އީރާނާއި އެމެރިކާއާ ދެމެދު އުފެދިފައިވާ ޚިލާފުތަކަށް އޮތީ އަސްކަރީ ހައްލެއް ނޫން : އީރާނުގެ ޚާރިޖީ ވަޒީރު

އިރާނުގެ ޚާރިޖީ ވަޒީރު ޢައްބާސް އަރަޤްޗީ އާދީއްތަ ދުވަހު ވިދާޅުވީ، އެމެރިކާއާއެކު އުފެދިފައިވާ ހަމަނުޖެހުންތަކަށް ޢަސްކަރީ ޙައްލެއް ނެތް ކަމަށާއި، ހަނގުރާމަ ހުއްޓާލުމާ ގުޅޭގޮތުން ކުރެވޭ މަޝްވަރާތައް ކުރިއަށް ނުގޮސް ހުއްޓިފައި ކަމަށް ބުނެފިއެވެ.

ފެބްރުއަރީ މަހުގެ ފަހުކޮޅު އެމެރިކާ އާއި އިސްރާއީލުން ފެށި ހަނގުރާމައަށް، މެދުކެނޑުމެއްނެތި ދިން ވަރުގަދަ ބޮން އެޅުމުގެ ޙަމަލާތަކުން ވެސް ނިމުމެއް ގެނެވިފައެއް ނުވެއެވެ. އަދި ފާއިތުވި ހަފުތާތަކުގައި ވޮޝިންޓަނުން ވަނީ ޢަސްކަރީ ކުރިމަތިލުންތައް މަދުކޮށް، އޭގެ ބަދަލުގައި އިޤްތިޞާދީ ގޮތުން ފިއްތުންތައް ކުރިމަތިކުރުމަށް އިސްކަންދީފައެވެ.

ބޭރު ގައުމުތަކުގެ ސަފީރުންނާ ބައްދަލުކުރައްވައި ދެއްކެވި ވާހަކަފުޅުގައި އަރަޤްޗީ ވިދާޅުވީ، ދުޝްމަނުން އަނެއްކާވެސް އަސްކަރީ ކުރިމަތިލުމަކަށް އިސްނަގައިފިނަމަ، އެކަމަށް ދޭ ރައްދު ކުރިއަށްވުރެ މާ ވަރުގަދަވާނެ ކަމަށާއި، ފުރިހަމަ ބާރާއެކު ގައުމު ދިފާޢުކުރާނެ ކަމަށެވެ. މީގެއިތުރުން، އަސްކަރީ ހައްލެއް ނެތް ފަދައިން، އަލަށް އަޅާ ދަތިކުރުމުގެ ފިޔަވަޅުތަކަކުން ވެސް އެދެވޭ ނަތީޖާއެއް ނުނެރެވޭނެކަން ފާހަގަކުރައްވައި، އޭނާ ވިދާޅުވީ މި މައްސަލައަށް އޮތް ހަމައެކަނި ހައްލަކީ އަދުލުވެރިކަމާއި އިންސާފުގެ މައްޗަށް ބިނާވެފައިވާ މަޝްވަރާތަކެއް ކަމަށެވެ.

މި މައްސަލައަށް ދާއިމީ ހައްލެއް ހޯދުމަށް ބޭނުންވާ އޮނިގަނޑެއް އެކުލަވައިލުމުގެ މަގުސަދުގައި، މިދިޔަ ޖޫން މަހު ދެ ފަރާތުގެ މެދުގައި ފަހުމުނާމާއެއްގައި ސޮއިކުރެވުނެވެ. ނަމަވެސް، ހޯރްމޫޒް ކަނޑުއޮޅީގެ މައްސަލައިގައި އުފެދުނު ހިޔާލުތަފާތުވުންތަކާ ހުރެ އެ އެއްބަސްވުން ވަނީ އުވާލެވިފައެވެ. ހަނގުރާމަ ފެށުނީއްސުރެ އީރާނުން ދަނީ އެ ކަނޑުއޮޅީގެ ކޮންޓްރޯލް ހޯދުމަށް މަސައްކަތް ކުރަމުންނެވެ. އަދި އެ ގައުމުގެ ހުއްދައާ ނުލައި އެ ސަރަހައްދުން ދަތުރުކުރަން އުޅޭ އުޅަނދުފަހަރަށް އީރާނުން ދަނީ ހަމަލާދެމުންނެވެ.

އދ. ގެ އާންމު މަޖިލީހުގެ ހަވާސާގައި މިދިޔަ ހަފުތާގައި އީރާނާއި އެމެރިކާގެ އޮފިޝަލުން ނުސީދާ މަޝްވަރާތަކެއް ބާއްވާފައިވާއިރު، އެ ކަނޑުއޮޅި އަލުން ހުޅުވާލުމަށްޓަކައި ހަތް ޝަރުތެއް އީރާނުން ވަނީ ހުށަހަޅާފައެވެ.

އެހެންނަމަވެސް، ރައީސް ޓްރަމްޕް ވަނީ އެ ހުށަހެޅުންތައް ބަލައިނުގަނެ، އިތުރު މަޝްވަރާތަކަށް ނުވަތަ އަސްކަރީ ހަރަކާތްތަކަށް ފުރުސަތު އޮތްކަން ހާމަކުރައްވާފައެވެ. ސެޕްޓެމްބަރު މަހުގެ އެއްވަނަ ދުވަހުގެ ފަހުން އެމެރިކާއިން އީރާނަށް އެއްވެސް ހަމަލާއެއް ދީފައެއް ނުވެއެވެ.

އެމެރިކާގެ ނޫސް އޭޖެންސީއެއް ކަމަށްވާ 'އެކްސިއޯސް' އިން ރިޕޯޓްކޮށްފައިވާ ގޮތުގައި، ޓްރަމްޕްގެ ކެބިނެޓްގެ އިސް މެންބަރުން މިދިޔަ ހުކުރު ދުވަހު ބައްދަލުކުރައްވައި، އީރާނުގެ ހަނގުރާމައާއި ޔަމަނުގެ ހަމަނުޖެހުންތަކާ ގުޅޭގޮތުން މަޝްވަރާ ކުރައްވާފައިވެއެވެ. ޔަމަނަކީ އީރާނުގެ ތާއީދުލިބޭ ހޫތީން އެ ގައުމުގެ ސަރުކާރުގެ ސިފައިންނާ ހަނގުރާމަކޮށް، ސައުދީ އަރަބިއްޔާއަށް ހަމަލާދެމުންދާ ގައުމެކެވެ.