ތާށިވެފައި ތިބި ޓޫރިސްޓުންނަށް ރިޕެޓްރިއޭޝަން ފްލައިޓްތަކެއް

މެދުއިރުމަތީގައި މިހާރު ހިނގަމުންދާ ހަމަނުޖެހުންތަކުގެ ސަބަބުން، ދުނިޔޭގެ ވައިގެ ދަތުރުފަތުރަށް ދިމާވެފައިވާ ބުރޫއެރުންތަކާ ގުޅިގެން، ރާއްޖޭގައި ތާށިވެފައި ތިބި ފަތުރުވެރިން އެ މީހުންގެ ގައުމުތަކަށް އަނބުރާ ފޮނުވަން ފްލައިޓުތަކެއް ބާއްވަން ފަށައިފިއެވެ.

ވިސިޓް މޯލްޑިވްސް ކޯޕަރޭޝަނުން ބުނީ، މި ދަނޑިވަޅުގައި ފްލައިޓްތައް ކެންސަލްވުމުގެ ސަބަބުން ފަތުރުވެރިންނަށް ދިމާވާ ދަތިތަކާއި ކަންބޮޑުވުންތަކަށް ހައްލެއް ހޯދައިދިނުމަށް އިސްކަންދެމުންދާކަމަސެވެ.

މި މަސައްކަތުގެ ދަށުން މިހާތަނަށް އަށް ރިޕެޓްރިއޭޝަން ފްލައިޓް ބާއްވާފައިވާއިރު، މީގެ ތެރޭގައި ޖަރުމަނުވިލާތާއި ފްރާންސަށް ކުރި ހާއްސަ ދަތުރުތައް ހިމެނެއެވެ. މީގެ އިތުރުން، ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އަދި މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓާ ގުޅިގެން ހާއްސަ ހެލްޕް ޑެސްކެއް ވަނީ ގާއިމުކޮށްފައެވެ. މި ޑެސްކުން ފަތުރުވެރިންނަށް ބޭނުންވާ އިރުޝާދާއި އެހީތެރިކަން ފޯރުކޮށްދެމުންދާނެއެވެ.

ކުރިއަށް އޮތް ހަފުތާތަކުގައި އިތުރު ފްލައިޓްތައް ބޭއްވުމަށާއި، ދަތުރުފަތުރުގެ ގުޅުންތައް ވަރުގަދަކުރުމަށް ވިޒިޓް މޯލްޑިވްސްއިން ދަނީ އެކި އެއާލައިންތަކާ އެކު މަޝްވަރާ ކުރަމުންނެވެ. އަދި ރާއްޖެ އަންނަ ފަތުރުވެރިންގެ އަދަދު ދަށްވިޔަ ނުދިނުމަށްޓަކައި، މުޅި ސިނާއަތް ގުޅިގެން މާކެޓިން ކެމްޕޭންތަކެއް ފެށުމަށް ވެސް ވަނީ ގޮވާލާފައެވެ. މި ކެމްޕޭންތައް ހާއްސަ ކުރެވޭނީ ދަތުރުފަތުރުގެ ދަތިކަން ކުޑަ ގައުމުތައް ކަމަށްވާ އިންޑިއާ، ޗައިނާ، ރަޝިއާ އަދި އޭޝިއާގެ ބައެއް ސަރަހައްދުތަކަށެވެ.

ދުރުރާސްތާގެ ރިކަވަރީ ޕްލޭނެއްގެ ދަށުން، ކްރައިސިސް ރެސްޕޮންސް ސްޓްރެޓެޖީއެއް އެކުލަވާލަމުންދާކަމަށް ވީއެމްސީއިން ބުންޏެވެ.

ވިޒިޓް މޯލްޑިވްސްއިން ބުނި ގޮތުގައި، މިފަދަ ދުނިޔޭގެ ފެންވަރުގެ ގޮންޖެހުންތަކުން އަރައިގަނެވޭނީ ރާއްޖޭގެ ފަތުރުވެރިކަމުގެ ސިނާއަތުގެ އެއްބައިވަންތަކަމާއި ވަރުގަދަ އަޒުމާއެކުގައެވެ.