ފުލުހުންގެ "ވޯކް އެންޑް ޓޯކް" ހަރަކާތް މުޅި ރާއްޖޭގައި

މުޅި ރާއްޖެއަށް އަމާޒުކޮށްގެން މޯލްޑިވްސް ޕޮލިސް ސާވިސް އިން ކުރިއަށް ގެންދަން ނިންމި "ވޯކް އެންޑް ޓޯކް" ހަރަކާތް މިއަދު ރަސްމީކޮށް ފަށައިފިއެވެ.

މި ހަރަކާތް މިއަދު ރާއްޖޭގެ ފުލުހުންގެ ޔުނިޓްތައް ހުންނަ ރަށްތަކުގައި ފަށާފައިވާއިރު، މިއީ ރައްޔިތުންނާ ގާތުން ރައްޔިތުންނާ ބައްދަލުކުރުމުގެ ގޮތުން ފެށި ހަރަކާތެކެވެ. މި ހަރަކާތް ރާއްޖޭގެ އެކި ކަންކޮޅުތަކުގައި ފަށާފައިވަނީ އެއްވަގުތެއްގައެވެ.

މި ހަރަކާތް ފެށުމުގެ ގޮތުން ދާހިލީ ވަޒީރު އަލީ އިހްސާން އަދި ފުލުހުންގެ ވެރިންނާއި ޔުނިޓްތަކުގެ ވެރިން ބައިވެރިވެ ވަޑައިގެންނެވިއެވެ.

ފުލުހުން ބުނީ، މިއީ ފުލުހުންނާއި ރައްޔިތުން އެއް މާހައުލެއްގައި ބައްދަލުވެ، ދެފަރާތުގެ މެދުގައި އޮންނަ ގުޅުން އިތުރަށް ބަދަހިކުރުމުގެ ގޮތުން ފެށި ހަރަކާތެއްކަމަށެވެ.މި ހަރަކާތުގެ ތެރެއިން ފުލުހުން ވަނީ ރައްޔިތުންނާ ބައްދަލުކޮށް ރައްކާތެރިކަމުގެ ގޮތުން ކުރެވޭނެ ކަންކަމާއި، ތަފާތު އެކި ކަހަލަ ކުށްތަކުން ރައްކާތެރިވެތިބުމަށް މަސައްކަތް ކުރާނެގޮތުގެ މައުލޫމާތު ހިއްސާކޮށްފައެވެ.

މިއީ ފުލުހުންނާއި ރައްޔިތުންގެ މެދުގައި އިތުބާރު އުފައްދައި، ދެފުށް ފެންނަ ގޮތެއްގައި ގުޅިގެން މަސައްކަތްކުރުމަށް ފުލުހުން ކުރަމުންދާ ސިލްސިލާ މަސައްކަތްތަކުގެ ތެރެއިން ކުރިއަށްދިޔަ ހަރަކާތެކެވެ. "ވޯކް އެންޑް ޓޯކް" މި ހަރަކާތް މިދިޔަ ފެބުރުއަރީމަހުވެސް ކުރިއަށްގެންގޮސްފައެވެ.