ޒަކާތު ފަންޑުން ޖުލައިމަހު 140 ފަރާތަކަށް އެހީ ފޯރުކޮށްދީފައިވާކަމަށް ޒަކާތު ހައުސްއިން އާއްމުކޮށްފައިވާ ޖުލައިމަހުގެ ތަފާސްހިސާބުތަކުން ދައްކައިފިއެވެ.
ޒަކާތު ހައުސްއިން އާއްމުކޮށްފައިވާ ޖުލައިމަހުގެ ތަފާސްހިސާބުތަކަށް ބަލާއިރު ކެންސަރު ބައްޔަށް ފަރުވާ ހޯދަމުންދާ ފަރާތްތަކަށް އެހީގެ ގޮތުގައި 373،164 ރުފިޔާވަނީ ދޫކުރެވިފައެވެ. ޒަކާތު ފަންޑުން އިތުރު އެހީތައް ދީފައިވާ މިންވަރަށް ބަލާއިރު ހިތުގެ އޮޕަރޭޝަންކުރުމަށް 161،139 ރުފިޔާ، ކިޑްނީ ބަލިތަކަށް 93،291 ރުފިޔާ، ގުނަވަން ބަދަލުކުރުމަށް 50،886 ރުފިޔާ، ސިކުނޑީގެ އޮޕަރޭޝަންތަކަށް 67،848 ރުފިޔާ އަދި އެހެނިހެން ބަލިތަކަށް 462،607 ރުފިޔާގެ އެހީވަނީ ފޯރުކޮށްދީފައެވެ.
ޖޫންމަހު ޖުމްލަ 1.05 މިލިޔަން ރުފިޔާ ހަރަދުކޮށްފައިވާއިރު އެމަހުގެތެރޭ އެހީގެގޮތުގައި ހަމަޖެހިފައިވަނީ ޖުމްލަ 1.2 މިލިއަން ރުފިޔާއެވެ.
އެހެނިހެން ހަރަދުތަތަކުގެ ގޮތުގައި ޒަކާތު ފަންޑުން 342،105 ރުފިޔާ ހޭދަކޮށްފައިވާއިރު މި ހަރަދުތަކުގެތެރޭގައި ހިމެނެނީ ޒަކާތުގެ މަސައްކަތްކުރުމަށް ޒަކާތު ފަންޑުން މުސާރަ ދޭގޮތަށް ނަގާފައިވާ މުވައްޒަފުންގެ އުޖޫރަދިނުމަށް ޢާމިލުންގެ ބައިން ކުރެވިފައިވާ ހަރަދާއި 2018 ވަނަ އަހަރު ސްކޮލަރޝިޕް އެވޯޑުކުރެވިފައިވާ ދަރިވަރުންގެ ތެރެއިން ކިޔެވުން ކުރިއަށްދާ ދަރިވެރެއްގެ ކޯސް ފީ އަދި ސްޓައިޕެންޑު ދިނުމަށް ރާއްޖެއާއި ރާއްޖެއިން ބޭރުން ކިޔެވުމަށް އެހީދެވޭ ބައިން ކުރެވިފައިވާ ހަރަދެވެ.
މީގެ އިތުރުން ދަރަނި އަދާކުރުމަށް 50،000 ރުފިޔާ ދޫކުރެވިފައިވާއިރު ޖުލައިމަހު އަލަށް އިސްލާމްވެފައިވާ ފަރާތްތަކާއި އިސްލާމްވެދާނެކަމަށް އުއްމީދުކުރެވޭ ފަރާތްތަކަށް އަމާޒުކޮށްގެން ހިންގި ޕްރޮގްރާމުތަކަށް 3،500 ރުފިޔާ ހަރަދުވެފައިވެެއެވެ.
ރައީސުލްޖުމްހޫރިއްޔާގެ ރިޔާސީ މެނިފެސްޓޯގައިވާގޮތަށް ޒަކާތާބެހޭ މުސްތަގިއްލު ވަކި މުވައްސަސާއެއްގެ ގޮތުގައި "ދިވެހިރާއްޖޭގެ ޒަކާތު ހައުސް" ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރަސްމީކޮށް އިފުތިތާޙުކޮށްދެއްވީ މިއަހަރުގެ ޖަނަވަރީމަހުގެ ތެރޭގައެވެ.
ދިވެހިރާއްޖޭގެ ޒަކާތު ހައުސްގެ ނަމުގައި ސަރުކާރުގެ އިދާރާއެއް ގާއިމުކުރެއްވީ، ދިވެހިރާއްޖޭގެ ޒަކާތުގެ ނިޒާމު ހަރުދަނާކުރުމުގެ މަސައްކަތާއި، ޒަކާތުގެ ނަފާ އޭގެ ބެހެނިވެރިންނަށް ފުޅާ ދާއިރާއެއްގައި ލިބޭނެގޮތަށް ޒަކާތު ފަންޑު ތަރައްޤީކުރުމުގެ ބޭނުމުގައެވެ.
