ގައުމަށް ދިމާވެފައިވާ މާލީގޮތުން ދަތި މި ހާލަތުގައި ވެސް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިސްނެންގެވުމާ ބެއްލެވުމުގެ ދަށުން، ސިއްހީ ދާއިރާއަށް މުހިއްމު އިންވެސްޓްތަކެއް ކުރަމުންދާ ކަމަށް ހެލްތު މިނިސްޓަރު އަބްދުﷲ ނާޒިމް ވިދާޅުވެއްޖެއެވެ.
އެންޓިމައިކްރޯބިއަލް ރެޒިސްޓެންސް (އޭއެމްއާރް) އާ ބެހޭ ގައުމީ އެކްޝަން ޕްލޭން އިފްތިތާހު ކުރުމަށް މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ވިދާޅުވީ މިއަދު މުޅި ދުނިޔެވެސް ހެލްތު އެޖެންޑާގަ އެންމެ ބޮޑު އެއް ގޮންޖެހުމެއްގެ ގޮތުގައި ފާޙަގަކުރާ އެއް ކަމަކީ އެންޓި މައިކްރޯބިއަލް ރެޒިސްޓެންސްގެ މައްސަލަ ކަމަށެވެ.
އޭއެމްއާރް ކޮންޓްރޯލް ކުރަން ހުރި ގޮންޖެހުންތަކަކީ ވަކި ގައުމެއް ތަފާތުކުރުމެއް ނެތި އެ ގޮންޖެހުންތައް މުޅި ދުނިޔެއަށް ކުރިމަތިކުރުވަމުންދާ ކަމެއް ކަން ފާހަގަކުރައްވާ މިނިސްޓަރު ވިދާޅުވީ ދުނިޔޭގެ ހެލްތު އެޖެންޑާގައި މިކަމަށް ދަނީ ގިނަގުނަ ފިޔަވަޅުތަކެއް އަޅަމުން ކަމަށެވެ.
އަދި މި މަސައްކަތަކީ މަލްޓި-ސެކްޓޯރަލް ކޮށް ކުރަންޖެހޭ މަސައްކަތަކަށް ވުމާއެކު ގައުމުތަކުގެ އެންމެ މަތީ ލެވެލްގެ ލީޑަރޝިޕްގެ އެންގޭޖްމަންޓް މިކަމަށް ބޭނުންވާ ކަން ޑަބްލިއުއެޗްއޯގެ އިތުރުން ޔޫއެންގެ އޭޖެންސީތަކުން ދަނީ ތަފާތު މަރުހަލާތަކުގައި ފާހަގަކުރަމުން ކަމަށެވެ.
ޚާއްސަކޮށް އަޅުގަނޑު ފާހަގަކޮށްލަން ބޭނުންވަނީ މިއަހަރު މިކަމާ ގުޅިގެން ޔޫއެންގެ އެންމެ ހައި ލެވެލް ބައްދަލުވުމެއް ބޭއްވިފަވޭ. ވަރަށް އުފަލާއެކު ފާހަގަކުރާ އެއް ކަމަކީ މި މުހިއްމު ހައި ލެވެލް ބައްދަލުވުމުގައި ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެތަނަށް ވަޑައިގެން، ދިވެހިރާއްޖެ، ދިވެހި ރައްޔިތުންގެ ސިއްހަތަށް މިކަމުގައި ހުރި ގޮންޖެހުންތަކުގެ ސީރިއަސްކަން އެމަނިކުފާނު ހާމަކޮށްދީފައިވުން.: ހެލްތު މިނިސްޓަރު
މިނިސްޓަރު ނާޒިމް ވިދާޅުވީ މިކަމުން އަންގައިދެނީ ދިވެހިންގެ ސިއްހަތާ ގުޅޭ މިފަދަ ކޮންމެ ކަމެއްގައި ދިވެހި ސަރުކާރުން އެކަމަށް ދޭ އަހައްމިއްޔަތާ ސީރިއަސްކަން ކަމަށެވެ. ޚުދު ރައީސް ވަޑައިގެން އެ މަހާސިންތާގައި ބައިވެރިވެވަޑައިގަތުމުން އެކަން ވަރަށް ރަނގަޅަށް ސާބިތުވެގެން ގޮސްފައިވާ ކަމަށް ވެސް މިނިސްޓަރު ވިދާޅުވިއެވެ.
