ވަގަށް އެތެރެކުރި ސިނގިރެޓްތަކެއް އަތުލައިގެންފި

ކަނޑުމަގުން ރާއްޖެ އެތެރެކުރަން އުޅުނު 99،000 ސިނގިރޭޓު އަތުލައިގެންފި އެވެ.

ދުންފަތް ކޮންޓްރޯލް ކުރުމަށް މި ސަރުކާރުން ދަނީ ގާނޫނަށް ބަދަލުތަކެއް ގެނެސް ވަރަށް ބޮޑު ހަރުކަށި ފިޔަވަޅުތަކެއް އަޅަމުންނެވެ.

ރާއްޖޭގައި ދުންފަތުގެ ގާނޫނު ހަރުކަށި ކުރުމުން ވަގަށް ސިނގިރޭޓް އެތެރެކުރުމުގެ މަސައްކަތް ކުރާ މީހުން ހުއްޓުވަން ސަރުކާރުން ވަނީ ކާމިޔާބު މަސައްކަތްތަކެއް ކޮށްފަ އެވެ.

ފުލުހުންނާއި މޯލްޑިވްސް ކަސްޓަމްސް ގުޅިގެން ރާއްޖެއަށް ވަގަށް އެތެރެކުރަން އުޅޭ ގިނަ އަދަދެއްގެ ސިގިރެޓް އަދި ދުންފަތް އެކުލެވޭ މާއްދާތައް ވެސް ވަނީ ހުއްޓުވާފަ އެވެ.

ކަސްޓަމްސް އިން ބުނީ ގަވައިދާ ޙިލާފަށް ވަގަށް އެތެރެކުރަން އުޅުނު 99،000 ސިނގިރޭޓު އެ މުއައްސަސާއިން އަތުލައިގަނެފައިވާ ކަމަށެވެ.

ދާދި ފަހަކުން ވަނީ މާލެ އިން ޕިކަޕެއްގައި ދިޔަ ތިން ބިދޭސީ މަގުމައްޗަށް ދޫކޮށްލާފައި ދިޔަ 221 ސިގިރޭޓް ކާޓޫން އަތުލައިގަނެ، ތިން ބިދޭސީން ވެސް ހައްޔަރުކޮށްފަ އެވެ.

ފުލުހުން އެކްސްގައި ކުރި ޕޯސްޓުގައި ބުނެފައިވަނީ އެ ސިގިރޭޓް ކާޓޫނުތައް ފެނުނީ ބޮޑުރަސްގެފާނު މަގުންނެވެ. އަދި ސިގިރޭޓްތައް ހުރީ ކަޅު ކުލައިގެ ތިން ދަބަހެއްގައި ބަންދުކޮށްފައެވެ.