މިއަދު ބޭއްވި ޕީއެންސީގެ އެތެރޭގެ އިންތިޚާބު ކާމިޔާބުކުރެއްވި ހުރިހާ މެމްބަރުންނަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަރުހަބާ ވިދާޅުވެއްޖެ އެވެ.
މިއަދު ބޭއްވި އެތެރޭގެ އިންތިޚާބުގެ ވޯޓުލުން މިހާރު ވަނީ ނިންމާލާފަ އެވެ. އެ ޕާޓީގެ އެންމެ ބޮޑު އިންތިޚާބު މިއަދު ބޭއްވި އިރު އެމަނިކުފާނު ހުންނެވީ އަމިއްލަ ދަތުރުފުޅެއްގައި އިނގިރޭސިވިލާތުގަ އެވެ. އެހެންނަމަވެސް އެމަނިކުފާނު ވަނީ އިންތިޚާބުގެ ކަންކަން ވަރަށް ގާތުން ބައްލަވާ އެކަންކަމުގައި ބައިވެރިވެވަޑައިގެންފަ އެވެ.
މިއަދުގެ އިންތިޚާބުގެ ވޯޓުލުން މިއަދު މެންދުރު ފަހު 3 ޖެހި އިރު ނިންމާލާފައިވާއިރު، މި އިންތިޚާބުގައި ވަނީ ޕާޓީގެ ދާއިރާ ރައީސް، ނައިބުރައީސް އަންހެނުންގެ ރޫހުގެ ރައީސް ޒުވާނުންގެ ރައީސް އަދި ސްޓިއަރިގް ކޮމިޓީގެ ޒުވާނުންގެ މެމްބަރާއި އަންހެނުންގެ މެމްބަރު ވެސް ހިމެނެ އެވެ. އެގޮތުން 59 މަގާމަކަށް މި އިންތިޚާބުގައި މެމްބަރުން ހޮވާފައިވެ އެވެ.
މި އިންތިޚާބުގައި ޖުމްލަ 34،904 މީހުންނަށް ވޯޓު ލެވޭ އިރު، އިންތިޚާބުގައި 667 ކެންޑިޑޭޓުން ވާދަކުރި އެވެ. މި އިންތިޚާބުގެ ނަތީޖާ އިއުލާންކުރުން އޮތީ މިރޭ އެވެ.