ދިވެހިންގެ ސިއްހަތާ ގުޅޭ ކޮންމެ ކަމެއްގައި އެމަނިކުފާނު ނަމޫނާ ދައްކަވަމުން ގެންދަވާކަން ފާހަގަކުރައްވާ މިނިސްޓަރު ވިދާޅުވީ މި އިގްތިސާދީ ގޮތުން ދަތި ހާލަތުގައި ވެސް ސިއްހީ ދާއިރާއަށް ވަރަށް ބޮޑެތި އިންވެސްޓްތަކެއް މި ސަރުކާރުން ކުރަމުން ދާ ކަމަށެވެ.
އެގޮތުން އެ ދާއިރާގެ ގަވަރނަންސް ހަރުދަނާ ކުރުމާ އޭގެ ލީގަލް ރިފޯމް ހަރުދަނާ ކުރުމަށް ގިނަގުނަ މަސައްކަތްތަކެއް ސަރުކާރުގެ ތެރެއިން ސީދާ ރައީސްގެ ބެއްލެވުމުގެ ދަށުން ކުރިއަށް ގެންދަވާ ކަން މިނިސްޓަރު ނާޒިމް ފާހަގަކުރެއްވިއެވެ.
މިނިސްޓަރު ވިދާޅުވީ މީގެ ދެދުވަސް ކުރިން އެންމެ ފަހުން ބޭއްވުނު ކެބިނެޓް ބައްދަލުވުމުގައި ވެސް ސިއްހީ ދާއިރާއާ ސީދާ ގުޅޭ ތިން ކަރުދާހަކަށް މަޝްވަރާ ކުރައްވާ މުހިއްމު ނިންމެވުންތަކެއް ރައީސް ނިންމަވާދެއްވާފައިވާ ކަމަށެވެ. އެގޮތުން އޭޝިއާ ފޯރަމް އޮން ހެލްތު އެންޑް ދި އެންވަޔަރަމަންޓުގެ މެންބަރު ގައުމެއްގެ ގޮތުގައި ދިވެހިރާއްޖެއިން ބައިވެރިވުމަށް ނިންމެވިކަން މިނިސްޓަރު ހާމަކުރެއްވިއެވެ.
މި ފޯރަމްގެ މެންބަރު ގައުމަކަށް ދިވެހިރާއްޖެ ވުމާއެކު މިކަމުގައި ލިބެންޖެހޭ ޓެކްނިކަލް އަދި އެކި ގޮތްގޮތުން ލިބެންޖެހޭ އެހީ ލިބުމުގެ ފުރުސަތު އިތުރުވެގެން ދާނެ ކަމަށް ވެސް މިނިސްޓަރު ވިދާޅުވިއެވެ.
އެންޓިމައިކްރޯބިއަލްސް އަކީ ޖަރާސީމު (ބެކްޓީރިޔާ، ވައިރަސް، ފަންގަސް އަދި ޕެރަސައިޓް) ގެ ޒަރިއްޔާއިން ޖެހޭ ބަލިތަކަށް ފަރުވާއެއްގެ ގޮތުން ދެވޭ ބޭސްތަކަށް ކިޔާ ނަމެކެވެ. "އެންޓިމައިކްރޯބިއަލްސް ރެސިސްޓަންސް" އުފެދުމޭ ކިޔަނީ އެންޓިމައިކްރޯބިއަލް ބޭސްތަކަށް ޖަރާސީމު ހޭނި އެފަދަ ޖަރާސީމުތަކުގެ ސަބަބުން ޖެހޭ ބަލިތަކަށް ފަރުވާކުރުމުގައި އެބޭސްތައް އަސަރު ނުކުރާގޮތް ވުމަށެވެ.
