ކީރިތި ޤުރުއާނުގައި ވާރިދުވެފައިވާ ދުޢާތައް

ރޫހާނީ ގޮތުންނާއި ޖިސްމާނީ ގޮތުންވެސް ހިތްތަކުގެ ބަލިތަކަށް އޮތް ފަރުވާއަކީ ކީރިތި ޤުރުއާނެވެ. ކީރިތި ޤުރުއާނަކީ މުއުމިނުންގެ ދުސްތޫރެވެ. އެއީ ބަލިތަކަށް އޮތް ޝިފާއެކެވެ. ދުޢާތަކުގެ ޚަޒާނާއެކެވެ.

މާތް ﷲ ސުބްޙާނަހޫ ވަތަޢާލާ އެއިލާހުގެ އަޅުތަކުންނާ ކުއްތަންވެވޮޑިގެންވާކަމަށާއި އެއިލާހުގެ ޙަޟްރަތުގައި ދުޢާ ދަންނަވާ އަޅުތަކުންގެ ދުޢާ އިޖާބަކުރައްވާނޭކަން ކީރިތި ޤުރުއާނުގައި ބަޔާންކުރައްވަމުން ވަޙީކުރެއްވިއެވެ.

وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ [البقرة186]

ތިމަންއިލާހާމެދު ތިމަންއިލާހުގެ އަޅުތަކުން ކަލޭގެފާނާ ސުވާލު ކޮށްފިނަމަ ދަންނައެވެ! ހަމަކަށަވަރުން ތިމަންއިލާހު އެބައިމީހުންނާ ކުއްތަންވެވޮޑިގެންވަމެވެ. ތިމަންއިލާހުގެ ޙަޟުރަތުގައި ދުޢާ ދަންނަވާމީހާގެ ދުޢާ ތިމަންއިލާހު އިޖާބަ ކުރައްވާހުށީމެވެ. ފަހެ ތިމަންއިލާހު އަމުރުކުރެއްވި ކަންތައްތަކަށް އެބައިމީހުން އިޖާބަ ދޭހުށިކަމެވެ! އަދި އީމާންކަންމަތީ ދެމިތިބޭހުށިކަމެވެ! އެއީ އެބައިމީހުންނަށް ތެދުމަގު ލިބުމަށްޓަކައެވެ.

ޝައްކެއްވެސް ނެތްގޮތުގައި އެންމެ މާތް އަދި އެންމެ މަތިވެރި ބަސްފުޅަކީ ﷲގެ ބަސްފުޅެވެ. އެއީ ކީރިތި ޤުރުއާނެވެ. އެއީ އެންމެ މަތިވެރިވެގެންވާ ޛިކުރެވެ. އެންމެ މަތިވެރިވެގެންވާ ދުޢާއެވެ. ކީރިތި ޤުރުއާނުގައި ވާރިދުވެފައިވާ ބައެއް ދުއާތަކަށް ބަލާލާނަމެވެ.

اهْدِنَا الصِّرَاطَ الْمُسْتَقِيمَ [ الفاتحة 6]

ސީދާވެގެންވާ މަގަށް އަޅަމެންނަށް މަގުދައްކަވާދޭނވެ!

رَبَّنَا تَقَبَّلْ مِنَّا إِنَّكَ أَنْتَ السَّمِيعُ الْعَلِيمُ [البقرة 127]

އަޅަމެންގެ ރައްބު! އަޅަމެންގެ ކިބައިން މިކަން ޤަބޫލުކުރައްވާދޭނވެ! ހަމަކަށަވަރުން އިބަ އިލާހީ މޮޅަށް އައްސަވާވޮޑިގެންވާ އަދި މޮޅަށް ބައްލަވާވޮޑިގެންވާ އިލާހެވެ.

رَبَّنَا وَاجْعَلْنَا مُسْلِمَيْنِ لَكَ وَمِنْ ذُرِّيَّتِنَا أُمَّةً مُسْلِمَةً لَكَ وَأَرِنَا مَنَاسِكَنَا وَتُبْ عَلَيْنَا إِنَّكَ أَنْتَ التَّوَّابُ الرَّحِيمُ [البقرة 128]

އަޅަމެންގެ ރައްބު! އަޅަމެންނީ އިބައިލާހަށް ބޯލަނބައި ކިޔަމަންގަންނަ ދެމީހުން ކަމުގައި ލައްވާދޭނވެ! އަދި އިބައިލާހަށް ކިޔަމަންތެރިވާ އުންމަތެއް، އަޅަމެންގެ ދަރިފަސްކޮޅުން ލައްވައިފާނދޭވެ! އަދި ޙައްޖުގެ މަނާސިކުތައް (އަޅުކަންކުރާނޭ ގޮތްތައް) އަޅަމެންނަށް ދައްކަވައިފާނދޭވެ!(އުނގަންނަވައިދެއްވާފާނދޭވެ!) އަދި އަޅަމެންގެ ތައުބާ ޤަބޫލުކުރައްވާދޭނވެ! ހަމަކަށަވަރުން އިބައިލާހީ ގިނަގިނައިން ތައުބާޤަބޫލުކުރައްވާ، އޯގާވަންތަ އިލާހެވެ.

الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ [البقرة 156]

އެބައިމީހުންނީ، މުޞީބަތެއް ކުރިމަތިވެއްޖެ ނަމަ ހަމަށަވަރުން ތިމަންމެންގެ ވެރި ފަރާތަކީ ﷲ އެވެ. އަދި ތިމަންމެން އެނބުރި ދާހުށީވެސް ހަމަ އެއިލާހުގެ ޙަޟްރަތަށެވެ.” މިފަދައިން ބުނާ މީހުންނެވެ.

رَبَّنَا آتِنَا فِي الدُّنْيَا حَسَنَةً وَفِي الآخِرَةِ حَسَنَةً وَقِنَا عَذَابَ النَّارِ [ البقرة 201]

“އަޅަމެންގެ ރައްބު! އަޅަމެންނަށް ދުނިޔޭގައި ހެޔޮކަން ދެއްވައި އަދި އާޚިރަތުގައި ހެޔޮކަން ދެއްވާނދޭވެ! އަދި ނަރަކައިގެ ޢަޛާބުން އަޅަމެން ދިންނަވާދޭނވެ!

رَبَّنَا أَفْرِغْ عَلَيْنَا صَبْراً وَثَبِّتْ أَقْدَامَنَا وَانْصُرْنَا عَلَى الْقَوْمِ الْكَافِرِينَ [البقرة250]

އަޅަމެންގެ ރައްބު! އަޅަމެންގެ މައްޗަށް ކެތްތެރިކަން އޮއްސަވާނދޭވެ! އަދި (ހަނގުރާމައިގެ މައިދާނުގައި) އަޅަމެންގެ ފައިތިލަތައް ސާބިތުކުރައްވާނދޭވެ! އަދި ކާފިރުންގެ މައްޗަށް އަޅަމެންނަށް ނަޞްރު ދެއްވާނދޭވެ!

رَبَّنَا لا تُؤَاخِذْنَا إِنْ نَسِينَا أَوْ أَخْطَأْنَا رَبَّنَا وَلا تَحْمِلْ عَلَيْنَا إِصْراً كَمَا حَمَلْتَهُ عَلَى الَّذِينَ مِنْ قَبْلِنَا رَبَّنَا وَلا تُحَمِّلْنَا مَا لا طَاقَةَ لَنَا بِهِ وَاعْفُ عَنَّا وَاغْفِرْ لَنَا وَارْحَمْنَا أَنْتَ مَوْلانَا فَانْصُرْنَا عَلَى الْقَوْمِ الْكَافِرِينَ [البقرة286 ]

އަޅަމެންގެ ރައްބު! އަޅަމެނަށް ހަނދާންނެތި ކުރެވޭ ކުށްތަކަށާއި ގަސްތަކާނުލައި ކުރެވޭ ކުށްތަކަށް ޢަޛާބެއް ނުދެއްވާނދޭވެ! އަޅަމެންގެ ރައްބު! އަޅަމެންނަށް ވުރެ ކުރީގެ މީހުންނަށް ބުރަ ޖެއްސެވި ފަދައިން އަޅަމެންނަށް ބުރައެއް ނުޖައްސަވާނދޭވެ! އަޅަމެންގެ ރައްބު! އަޅަމެންނަށް ކުޅަދާނަ ވެގެންނުވާފަދަ ކަމެއް ކުރުމުގެ ބުރަ އަޅަމެންނަށް ނުޖައްސަވާނދޭވެ! އަދި އަޅަމެންނަށް ޢަފޫކުރައްވައި، އަޅަމެންގެ ފާފަ ފުއްސަވާނދޭވެ! އަދި އަޅަމެންނަށް ރަޙްމަތްލައްވާނދޭވެ! އިބައިލާހީ އަޅަމެންގެ ކަންތައްތައް ބަލަހައްޓަވާ އެހީތެރިވެވޮޑިގެންވާ އިލާހެވެ، ފަހެ ކާފިރުންގެ މައްޗަށް އަޅަމެންނަށް ނަޞްރު ދެއްވާނދޭވެ!

