ސަރުކާރާއި ދިވެހީންގެ އެދުމާ ދެކޮޅަށް ޝައިނާ މިސް ޔުނިވާސް މުބާރާތަށް

މިސް ޔުނިވާސް މުބާރާތުގައި ރާއްޖެ ތަމްސީލުކުރުމަށް ކަމަށް ބުނެ، އެ މުބާރާތުގައި ބައިވެރިވުމަށް ކުރަމުން އަންނަ މަސައްކަތް ހުއްޓާލުމަށް ޒުވާން މޮޑެލް މަރިޔަމް ޝައިނާ ނަސީމްގެ ކިބައިން ދިވެހި ސަރުކާރުން އެދުނު ނަމަވެސް އޭނާ އެކަން ހުއްޓާނުލައި ކުރިއަށް ގެންދާކަން ހާމަވެއްޖެއެވެ.

މި މުބާރާތުގައި ރާއްޖެ ތަމްސީލްކުރާނެކަން އުމުރުން 21 އަހަރުގެ ޝައިނާ އިއުލާންކޮށްފައިވާއިރު މިއަހަރުގެ މިސް ޔުނިވާސް މުބާރާތް އޮންނާނީ މެކްސިކޯގައެވެ. މިމުބާރާތް އަންނަ މަހުގެ 14ގައި އޮންނައިރު، ފައިނަލް ޝޯ ބާއްވާނީ އޭގެ ދެ ދުވަސް ފަހުންނެވެ.

މުބާރާތުގައި ބައިވެރިވާން ކުރަމުންދާ މަސައްކަތް ހުއްޓާލުމަށް ގޮވާލައި ސަރުކާރުން ބަޔާނެއްވެސް ނެރިފައި ވަނިކޮށް، ޝައިނާ ވަނީ މިސް ޔުނިވާސް ބަލާލަން މެކްސިކޯއަށް ދިއުމަށް، އޭނާގެ ފަރާތުން ދެ މީހަކަށް ޓިކެޓް ދިނުމަށް ހާއްސަ ޕްރޮމޯޝަނެއް ފަށައިފައެވެ. ޝައިނާ ވަނީ މި ޕްރޮމޯޝަންގައި ބައިވެރިވާން ބޭނުންވާ މީހުން އޭނާގެ ރީލްއަށް އޭނާ އެ މުބާރާތުގައި ބައިވެރިވުމަށް ހިޔާރުކުރަންވީ ސަބަބު ކޮމެންޓްކޮށް، ފަސް ރައްޓެހިން ޓެގްކުރުމަށް އެދިފައެވެ. އަދި މިސް ޔުނިވާސްގެ އޮފިޝަލް އިންސްޓަގްރާމް އެކައުންޓާއި ޝައިނާގެ އެކައުންޓް ފޮލޯ ކުރަންޖެހޭނެ ކަމަށް ވެސް ވަނީ ބުނެފައެވެ. މީގެ އިތުރުން އެރީލް އެމީހެއްގެ އިންސްޓަގްރާމް ސްޓޯރީގައި ޝެއާކޮށް އޭނާއާއި މިސް ޔުނިވާސް އޮފިޝަލް އެކައުންޓް ޓެގް ކުރުމަށް ވެސް އޭނާ ވަނީ އެދިފައެވެ.

ދުނިޔޭގެ ގިނަ ގައުމުތަކުން ބައިވެރިވާ މިސް ޔުނިވާސް މުބާރާތުގައި ރާއްޖެ ތަމްސީލްކުރުމަށް ދިވެހި އަންހެނަކު ބައިވެރިވުން ސަރުކާރުން ވަނީ ކުއްވެރިކޮށްފައެވެ.

މިކަމާ ގުޅިގެން ޔޫތު މިނިސްޓްރީން ނެރުނު ބަޔާނެއްގައި ބުނީ މެކްސިކޯގައި ބޭއްވުމަށް ހަމަޖެހިފައިވާ މިއަހަރުގެ މިސް ޔުނިވާސް މުބާރާތުގައި ރާއްޖެ ތަމްސީލުކުރުމަށް ދިވެއްސަކު ބައިވެރިވަނީ ދިވެހި ސަރުކާރުގެ އެއްވެސް ބައިވެރިވުމެއް އޮވެގެން ނޫން ކަމަށެވެ. އަދި އެއީ ދިވެހި ސަރުކާރުން ބަލައިގަންނަ ކަމެއް ނޫން ކަމަށް ވެސް މިނިސްޓްރީން ބުނެފައި ވެއެވެ.

މިނިސްޓްރީން ބުނީ އެކަމަކީ ދިވެހިންގެ ދީނާއި އަގީދާއި ސަގާފަތާ ނުގުޅޭ ކަމެއް ކަމަށެވެ. އެހެންވެ އެފަދަ މުބާރާތްތައް ބޭއްވުމާއި އެކިއެކި ފަރާތްތަކުން ބާއްވައި އެފަދަ މުބާރާތްތަކާއި ހަރަކާތްތަކުގައި ބައިވެރިވުމަކީ ދިވެހި ސަރުކާރުން ބަލައިގަންނަ ކަމެއް ނޫން ކަމަށް ބުނެފައި ވެއެވެ.

އަދި، އެފަދަ ކަންކަމަކީ، ދިވެހިން ގަބޫލުކުރާ އާންމު އަހުލާގީ މިންގަނޑުތަކާއި އުސޫލުތަކާ ވެސް ހިލާފު ކަންކަމަށް ވާއިރު، ރާއްޖެ ތަމްސީލުކުރުމުގެ ނަމުގައި ދިވެއްސަކު އެފަދަ ހަރަކާތަކަށް ދިއުން ދިވެހި ސަރުކާރުން ކުށްވެރިކުރާ ކަމަށް ބުނެ، މުބާރާތުގައި ދިވެހިރާއްޖެ ތަމްސީލްކުރާ ބައިވެރިޔާ އެ މަސައްކަތް ހުއްޓާލުމަށް ވެސް މިނިސްޓްރީން ގޮވާލާފައި ވެއެވެ.

މިމުބާރާތަކީ މުޅި ދުނިޔެގައި ވެސް އެންމެ މަޝްހޫރު ރީތީގެ މުބާރާތްތަކުގެ ތެރެއިން އެއް މުބާރާތެވެ.