ރާއްޖެ މަސްތުގެ ވަބާއިން ސަލާމަތްކުރުމަކީ އެންމެ އިސްކަންދޭ އެއް ކަންތައް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ މިއަދު ރާއްޖެ އެތެރެކުރި މަސްތުވާތަކެތި އަތުލައިގަތްކަން ފުލުހުން އިއުލާންކޮށްފައިވަނިކޮށް އެކަން ފާހަގަކުރައްވާ ކުރެއްވި ޕޯސްޓެއްގަ އެވެ. ރައީސް ވިދާޅުވީ ދިވެހިރާއްޖެ މަސްތުވާތަކެތިން އެއްކޮށް ސަލާމަތްކުރުމަކީ އެންމެ އިސްކަންދޭ އެއްކަންތައް ކަމަށެވެ. އަދި ޤާނޫނު ތަންފީޒުކުރާ މުއައްސަސާތަކުން މިދާއިރާއިން ކުރަމުންގެންދާ ބުރަމަސައްކަތް ފާހަގަކޮށް އެފަރާތްތަކަށް ރައީސް ޝުކުރު އަދާކުރައްވާފައިވެ އެވެ.
މިއަދު މަސްތުވާތަކެތި އަތުލައިގަތީ ރާއްޖެ ވަން ލަންކާގެ މަސް ބޯޓަކުންނެވެ. މިކަމާއި ގުޅިގެން ފުލުހުން މިއަދު ބޭއްވި ނޫސްވެރިންގެ ބައްދަލުވުމެއްގައި ކޮމިޝަނާރ އޮފް ޕޮލިސް އަލީ ޝުޖާއު ވިދާޅުވީ މަސްތުވާތަކެތީގެ މައްސަލަ އެމްއެންޑީއެފް އިން ފުލުހުންނަށް ރިޕޯޓް ކޮށްފައިވަނީ ރޭ ދަންވަރު 12:45 ހާއިރު ކަމަށެވެ.
މި ބޯޓު އަތުލައިގަތީ ހދ. މަކުނުދޫ ބޭރުން އެމްއެންޑީއެފްގެ ކޯސްޓްގާޑުގެ ސިފައިންނެވެ. ބޯޓުން އަތުލައިގަތް މަސްތުވާތަކެތީގެ ޕްރެލިމިނަރީ ޓެސްޓުގެ ނަތީޖާ ދައްކާ ގޮތުން 344 ކިލޯއަކީ މެތު އަދި 124.6 ކިލޯ އަކީ ކޮކެއިން ކަމަށް ކޮމިޝަނާ އޮފް ޕޮލިސް ވަނީ ވިދާޅުވެފައެވެ. އެ ތަކެއްޗާއި އެކު ސްރީ ލަންކާއަށް ނިސްބަތްވާ ފަސް ފިރިހެނުން ވެސް ބޯޓުގައި ތިބި ކަމަށެވެ.
ކޮމިޝަނާ އޮފް ޕޮލިސް ވިދާޅުވީ އަތުލައިގަތް މަސްތުވާތަކެތީގެ އަގު އެއް ބިލިއަން ރުފިޔާއަށް އަރާނެ ކަމަށެވެ. މި މައްސަލަ އަދިވެސް ތަހުގީގު ކުރަމުންދާތީ ބޯޓުގައި ހުރި މަސްތުވާތަކެއްޗާއި އެއްވެސް ދިވެއްސަކާ ގުޅުމެއްވާކަން ތަހުގީގުގެ މި މަރުހަލާގައި އަދި ދަންނަވަން ދަތި ކަމަށެވެ.
ޕްރެސް ކޮންފަރެންސްގައި ފުލުހުން ވަނީ މިއަދު ހިފެހެއްޓި ތަކެތީގެ ވީޑިއޯ ފުޓޭޖުތައް ދައްކާލާފައެވެ. ފުލުހުން ބުނިގޮތުގައި މި ބޯޓު މިހާރު އޮތީ ހދ. ކުޅުދުއްފުށި ބަނދަރު ގައެވެ.