“رَبَّنَا لَا تُزِغْ قُلُوبَنَا بَعْدَ إِذْ هَدَيْتَنَا وَهَبْ لَنَا مِنْ لَدُنْكَ رَحْمَةً إِنَّكَ أَنْتَ الْوَهَّابُ” (آل عمران8)

އަޅަމެންގެ ރައްބު! އަޅަމެންނަށް ތެދުމަގު ދެއްކުމަށްފަހު އަޅަމެންގެ ހިތްތައް އެމަގުން އެއްކިބާ ނުކުރައްވާނދޭވެ! އަދި އިބައިލާހުގެ ޙަޟްރަތުން އަޅަމެންނަށް ރަޙްމަތް ލައްވާނދޭވެ! ހަމަކަށަވަރުން އިބައިލާހީ ގިނަގިނައިން (ނިޢުމަތް) ދެއްވާ އިލާހެވެ.

“رَبَّنَا إِنَّنَا آمَنَّا فَاغْفِرْ لَنَا ذُنُوبَنَا وَقِنَا عَذَابَ النَّارِ” (آل عمران 16)

އަޅަމެންގެ ރައްބު! އަޅަމެން އިބައިލާހަށް އީމާން ވެއްޖައީމެވެ. ފަހެ އަޅަމެންގެ ފާފަތައް ފުއްސަވައި ދެއްވައި، ނަރަކައިގެ ޢަޛާބުން އަޅަމެން ދިންނަވާނދޭވެ!

“قُلِ اللَّهُمَّ مَالِكَ الْمُلْكِ تُؤْتِي الْمُلْكَ مَنْ تَشَاءُ وَتَنْزِعُ الْمُلْكَ مِمَّنْ تَشَاءُ وَتُعِزُّ مَنْ تَشَاءُ وَتُذِلُّ مَنْ تَشَاءُ بِيَدِكَ الْخَيْرُ إِنَّكَ عَلَى كُلِّ شَيْءٍ قَدِيرٌ ” (آل عمران 26)

ކަލޭގެފާނު ވިދާޅުވާށެވެ! އޭ ﷲ! އެންމެހައި ތަކެއްޗެއްގެ ވެރިއިލާހު! އިބައިލާހު އެދިވޮޑިގެންވާ މީހަކަށް ވެރިކަން ދެއްވަމުއެވެ. އަދި އިބައިލާހު، އެދިވޮޑިގެންވާ މީހެއްގެ އަތުން ވެރިކަން އަތުލަށްވަމުއެވެ. އަދި އިބައިލާހު އެދިވޮޑިގަންނަވާ މީހަކަށް ޢިއްޒަތް ދެއްވަމުއެވެ. އަދި އިބައިލާހު އެދިވޮޑިގަންނަވާ މީހަކު ނިކަމެތިކުރައްވަމުއެވެ. އެންމެހައި ހެޔޮކަންތައްވަނީ ހަމައެކަނި އިބައިލާހުގެ އަތްޕުޅުގައެވެ. ހަމަކަށަވަރުން އިބައިލާހީ ހުރިހާ ކަމަކަށް ކުޅަދުންވަންތަ ރަސްކަލާނގެއެވެ.

“رَبِّ هَبْ لِي مِنْ لَدُنْكَ ذُرِّيَّةً طَيِّبَةً إِنَّكَ سَمِيعُ الدُّعَاءِ” (آل عمران: ٣٨)

އަޅުހެ ރައްބު! އިބަރަސްކަލާނގެ ޙަޟްރަތުން ހެޔޮލަފާ ރަނގަޅު ދަރިފަސްކޮޅެއް މިއަޅާއަށް ދެއްވާނދޭވެ! ހަމަކަށަވަރުން އިބައިލާހީ ދުޢާ އައްސަވާވޮޑިގެންވާ އިލާހެވެ.

“رَبَّنَا آمَنَّا بِمَا أَنْزَلْتَ وَاتَّبَعْنَا الرَّسُولَ فَاكْتُبْنَا مَعَ الشَّاهِدِينَ” (آل عمران53)

އަޅަމެންގެ ރައްބު! އިބައިލާހު ބާވައިލެއްވިހައި ތަކެއްޗަށް އަޅަމެން މިތިބީ އީމާންވެގެންނެވެ. އަދި ރަސޫލާއަށްވެސް ތަބަޢަވެގެންނެވެ. ފަހެ (މިކަމަށް) ހެކިދޭނޭ މީހުންގެ ތެރެއިން އަޅަމެން ލައްވާނދޭވެ!

