓްމަންޓް އިމާރާތްތައް އެއްކޮށް ބިމާހަމަކޮށްލާފައިވާ މަންޒަރު ކަމަށެވެ. އޭނާ ވިދާޅުވީ، ޣައްޒާގެ މުޅި އުތުރު މިހާރު ފެންނަނީ ވީރާނާވެފައިވާ "ގަބުރުސްތާނެއް ފަދައިން" ކަމަށެވެ.
