ގްރޭޓަރ މާލޭ ސަރަހައްދުގެ މިސްކިތްތައް އޭސީ ކުރުމުގެ އަމަލީ މަސައްކަތް ސްޓެލްކޯއިން ފަށައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތްވާ ގޮތުގެ މަތިން، މާލެ ސަރަހައްދުގެ ބޮޑެތި މިސްކިތްތައް ފިނިކުރުމަށް ސަރުކާރުން ކުރިއަށްގެންދާ މަޝްރޫޢުގެ އަމަލީ މަސައްކަތްތައް ސްޓެލްކޯއިން މިއަދު ރަސްމީކޮށް ފަށައިފިއެވެ.

މި މަޝްރޫޢަކީ 800 މީހުންނަށްވުރެ ގިނަ މީހުންނަށް އެއްފަހަރާ ނަމާދުކުރެވޭ ޖާގަ ހުންނަ މިސްކިތްތައް އެއާކޮންޑިޝަން ކުރުމަށް ސަރުކާރުން ގެންގުޅުއްވާ ސިޔާސަތުގެ ދަށުން، އިސްލާމިކް މިނިސްޓްރީއާ ގުޅިގެން ކުރިއަށްގެންދާ މުހިންމު ހަރަކާތެކެވެ. މި މަސައްކަތްތައް ކުރިއަށްދާ ގޮތް ބައްލަވާލެއްވުމަށްޓަކައި، ސްޓެލްކޯ ހިންގެވުމާ ހަވާލުވެވަޑައިގެން ހުންނެވި ޑެޕިއުޓީ މެނޭޖިންގ ޑިރެކްޓަރ ޑރ. ޢަލީ އަޒްވަރާއި އެ ކުންފުނީގެ އިސް މެނޭޖްމަންޓުން މިއަދު ވަނީ މަސައްކަތުގެ ސައިޓުތަކަށް ޒިޔާރަތްކުރައްވާފައެވެ.

މީގެ އިތުރުން، ސްޓެލްކޯގެ އިސްވެރިން ވަނީ ހުޅުމާލެއަށް ވަޑައިގެން، އެ ސިޓީގެ ކަރަންޓުގެ ޚިދުމަތް އިތުރަށް ހަރުދަނާކުރުމަށް ކުރެވެމުންދާ މަސައްކަތްތައް އޮބްޒާވް ކުރައްވާފައެވެ. ޚާއްޞަކޮށް، ކުރިއަށް އޮތް ހޫނު މޫސުމުގައި ކަރަންޓު ބޭނުންކުރާ މިންވަރު މަތިވާނެތީ، "ޕީކް" ވަގުތުތަކުގައި ދިމާވެދާނެ ދަތިތަކަށް ތައްޔާރުވުމުގެ ގޮތުން ވާންޖެހޭ އެންމެހާ ތައްޔާރީތައް އެ ކުންފުނިން ދަނީ ބާރުސްޕީޑުގައި ކުރަމުންނެވެ.