“رَبَّنَا اغْفِرْ لَنَا ذُنُوبَنَا وَإِسْرَافَنَا فِي أَمْرِنَا وَثَبِّتْ أَقْدَامَنَا وَانْصُرْنَا عَلَى الْقَوْمِ الْكَافِرِينَ” (آل عمران147)

އަޅަމެންގެ ރައްބު! އަޅަމެންގެ ފާފަތަކާއި، އަޅަމެންގެ ކަންތަކުގައި ހައްދުފަހަނަޅައިދިއުމުގެ ކުށް އަޅަމެންނަށް ފުއްސަވާނދޭވެ! އަދި، އަޅަމެންގެ ފައިތިލަތައް ސާބިތުކުރައްވާނދޭވެ! އަދި، ކާފިރުވެގެންވާ ޤައުމުގެ މައްޗަށް އަޅަމެންނަށް ނަޞްރު ދެއްވާނދޭވެ!

“حَسْبُنَا اللَّهُ وَنِعْمَ الْوَكِيلُ” (آل عمران173)

އަހަރެމެންނަށް، ﷲ ފުދެއެވެ. އަދި، ވަކީލުކުރެވޭ ފަރާތުގެ މޮޅުކަމާއެވެ!

“رَبَّنَا مَا خَلَقْتَ هَذَا بَاطِلًا سُبْحَانَكَ فَقِنَا عَذَابَ النَّارِ” (آل عمران191)

އަޅަމެންގެ ރައްބު! އިބައިލާހު މިތަކެތި ހައްދަވާފައިވަނީ، ބާޠިލްގޮތެއްގައެއް ނޫނެވެ. ތިބައިލާހުގެ ހުސްޠާހިރުވަންތަކަމާއެވެ! ފަހެ، ނަރަކައިގެ ޢަޛާބުން އަޅަމެން ދިންނަވާނދޭވެ!

“رَبَّنَا إِنَّكَ مَنْ تُدْخِلِ النَّارَ فَقَدْ أَخْزَيْتَهُ وَمَا لِلظَّالِمِينَ مِنْ أَنْصَارٍ” (آل عمران 192)

އަޅަމެންގެ ރައްބު! ހަމަކަށަވަރުން، އިބައިލާހު ނަރަކަޔަށް ވައްދަވައިފިމީހާ، ފަހެ، އިބައިލާހު އެމީހަކު ނިކަމެތި ކުރައްވައިފިކަން ކަށަވަރެވެ. އަނިޔާވެރިންނަށް ނަޞްރުދޭނޭ އެއްވެސް ބަޔަކު ނުވެއެވެ.

“رَبَّنَا إِنَّنَا سَمِعْنَا مُنَادِيًا يُنَادِي لِلْإِيمَانِ أَنْ آَمِنُوا بِرَبِّكُمْ فَآمَنَّا رَبَّنَا فَاغْفِرْ لَنَا ذُنُوبَنَا وَكَفِّرْ عَنَّا سَيِّئَاتِنَا وَتَوَفَّنَا مَعَ الْأَبْرَارِ” (آل عمران193)

އަޅަމެންގެ ރައްބު! ގޮވާލައްވާ މީހަކު (ރަސޫލަކު) އީމާންވުމަށް ގޮވާލައްވާ އަޑު، ހަމަކަށަވަރުން، އަޅަމެން އެހީމުއެވެ. ދެން، އަޅަމެން އީމާންވީމުއެވެ. އަޅަމެންގެ ވެރިރައްބު! ފަހެ، އަޅަމެންނަށް އަޅަމެންގެ ފާފަތައް ފުއްސަވާނދޭވެ! އަދި، އަޅަމެންގެ ކިބައިން އަޅަމެންގެ ކުށްތައް ޢަފޫކުރައްވާނދޭވެ! އަދި، ހެޔޮލަފާ މީހުންނާއެކު އަޅަމެން މަރުގަންނަވާނދޭވެ!

“رَبَّنَا وَآَتِنَا مَا وَعَدْتَنَا عَلَى رُسُلِكَ وَلَا تُخْزِنَا يَوْمَ الْقِيَامَةِ إِنَّكَ لَا تُخْلِفُ الْمِيعَادَ” (آل عمران194)

އަޅަމެންގެ ރައްބު! އިބައިލާހުގެ ރަސޫލުންގެ ދޫފުޅުމަތީން އަޅަމެންނަށް ވަޢުދުވެވޮޑިގެންފައިވާ ކަންތައް، އަޅަމެންނަށް ދެއްވާނދޭވެ! އަދި، ޤިޔާމަތް ދުވަހުން އަޅަމެން ނިކަމެތި ނުކުރައްވާނދޭވެ! ހަމަކަށަވަރުން، އިބައިލާހު ވަޢުދާ ޚިލާފުވެވޮޑިނުގަންނަވަމުއެވެ.