ފަލަމަސްގަނޑުގައި ޓޭޕްއަޅައިގެން މަސްތުވާތަކެތި ގެންދަން އުޅުނު މީހަކު 50 އަހަރަށް ޖަލަށް ލައިފި

ވެލާނާ އިންޓަނޭޝަނަލް އެއާޕޯޓުން ގއ. ކޫއްޑުއަށް ފުރަންދިޔައިރު ދެ ފައިގެ ފަލަމަސްގަނޑުގައި ޑަކްޓް ޓޭޕް އަޅައި، އޭގެ ތެރޭގައި ގިނަ އަދަދެއްގެ މަސްތުވާތަކެތި ފޮރުވައިގެން ގެންދަން އުޅުނު މީހަކު 50 އަހަރަށް ޖަލަށް ލުމަށާއި 200,000 ރުފިޔާއިން ޖޫރިމަނާކުރުމަށް ކްރިމިނަލް ކޯޓުން ހުކުމްކޮށްފިއެވެ.

މި މައްސަލާގައި ހުކުމް އިއްވާފައިވަނީ ށ. ނޫމަރާ، ހަވީރީގެ، އަބްދުﷲ ފަސީހުގެ މައްޗަށެވެ. ދިވެހި ފުލުހުންގެ ޚިދުމަތުން އޭނާ ހައްޔަރުކޮށްފައިވަނީ އޮކްޓޫބަރު 7، 2024 ގައި ވެލާނާ އިންޓަނޭޝަނަލް އެއާޕޯޓުން ކޫއްޑޫއަށް ފުރަން ގޮސް ހުއްޓައެވެ. ފުލުހުން އޭނާގެ ހަށިގަނޑު ބަލައިފާސްކުރިއިރު، ދެ ފައިގެ ފަލަމަސްގަނޑުގައި ޑަކްޓް ޓޭޕް އަޅައިގެން ފޮރުވާފައި ހުރި ގިނަ އަދަދެއްގެ މަސްތުވާތަކެތި ވަނީ ފެނިފައެވެ.

މި މައްސަލައިގައި ދައުލަތުން އޭނާގެ މައްޗަށް އުފުލި ދެ ދައުވާ ވެސް ސާބިތުވާ ކަމަށް ކްރިމިނަލް ކޯޓުގެ ގާޒީ އަލީ ނަދީމް ކަނޑައަޅުއްވާފައިވާއިރު، ފަލަމަސްގަނޑުގައި ޓޭޕްއަޅައި ތަތްކޮށްފައި ހުރި 23.5 ގްރާމްގެ ޑައިމޯފިން ފެނުނު މައްސަލައިގައި ކުރި ޑައިމޯފިން ޓްރެފިކްކުރުމުގެ ދައުވާ ސާބިތުވެ، އޭނާ 25 އަހަރަށް ޖަލަށްލުމާއެކު 100,000 ރުފިޔާއިން ވަނީ ޖޫރިމަނާކޮށްފައެވެ. އަދި ބަންދުގައި ހޭދަކުރި ހަތް މަހާއި 27 ދުވަސް އުނިކުރުމުން އެ ދައުވާއަށް ތަންފީޒުކުރަން ޖެހެނީ 24 އަހަރާއި ހަތަރު މަހާއި ތިން ދުވަހުގެ ޖަލު ހުކުމެއް ކަމަށް ކަނޑައެޅުމުގެ އިތުރުން، އޭނާގެ އަތުން ފެނުނު 10 ފިލްމު ދަޅުގައި ހުރި 252 ގްރާމްގެ ކެނެބިސް ފެނުނު މައްސަލައިގައި ކެނެބިސް ޓްރެފިކްކުރުމުގެ ދައުވާ ސާބިތުވެ، އެ ދައުވާއަށް ވެސް ވަނީ 25 އަހަރުގެ ޖަލު ހުކުމަކާއެކު 100,000 ރުފިޔާގެ ޖޫރިމަނާއެއް ކަނޑައަޅުއްވާފައެވެ.

މި ދެ މައްސަލައިގެ ޖުމްލަ އަދަބެއްގެ ގޮތުން 50 އަހަރުގެ ޖަލު ހުކުމެއް އައިއިރު، ޖޫރިމަނާގެ ގޮތުގައި ދައްކަންޖެހޭ ޖުމްލަ 200,000 ރުފިޔާ، ހުކުމްކުރި ދުވަހުން ފެށިގެން 12 މަސްދުވަހުގެ ތެރޭގައި މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަށް ދެއްކުމަށް ކޯޓުން ވަނީ އަންގާފައެވެ.

ޝަރީއަތުގެ މަރުހަލާގައި ފަސީހުގެ ދިފާއުން ބުނެފައިވަނީ، އެކަމަކީ އޭނާއަށް މަޖުބޫރުކުރުވައިގެން ބަޔަކު ކުރުވި ކަމެއް ކަމަށާއި އޭނާއަކީ ހިއުމަން ޓްރެފިކިންގެ ޝިކާރައަކަށް (ވިކްޓިމަކަށް) ވެފައިވާ މީހެއް ކަމަށެވެ. ނަމަވެސް، ޝަރީއަތުން ވަނީ އޭނާގެ މައްޗަށް ކުށް ސާބިތުވާ ކަމަށް ނިންމައި ހުކުމް އިއްވާފައެވެ.